MISA DE NUESTRA SEÑORA DE LUJÁN

Misa otorgada por León XIII en el año 1886.

   

Die 8 Maji et 12 Octobris
BEÁTÆ MARÍÆ VÍRGINIS DE LUJÁN
Duplex 2. Classis

  

Introitus. Gaudeámus omnes in Dómino, diem festum celebrántes sub honóre beátæ Maríæ Vírginis: de cujus protectióne gaudet Ecclésia, et cum Ángelis collaúdat Fílium Dei (T.P. Allelúja). Ps. 44, 2. Eructávit cor meum verbum bonum: dico ego ópera mea Regi. ℣. Glória Patri.

  

ORATIO

Devotiónem pópuli tui, quǽsumus, Dómine, propítius réspice: ut, méritis et précibus beatíssimæ Vírginis Maríæ, grátiæ tuæ dona in præsénti vita; et salútem ætérnam in cœlis consequámur. Per eúndem Dóminum.

  

Léctio libri Sapiéntiæ.

Eccli. 24, 23-31.

Ego quasi vitis fructificávi suavitátem odóris: et flores mei fructus honóris et honestátis. Ego mater pulchræ dilectiónis et timóris et agnitiónis et sanctæ spei. In me grátia omnis viæ et veritátis: in me omnis spes vitæ et virtútis. Transíte ad me, omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes sæculórum. Qui edunt me, adhuc esúrient: et qui bibunt me, adhuc sítient. Qui audit me, non confundátur: et qui operántur in me, non peccábunt. Qui elúcidant me, vitam ætérnam habébunt.

  
Graduale. Benedícta et venerábilis es, Virgo María: quæ sine tactu pudóris inventa es Mater Salvatóris.

℣. Virgo, Dei Génetrix, quem totus non capit orbis, in tua se clausit víscera factus homo.
  
Allelúja, allelúja. ℣. Jerem. 18, 20. Recordáre, Virgo Mater Dei, dum stéteris in conspéctu Dómini, ut loquáris pro nobis bona, et ut avértat indignatiónem suam a nobis. Allelúja.

  

✠ Sequéntia sancti Evangélii secúndum Lucam.

Luc. 1, 26-38.

 
In illo témpore: Missus est Angelus Gábriel a Deo in civitátem Galilǽæ, cui nomen Názareth, ad Vírginem desponsátam viro, cui nomen erat Joseph, de domo David, et nomen Vírginis María. Et ingréssus Angelus ad eam, dixit: Ave, grátia plena; Dóminus tecum: benedícta tu in muliéribus. Quæ cum audísset, turbáta est in sermóne ejus: et cogitábat, qualis esset ista salutátio. Et ait Ángelus ei: Ne tímeas, María, invenísti enim grátiam apud Deum: ecce, concípies in útero et páries fílium, et vocábis nomen ejus Jesum. Hic erit magnus, et Fílius Altíssimi vocábitur, et dabit illi Dóminus Deus sedem David, patris ejus: et regnábit in domo Jacob in ætérnum, et regni ejus non erit finis. Dixit autem María ad Ángelum: Quómodo fiet istud, quóniam virum non cognósco? Et respóndens Ángelus, dixit ei: Spíritus Sanctus supervéniet in te, et virtus Altíssimi obumbrábit tibi. Ideóque et quod nascétur ex te Sanctum, vocábitur Fílius Dei. Et ecce, Elísabeth, cognáta tua, et ipsa concépit fílium in senectúte sua: et hic mensis sextus est illi, quæ vocátur stérilis: quia non erit impossíbile apud Deum omne verbum. Dixit autem María: Ecce ancílla Dómini, fiat mihi secúndum verbum tuum.
 

Et dicitur Credo.

Offertorium. 2. Paralip. 7, 16. Elégi et sanctificávi locum istum, ut sit ibi nomen meum, et permáneant óculi mei et cor meum ibi cunctis diébus. (T.P. Allelúja).

   

SECRETA

Tua, Dómine, propitiatióne, et beátæ Maríæ semper Vírginis protectióne, ad perpétuam ac præséntem hæc oblátio nobis profíciat prosperitátem et pacem. Per Dóminum.

  

Præfatio de Beatæ Mariæ Virginis

Vere dignum et justum est, ǽquum et salutáre, nos tibi semper et ubique grátias ágere: Dómine sancte, Pater omnípotens, ætérne Deus: Et te in Festivitáte (in Missis votivis: in Veneratióne) beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et, virginitátis glória permanénte, lumen ætérnum mundo effúdit, Jesum Christum, Dóminum nostrum. Per quem majestátem tuam laudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admitti jubeas, deprecámur, súpplici confessióne dicéntes:

  

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

    

Communio. Ps. 147, 20. Non fecit táliter omni natióni: et judícia sua non manifestávit eis. (T.P. Allelúja).

  

POSTCOMMUNIO

Sumptis, Dómine, salútis nostræ subsídiis: da, quaésumus, beátæ Maríæ semper Vírginis patrocíniis nos ubíque prótegi; in cujus veneratióne hæc tuæ obtúlimus majestáti. Per Dóminum.