MISA DE LA RECOLECCIÓN DE TODAS LAS FIESTAS DE NUESTRA SEÑORA

En el antiguo Misal parvo de Cambrai (1507), en el Misal de Sarum y el Misal Romano de 1474 se registraba una Misa que celebraba todos los Misterios de Nuestra Señora que se observaban individualmente considerados en en ese entonces. Esta memoria de la Recolección de todas las Fiestas de la Bienaventurada Virgen María era celebrada en la octava de la Asunción por la Diócesis de Cambrai con Oficio, Misa y Secuencia propios, mientras que en la ciudad de Lovaina era celebrada el 1 de Septiembre. Se dice incluso que era celebrada en Aosta.

 

Die 1 Septembris (in Lovania)

Recolléctio ómnium Festórum Beátæ Maríæ Vírginis

 

Introitus. Gaudeámus omnes in Dómino diem festum celebrántes sub honóre beátæ Maríæ Vírginis, de cujus Solemnitátem gaudent Ángeli et colláudant Fílium Dei. Ps. 44, 1. Eructávit cor meum verbum bonum; dico ego ópera mea Regi. ℣. Gloria Patri.

 

ORATIO

Deus, qui nos Conceptiónis, Nativitatis, Præsentatiónis, Annunciatiónis, Visitatiónis, Purificatiónis et Assumptiónis Beátæ et gloriósæ Vírginis Maríæ gaudia et solemnitátis recoléndo lætíficas; concéde nobis, sic ejus láudibus et servítio digne insístere, ut eam in omni necessitáte et angústia, præcípue in hora mortis, præséntem et auxiliatrícem sentiámus, et tecum post mortem, per ipsam et cum ipsa gaudére mereámur in cœlis. Per Dóminum.

      

Lectio Libri Sapientiæ

Cant. 2, 13b-14; 4, 1-2a, 7-9, 11b

 

Surge, própera, amíca mea, speciósa mea, et veni. Colúmba mea, in foramínibus petræ, in cavérna macériæ, osténde mihi fáciem tuam, sonet vox tua in áuribus meis: vox enim tua dulcis, et fácies tua decóra. Quam pulchra es, amíca mea! quam pulchra es! Óculi tui columbárum, absque eo quod intrínsecus latet. Capílli tui sicut greges caprárum quae ascendérunt de monte Galaad. Dentes tui sicut greges tonsárum quae ascendérunt de lavácro. Tota pulchra es, amíca mea, et mácula non est in te. Veni de Líbano, sponsa mea, veni de Líbano; veni coronáberis. Vulnerásti cor meum, soror mea, sponsa; vulnerásti cor meum in uno oculórum tuórum, et in uno crine colli tui. Mel et lac sub língua tua: et odor vestimentórum tuórum sicut odor thuris.

 

Graduale. Tob. 13, 13-14. Luce spléndida fúlgebis: et omnes fines terræ adorábunt te.

℣. Natiónes ex longínquo ad te vénient, et múnera deferéntes adorábunt in te Dóminum, et terram tuam in sanctificatiónem habébunt.

 

Allelúja, allelúja. ℣. Beáti omnes qui díligunt te, o Virgo Mater, et qui gaudent super pace tua. Benedíctus Dóminus qui exaltávit te, et posuit super te regnum ejus in sǽcula sæculórum.

 

SEQUENTIA

Mittit ad stérilem

Non quémvis núntium

Sed summi Ángelum

Luce refulgéntem

Amátor hóminis.

 

Mirátur et credit

Et lǽta concípit

Dei genitrícem

Quam gáudens péperit

Cunctis amábilem.

   

Virgo singuláris

Manet in ábdito;

Mente servit Deo

Cánticis et hymnis

Mundo profutúra.

Castum propósitum

Voto confirmávit,

Ángelos merétur

Habére consórtes

Nostra reparátrix.

A summo cárdine

Mittit Archángelum,

Audit et suscípit

Púella núntium,

Credit et concípit.

  

Festínat grávida

Virgo puérpera,

Visítat stérilem

Matrem preccursóris

Rex ineffábilis.

  

Mundi redemptórem

Pepérit intácta,

Gaudium ángelis

Prétium hóminum

Víctisque triúmphum.

  

Húmilis infántem

Deo repræséntat

Illi munus offert

Quod lex præcéperat

Hoc senex excípit.

Mundi dominátrix

Choros angelórum

Transcéndit assúmpta

Regína cœlórum,

Dei mater alma.

  

Illic concáthedrat

Vírginem Fílius

Impónit corónam

Super caput ejus

Ad glóriam Dei.

  

Ista mirífica

Plebs tua celébrat;

Tibi mente psallit

Et voce júbilat,

Mater orphanórum.

Pro nobis obtíne

Génitrix véniam

Et reátum dílue

Et dona Pátriam

In arce sidérum.

Amen. Allelúja.

   

✠ Sequéntia sancti Evangélii secúndum Lucam.

Luc.1, 39- 47.

   

In illo témpore: Exsúrgens María ábiit in montána cum festinatióne in civitátem Juda: et intrávit in domum Zacharíæ et salutávit Elísabeth. Et factum est, ut audivit salutatiónem Maríæ Elísabeth, exsultávit infans in útero ejus: et repléta est Spíritu Sancto Elísabeth, et exclamávit voce magna et dixit: Benedícta tu inter mulíeres, et benedíctus fructus ventris tui. Et unde hoc mihi, ut véniat Mater Dómini mei ad me? Ecce enim, ut facta est vox salutatiónis tuæ in áuribus meis, exsultávit in gáudio infans in útero meo. Et beáta, quæ credidísti, quóniam perficiéntur ea, quæ dicta sunt tibi a Dómino. Et ait María: Magníficat ánima mea Dóminum: et exsultávit spíritus meus in Deo, salutári meo.

  

Credo.

 
Offertorium. Luc. 1, 49. Beatám te dicent omnes generatiónes, quia fecit tibi Dóminus magna qui potens est: et sanctum nomen ejus.
 
SECRETA 

Dómine Jesu Christe, sanctárum cogitatiónum suspirátor; qui servos tuos gloriósam Matrem tuam honoráre docuísti; concéde propítius ípsius solémnia cum sacrifício laudis debíta cum devotióne celebráre in terris, ut ejus intercessióne regnándo jubiláre mereántur in cœlis. Qui vivis.
    

Præfatio de B.M.V. Et te in Solemnitáte:

Vere dignum et justum est, æquum et salutáre, nos tibi semper et ubique grátias ágere: Dómine sancte, Pater omnípotens, ætérne Deus: Et te in Solemnitáte beátæ Maríæ semper Vírginis exsultántibus ánimis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et, virginitátis glória permanénte, lumen ætérnum mundo effúdit, Jesum Christum, Dóminum nostrum. Per quem majestátem tuam laudant Angeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admitti jubeas, deprecámur, súpplici confessióne dicéntes:
  

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

 

Communio. Benedícite Deum cœli cum timóre: et exsultáte ei cum trémore: quia fecit nobíscum misericórdiam: cum in Cœlis Matrem pro nobis esse vóluit advocátam.

 
POSTCOMMUNIO

Concéde, quǽsumus, omnípotens Deus, sacraménta tua; súmpsimus in honóre beátæ Maríæ vírginis matris immaculáto corde serváre: ut nunc festa ejus coléntes, post excéssum hujus vit ad ípsius mereámur transíre consórtium. Per eúndem Dóminum.