MISA DEL HALLAZGO DE NUESTRO SEÑOR EN MEDIO DE LOS DOCTORES

Del Misal Propio de Jerusalén, donde se celebraba el 13 de Febrero. En otros lugares, la Misa era el 9 del mismo mes o el Sábado antes de Septuagésima.

 

Die 13 Februarii

Inventiónis Púeri Jesu in médio Doctórum

Duplex Majus.

 

Introitus. In excélso throno vidi sedére virum, quem adórat multitúdo Angelórum, psalléntes in unum: ecce, cujus impérii nomen est in ætérnum. (T.P. Allelúja, allelúja.) Ps. 99, 1. Jubiláte Deo, omnis terra: servíte Dómino in lætítia. ℣. Glória Patri.

ORATIO

Deus, qui in húmilem Fílii tui puerítiam cœlésti clarére sapiéntia voluísti: præsta, ut spíritu prudéntiæ repléti, sincéra tibi humilitáte placeámus. Per eúndem Dóminum nostrum.

  

Léctio Áctuum Apostolórum.

Act. 3, 22-26.

 

Móyses dixit: Quóniam prophétam suscitábit vobis Dóminus Deus vester de frátribus vestris, tamquam me: ipsum audiétis juxta ómnia quæcúmque locútus fúerit vobis. Erit autem: omnis ánima quæ non audiérit prophétam illum, exterminábitur de plebe. Et omnes prophétæ, a Sámuel et deínceps, qui locúti sunt, annuntiavérunt dies istos. Vos estis fílii prophetárum, et testaménti quod dispósuit Deus ad patres nostros, dicens ad Ábraham: Et in sémine tuo benedicéntur omnes famíliæ terræ. Vobis primum Deus suscítans fílium suum, misit eum benedicéntem vobis: ut convértat se unusquísque a nequítia sua.

 

Graduale. Sap. 8, 10-11. Habébo propter sapiéntiam claritátem ad turbas, et honórem apud senióres júvenis; et in conspéctu poténtium admirábilis ero.

℣. Col. 2, 3. In Christo sunt omnes thesáuri sapiéntiæ et sciéntiæ abscónditi.

 

Allelúja, allelúja. ℣. Luc. 2, 13. Stupébant autem omnes, qui Jesum audiébant, super prudéntia et respónsis ejus. Allelúja.

Post Septuagesimam, omissis Allelúja et Versu sequenti, dicitur: 
Tractus. Ps. 79, 8. Deus virtútum, convérte nos, et osténde Fáciem tuam, et salvi érimus.

℣. Cant. 2, 14. Sonet vox tua in áuribus meis: vox enim tua dulcis, et fácies tua decóra.

℣. Cant. 1, 2. Óleum effúsum nomen tuum, Jesu, ídeo adolescéntulæ dilexérunt te.

 

Tempore autem Paschali emittitur Graduale, et ejus loco dicitur:

Allelúja, allelúja.

℣. Luc. 2, 13. Stupébant autem omnes, qui Jesum audiébant, super prudéntia et respónsis ejus. Allelúja.

℣. Col. 2, 3. In Christo sunt omnes thesáuri sapiéntiæ et sciéntiæ abscónditi. Allelúja.

 

✠ Sequéntia sancti Evangélii secúndum Lucam.

Luc. 2, 42-52.

 

Cum factus esset Jesus annórum duódecim, ascendéntibus illis Jerosólymam secúndum consuetúdinem diéi festi, consummatísque diébus, cum redírent, remánsit puer Jesus in Jerúsalem, et non cognovérunt paréntes ejus. Existimántes autem illum esse in comitátu, venérunt iter diéi, et requirébant eum inter cognátos et notos. Et non inveniéntes, regréssi sunt in Jerúsalem, requiréntes eum. Et factum est, post tríduum invenérunt illum in templo sedéntem in médio doctórum, audiéntem illos et interrogántem eos. Stupébant autem omnes, qui eum audiébant, super prudéntia et respónsis ejus. Et vidéntes admiráti sunt. Et dixit Mater ejus ad illum: Fili, quid fecísti nobis sic? Ecce, pater tuus et ego doléntes quærebámus te. Et ait ad illos: Quid est, quod me quærebátis? Nesciebátis, quia in his, quæ Patris mei sunt, opórtet me esse? Et ipsi non intellexérunt verbum, quod locútus est ad eos. Et descéndit cum eis, et venit Názareth: et erat súbditus illis. Et Mater ejus conservábat ómnia verba hæc in corde suo. Et Jesus proficiébat sapiéntia et ætáte et grátia apud Deum et hómines

 

Et dicitur Credo.

 

Offertorium. Joel. 2, 23. Fílii Sion, exsultáte, et lætámini in Dómino Deo vestro, quia dedit vobis Doctórem justítiæ. (T.P. Allelúja.)

 

SECRETA

Devotiónis nostræ múnera tibi offérimus, Dómine, majestátem tuam humíliter deprecántes; ut, qui Fílii tui tempáralem puerítiam sapiéntiæ et sciéntiæ donis fecísti clarescére, corda nostra ad percipiénda ex ore ejus salútis documénta dispónas. Per eúndem Dóminum.

 

Præfatio de Nativitáte.

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: Quia per incarnáti Verbi mystérium nova mentis nostræ óculis lux tuæ claritátis infúlsit: ut, dum visibíliter Deum cognóscimus, per hunc in invisibílium amorem rapiámur. Et ideo cum Ángelis et Archángelis, cum Thronis et Dominatiónibus cumque omni milítia cœléstis exércitus hymnum glóriæ tuæ cánimus, sine fine dicéntes:

 

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

 

Communio. Joann. 6, 69-70. Verba vitæ ætérnæ habes: et nos credídimus, et cognóvimus quia tu es Christus Fílius Dei. (T.P. Allelúja.)

POSTCOMMUNIO

Deus, cujus Unigénitus se velúti proficiéntem sapiéntia et gratis mortálium sénsibus exhíbere dignátus est; quǽsumus, ut, quotidiána nobis spirituálium proféctuum increménta per hæc, quæ súmpsimus, mystéria propítius largiáris. Per eúndem Dóminum.