MISA DE SAN JOSAFAT, OBISPO Y MÁRTIR

Misa aprobada por León XIII el 28 de Julio de 1882.

   

Die 14 Novembris

IN FESTO SANCTI JÓSAPHAT, EPÍSCOPI ET MARTYR 

Duplex

  

Introitus. Gaudeámus omnes in Dómino, diem festum celebrántes sub honóre beáti Jósaphat Mártyris: de cujus passióne gáudent Ángeli, et colláudant Fílium Dei Ps. 32, 1. Exsultáte, justi, in Dómino: rectos decet collaudátio. ℣. Glória Patri.

 

ORATIO

Excíta, quǽsumus, Dómine, in Ecclésia tua Spíritum, quo replétus beátus Jósaphat ánimam suam pro óvibus pósuit, ut, eo intercedénte, nos quóque eódem Spíritu roboráti, ánimam nostram pro frátribus pónere non vereámur. Per Dóminum nostrum Jesum Christum Fílium tuum, in unitáte ejúsdem Spíritus Sancti, Deus, per ómnia sǽcula sæculórum. Amen.

   

Léctio Epístolæ Beáti Páuli Apóstoli ad Hebrǽos.

Heb. 5, 1-6.

Fratres: Omnis Póntifex ex homínibus assúmptus, pro homínibus constitúitur in iis, quæ sunt ad Deum: ut ófferat dona, et sacrifícia pro peccátis: qui condolére possit iis, qui ignórant, et errant: quóniam et ipse circúmdatus est infirmitáte: et proptérea debet, quemádmodum pro pópulo, ita étiam et pro semetípso offérre pro peccátis. Nec quísquam sumit sibi honórem, sed qui vocátur a Deo támquam Áaron. Sic et Christus non semetípsum clarificávit ut póntifex fíeret: sed qui locútus est ad eum: Fílius meus es tu, ego hódie génui te. Quemádmodum et in álio loco dicit: Tu es sacérdos in ætérnum secúndum órdinem Melchísedech.

   

Graduale. Ps. 88, 21-23. Invéni David servum meum, óleo sancto meo unxi cum: manus enim mea auxiliábitur ei, et bráchium meum confortábit eum.

℣. Nihil profíciet inimícus in eo, et fílius iniquitátis non nocébit ei.

     

Allelúja, allelúja. ℣. Ps. 110, 1. Hic est sacérdos, quem coronávit Dóminus. Allelúja.

   

Post Septuagesimam, omissis Allelúja et Versu sequenti, dicitur:

Tractus. Ps. 20, 2-4. Desidérium ánimæ ejus tribuísti ei: et voluntáte labiórum ejus non fraudásti eum.

℣. Quóniam prævenísti eum in benedictiónibus dulcédinis.

℣. Posuísti, Dómine, super caput ejus corónam de lápide pretióso.

Tempore autem Paschali omittitur Graduale, et ejus loco dicitur:

Allelúja, allelúja.

℣. Ps. 88, 6. Confitebúntur cœli mirabília tua, Dómine: étenim veritátem tuam in Ecclésia sanctórum. Allelúja.

℣. Ps. 20, 4. Posuísti, Dómine, super caput ejus corónam de lápide pretióso. Allelúja.

   

✠ Sequéntia sancti Evangélii secúndum Joánnem.

Joann. 10, 11-16.

   

In illo témpore: Dixit Jesus pharisǽis: Ego sum pastor bonus. Bonus pastor ánimam suam dat pro óvibus suis. Mercenárius áutem, et qui non est pastor, cujus non sunt oves própriæ, videt lupum veniéntem, et dimíttit oves et fugit: et lupus rapit, et dispérgit oves: mercenárius áutem fugit, quia mercenárius est, et non pértinet ad eum de óvibus. Ego sum pastor bonus: et cognósco meas, et cognóscunt me meæ. Sicut novit me Pater, et ego agnósco Patrem: et ánimam meam pono pro óvibus meis. Et álias oves hábeo, quæ non sunt ex hoc ovíli: et illas opórtet me addúcere, et vocem meam áudient, et fiet unum ovíle, et unus pastor.

  

Offertorium. Joann. 15, 13. Majórem caritátem nemo habet, ut ánimam suam ponat quis pro amícis suis.

  

SECRETA

Clementíssime Deus, múnera hæc tua benedictióne perfúnde, et nos in fide confírma: quam sanctus Jósaphat Martyr et Póntifex tuus, effúso sánguine; asséruit. Per Dominum.

   

Communio. Joann. 10, 14. Ego sum Pastor Bonus, et cognósco oves meas, et cognóscunt me meæ.

   

POSTCOMMUNIO

Spíritum,  Dómine, fortitúdinis hæc nobis tríbuat mensa cœléstis: quæ sancti Jósaphat Mártyris tui átque Pontíficis vitam pro Ecclésiæ honóre jugiter áluit ad victóriam. Per Dominum nostrum Jesum Christum Fílium tuum, qui tecum vivit et regnat in unitáte ejúsdem Spíritus Sancti, Deus, per ómnia sǽcula sæculórum. Amen.