MISA DEL BEATO JUAN LICCIO, MONJE DOMINICO

Del Misal de la Orden de Predicadores. La Misa es del Común de Confesores, con Oración propia.

   

14 Novembris 

Beáti Joánnis Liccio, Confessóris

Duplex

   

Introitus. Ps. 36, 30-31. Os justi meditábitur sapiéntiam, et lingua ejus loquétur judícium: lex Dei ejus in corde ipsíus (T.P. Allelúja, allelúja). Ps. ibid., 1. Noli æmulári in malignántibus: neque zeláveris faciéntes iniquitátem. ℣. Glória Patri.

   

ORATIO

Deus, qui beátum Joánnem confessórem tuum plena sui abnegatióne átque exímiæ charitátis zelo clarescére voluísti, ejus nobis imitatióne concéde, ut abdicátis terrénis afféctibus, in tua dilectióne vivámus. Per Dóminum.

  

Commemoratio de S. Britio Ep. et Conf.

ORATIO
Da, quǽsumus omnípotens Deus: ut beáti Brítii Confessóris tuis atque Pontíficis veneránda solémnitas; et devotiónis áugeat, et salútem. Per Dóminum.

   

Léctio libri Sapiéntiæ.

Eccli. 31, 8-11.

   

Beátus vir, qui invéntus est sine mácula, et qui post aurum non ábiit, nec sperávit in pecúnia et thesáuris. Quis est hic, et laudábimus eum? fecit enim mirabília in vita sua. Qui probátus est in illo, et perféctus est, erit illi glória ætérna: qui potuit tránsgredi, et non est transgréssus: fácere mala, et non fecit: ídeo stabilíta sunt bona illíus in Dómino, et eleemósynis illíus enarrábit omnis ecclésia sanctórum.

   

Graduale. Ps. 20, 4-5. Dómine, prævenísti eum in benedictiónibus dulcédinis: posuísti in cápite ejus corónam de lápide pretióso.

℣. Ibid., 3. Vitam pétiit a te, et tribuísti ei longitúdinem diérum in sǽculum sǽculi.

 
℣. Osee 14, 6. Justus germinábit sicut lílium: et florébit in ætérnum ante Dóminum. Allelúja.

   

¶ In Missis votivis post Septuagesimam, omissis Allelúja, et Versu sequenti, dicitur:

Graduale. Ps. 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicétur.

℣. Glória et divítiæ in domo ejus: et justítia ejus manet in sǽculum sǽculi.

Tempore autem Paschali omittitur Graduale, et ejus loco dicitur:

Allelúja, allelúja.

℣. Osee 14, 6. Justus germinábit sicut lílium: et florébit in ætérnum ante Dóminum. Allelúja.

℣. Matth. 28, 2. Ángelus Dómini descéndit de cœlo: et accédens revólvit lápidem, et sedébat super eum. Allelúja.

   

Post Ascensionem, dicitur:

℣. Osee 14, 6. Justus germinábit sicut lílium: et florébit in ætérnum ante Dóminum. Allelúja.

℣. Ephes. 4, 8. Ascéndens Christus in altum, captívam duxit captivitátem: dedit dona homínibus. Allelúja.

     

✠ Sequéntia sancti Evangélii secúndum Lucam.

Luc. 12, 35-40.

   

In illo témpore: Dixit Jesus discípulis suis: Sint lumbi vestri præcíncti, et lucérnæ ardéntes in mánibus vestris, et vos símiles homínibus exspectántibus dóminum suum, quando revertátur a núptiis: ut, cum vénerit et pulsáverit, conféstim apériant ei. Beáti servi illi, quos, cum vénerit dóminus, invénerit vigilántes: amen, dico vobis, quod præcínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc autem scitóte, quóniam, si sciret paterfamílias, qua hora fur veníret, vigiláret útique, et non síneret pérfodi domum suam. Et vos estóte paráti, quia, qua hora non putátis, Fílius hóminis véniet.

  

Offertorium. Ps. 91, 13. Justus ut palma florébit: Sicut cedrus Líbani multiplicábitur. (T. P. Allelúja.)

  

SECRETA

Præsta nobis, quǽsumus, omnípotens Deus, ut nostræ humilitátis oblátio, et pro tuórum tibi grata sit honóre Sanctórum, et nos córpore páriter et mente puríficet. Per Dóminum.

  

Commemoratio de S. Britio Ep. et Conf.

SECRETA

Sancti tui, quǽsumus, Dómine, nos ubíque lætíficant: ut, dum eórum mérita recólimus, patrocínia sentiámus. Per Dóminum.

  

Communio. Matth. 19, 28 et 29. Amen, dico vobis: quod vos, qui reliquístis ómnia et secúti estis me, céntuplum accipiétis, et vitam ætérnam possidébitis. (T. P. Allelúja.)

POSTCOMMUNIO

Quǽsumus omnípotens Deus: ut qui cœléstia aliménta percépimus; intercedénte beáto Joánne Confessóre tuo, per hæc contra ómnia advérsa muniámur. Per Dóminum.

  

Commemoratio de S. Britio Ep. et Conf.

POSTCOMMUNIO
Præsta, quǽsumus, omnípotens Deus: ut, de percéptis munéribus grátias exhibéntes, intercedénte beáto Lauréntio Confessóre tuo atque Pontífice, benefícia potióra sumámus. Per Dóminum.

        

¶ Item aliud Evangelium:

  

✠ Sequéntia Sancti Evangélii secúndum Lucam

Luc. 10, 1-9.

Designávit Dóminus et álios septuagínta duos et misit illos binos ante fáciem suam in omnem civitátem et locum, quo erat ipse ventúrus. Et dicébat illis: Messis quídem multa, operárii áutem páuci. Rogáte ergo Dóminum messis, ut mittat operários in messem suam. Ite: ecce ego mitto vos sicut agnos inter lupos. Nolite portáre sácculum, néque peram, néque calceaménta, et néminem per viam salutavéritis. In quamcúmque domum intravéritis, primum dícite: Pax huic dómui: et si ibi fúerit fílius pacis, requiéscet super illum pax vestra. Sin áutem, ad vos revertétur. In eádem áutem domo manéte, edéntes et bibéntes quæ apud illos sunt; dignus est enim operárius mercéde sua. Nolite transíre de domo in domum. Et in quamcúmque civitátem intravéritis, et suscéperint vos, manducáte quæ apponúntur vobis: et curáte infírmos, qui in illa sunt, et dícite illis: Appropinquávit in vos regnum Dei.