MISA DE NUESTRA SEÑORA DE LOS DESAMPARADOS

Del Misal Propio de España. La misa es del Común de Santa María para el Tiempo Pascual, mas la Oración es propia.

  

Domínica 2. Maji

BEÁTÆ MARÍÆ VÍRGINIS DESERTÓRUM, seu DE LOS DESAMPARADOS

Duplex Majus

  
Introitus. Sedulius. Salve, sancta Parens, eníxa puérpera Regem: qui cœlum terrámque regit in sǽcula sæculórum, allelúja, allelúja. Ps. 44, 2. Eructávit cor meum verbum bonum: dico ego ópera mea Regi. ℣. Glória Patri.

 
Dicitur Glória in excélsis.
  

ORATIO
Deus, qui beatíssimam Vírginem Maríam dulcíssimo título Matris Desertórum nos venerári tribuísti, ejúsque intercessióne tantam grátiam conférre dignátus es, ut nullus ad ejus præsídium confúgiens fúeris derelíctus: concéde nobis famulis tuis, ut sub tantæ Matris protectióne constitúti, núnquam a tua benignitáte deserámur. Per Dóminum.
  
Et fit Commemoratio Dominicæ.

 

Léctio libri Sapiéntiæ.
Eccli. 24, 14-16.

  

Ab inítio et ante sǽcula creáta sum, et usque ad futúrum sǽculum non désinam, et in habitatióne sancta coram ipso ministrávi. Et sic in Sion firmáta sum, et in civitáte sanctificáta simíliter requiévi, et in Jerúsalem potéstas mea. Et radicávi in pópulo honorificáto, et in parte Dei mei heréditas illíus, et in plenitúdine sanctórum deténtio mea.

    

Allelúja, allelúja. ℣. Num. 17, 8. Virga Jesse flóruit: Virgo Deum et hóminem génuit: pacem Deus réddidit, in se reconcílians ima summis. Allelúja. 

℣. Luc. 1, 28. Ave, María, grátia plena: Dóminus tecum: benedícta tu in muliéribus. Allelúja.

 

✠ Sequéntia sancti Evangélii secúndum Joánnem.

Joann. 19, 25-27.

  

In illo témpore: Stabant juxta crucem Jesu mater ejus, et soror matris ejus María Cléophæ, et María Magdaléne. Cum vidísset ergo Jesus matrem, et discípulum stantem, quem diligébat, dicit matri suæ: Múlier, ecce fílius tuus. Deínde dicit discípulo: Ecce mater tua. Et ex illa hora accépit eam discípulus in sua. Credo.

 
Offertorium. Beáta es, Virgo María, quæ ómnium portásti Creatórem: genuísti qui te fecit, et in ætérnum pérmanes Virgo, allelúja.

 

SECRETA

Tua, Dómine, propitiatióne, et beátæ Maríæ Vírginis intercessióne, vivis ad médelam, mortuísque ad suffrágia oblátio hæc profíciat, usque ad ætérnam prosperitátem et pacem. Per Dóminum.
   
Et fit commemoratio Dominicæ.
  

Præfatio de Beatæ Mariæ Virginis

Vere dignum et justum est, ǽquum et salutáre, nos tibi semper et ubique grátias ágere: Dómine sancte, Pater omnípotens, ætérne Deus: Et te in Festivitáte beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et, virginitátis glória permanénte, lumen ætérnum mundo effúdit, Jesum Christum, Dóminum nostrum. Per quem majestátem tuam laudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admitti jubeas, deprecámur, súpplici confessióne dicéntes:

 

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

    

Communio. Beáta viscera Maríæ Vírginis, quæ portavérunt ætérni Patris Fílium, allelúja.

  

POSTCOMMUNIO

Sumptis, Dómine, salútis nostræ subsídiis: da, quǽsumus, beátæ Maríæ semper Vírginis suffrágiis vivos et mórtuos ubíque prótegi; in cujus veneratióne hæc tuæ obtúlimus majestáti. Per Dóminum.

Et fit commemoratio Dominicæ.