MISA DE SANTA CATALINA LABOURÉ

Misa aprobada por la Sagrada congregación de Ritos el de 1935. La Misa Dilexísti es del Común de las Vírgenes, pero las oraciones son propias.

  

Die 28 Novémbris

S. CATHARÍNÆ LABOURÉ, VÍRGINIS

Duplex Majus

  

Introitus. Ps. 44, 8. Dilexísti justítiam, et odísti iniquitátem: proptérea unxit te Deus, Deus tuus, óleo lætítiæ præ consórtibus tuis. (T.P. Allelúja, allelúja.) Ps. ibid., 2. Eructávit cor meum verbum bonum: dico ego ópera mea Regi. ℣. Glória Patri.

ORATIO

Dómine Jesu Christe, qui beátam Catharínam Vírginem, mirábili Immaculátæ Genitrícis tuæ manifestatióne recreáre dignátus es: tríbue, quǽsumus, ut sanctíssimam Matrem tuam exémplis ejusdem Beátæ pia devotióne recoléntes, æternæ vitæ gáudia consequámur. Qui vivis.

  

Léctio Epístolæ beáti Pauli Apóstoli ad Corínthios.

2 Cor. 10, 17-18; 11, 1-2.

  

Fratres: Qui gloriátur, in Dómino gloriétur. Non enim qui seípsum comméndat, ille probátus est: sed quem Deus comméndat. Útinam sustinerétis módicum quid insipiéntiæ meæ, sed et supportáte me: ǽmulor enim vos Dei æmulatióne. Despóndi enim vos uni viro vírginem castam exhibére Christo.

    

Graduale. Ps. 44, 5. Spécie tua, et pulchritúdine tua inténde, próspere procéde, et regna.

℣. Propter veritátem, et mansuetúdinem, et justítiam: et dedúcet te mirabíliter déxtera tua.

  

Allelúja, allelúja. ℣. Ibid., 15 et 16. Adducéntur Regi vírgines post eam: próximae ejus afferéntur tibi in lætítia. Allelúja.

   

Post Septuagesimam, omissis Allelúja et Versu sequenti, dicitur:

Tractus. Ps. 44, 11 et 12. Audi, fília, et vide, et inclína aurem tuam: quia concupívit Rex spéciem tuam.

℣. Ibid., 13 et 10. Vultum tuum deprecabúntur omnes dívites plebis: fíliæ regum in honóre tuo.
℣. Ibid., 15-16. Adducéntur Regi vírgines post eam: próximæ ejus afferéntur tibi.

℣. Afferéntur in lætítia, et exsultatióne: adducéntur in templum Regis.

    

Tempore autem Paschali omittitur Graduale, et ejus loco dicitur:

Allelúja, allelúja.
℣. Ps. 44, 15 et 16. Adducéntur Regi vírgines post eam: próximæ ejus afferéntur tibi in lætítia. Allelúja.
℣. Ibid., 5. Spécie tua, et pulchritúdine tua inténde, próspere procéde, et regna. Allelúja.

   

✠ Sequéntia sancti Evangélii secúndum Matthǽum.

Matth. 25, 1-13.

  

In illo témpore: Dixit Jesus discípulis suis parábolam hanc: Símile erit regnum cœlórum decem virgínibus: quæ accipiéntes lámpadas suas, exiérunt óbviam sponso et sponsæ. Quinque autem ex eis erant fátuæ, et quinque prudéntes: sed quinque fátuæ, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Moram autem faciénte sponso, dormitavérunt omnes, et dormiérunt. Média autem nocte clamor factus est: Ecce sponsus venit, exíte óbviam ei. Tunc surrexérunt omnes vírgines illæ, et ornavérunt lámpades suas. Fátuæ autem sapiéntibus dixérunt: Date nobis de óleo vestro: quia lámpades nostræ exstinguúntur. Respondérunt prudéntes, dicéntes: Ne forte non suffíciat nobis, et vobis, ite pótius ad vendéntes, et émite vobis. Dum autem irent émere, venit sponsus: et quæ parátæ erant, intravérunt cum eo ad núptias, et clausa est jánua. Novíssime vero véniunt et réliquæ vírgines, dicéntes: Dómine, Dómine, áperi nobis. At ille respóndens, ait: Amen dico vobis, néscio vos. Vigiláte ítaque, quia nescítis diem, néque horam.

   

Offertorium. Ps. 44, 10. Fíliæ regum in honóre tuo, ástitit regína a dextris tuis in vestítu deauráto, circúmdata varietáte. (T.P. Allelúja).

  

SECRETA

Sacrifícium nostrum tibi, Dómine, quǽsumus, beátæ Catharínæ Virginis precátio sancta concíliet, ut, cujus honore solémniter exhibétur, ejus méritis efficiátur accéptum. Per Dóminum.

   

Communio. Matth. 25, 4 et 6. Quinque prudéntes vírgines accepérunt óleum in vasis suis cum lampádibus: média autem nocte clamor factus est: Ecce sponsus venit: exíte óbviam Christo Dómino. (T.P. Allelúja).

   

POSTCOMMUNIO

Propitiáre, Dómine, fámulis tuis: ut qui sanctis mystériis ineffabíliter recreámur, exémplo beátæ Catharínæ conversatiónem nostram in cœlis habére studeámus. Per Dóminum.