MISA DE NUESTRA SEÑORA DEL PILAR

Del Misal Propio de España. La segunda Misa, propia del Reino de Aragón, fue extendida a toda la Hispanidad el 14 de Febrero de 1958.

  

Die 12 Octobris

In Apparitióne Beátæ Maríæ Vírginis in Colúmnæ

  

Introitus. Sedulius. Salve, sancta Parens, eníxa puérpera Regem: qui cœlum terrámque regit in sǽcula sæculórum. Ps. 44, 2. Eructávit cor meum verbum bonum: dico ego ópera mea Regi. ℣. Glória Patri. 

  

ORATIO

Omnípotens sempitérne Deus, qui per gloriosíssimam Filii tui Matrem cœléste præsídium nobis mirabíliter præparásti: concéde propítius; ut quam peculiári título de Colúmna pia devotióne venerámur auxílio. Per eúndem Dóminum.

   

Léctio libri Sapiéntiæ.

Eccli. 24, 14-16.

   

Ab inítio, et ante sǽcula creáta sum, et usque ad futúrum sǽculum non desínam: et in habitatióne sancta coram ipso minístravi. Et sic in Sión fírmata sum, et in civitáte sanctificáta simíliter réquievi, et in Jerúsalem potéstas mea. Et radícavi in pópulo honorificáto, et in parte Dei mei heréditas íllius, et in plenitúdine sanctórum deténtio mea.

  

Graduale. Benedícta et venerábilis es, Virgo María: quæ sine tactu pudóris invénta es Mater Salvatóris.

℣. Virgo, Dei Génitrix, quem totus non cápit orbis, in tua se clausit víscera factus homo.

  

Allelúja, allelúja. ℣. Post partum, Virgo, invioláta permansísti: Dei Génitrix, intercéde pro nobis. Allelúja.

✠ Sequéntia sancti Evangélii secúndum Lucam

Luc. 11, 27-28.

  

In illo témpore: Loquénte Jesu ad turbas, extóllens vocem quǽdam múlier de turba dixit illi: Beátus venter qui te portávit et úbera quæ suxísti. At ille dixit: Quinímmo beáti qui áudiunt verbum Dei et custódiunt illud.

  

Credo.

   

Offertorium. Luc. 1, 28 et 42. Ave, María, grátia plena; Dóminus tecum: benedícta tu in muliéribus, et benedíctus fructus ventris tui.

  

SECRETA

Tua Dómine, propitiatióne, et beátæ Maríæ semper Vírginis protectióne, ad perpétuam átque præséntem hæc oblátio nobis profíciat prosperitátem et pacem. Per Dóminum.

  

Præfatio de Beatæ Mariæ Virginem: Et te in Festivitáte.

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus:  Et te in Festivitáte Pilar beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et virginitátis glória permanénte, lumen ætérnum mundo effúdit, Jesum Christum Dóminum nostrum. Per quem Majestátem tuam láudant Ángeli, adórant Dominatiónes, tremunt Potestátes, Cœli, cœlorúmque Virtútes, ac beáta Séraphim, sócia exsultatióne concélebrant. Cum quibus et nostras voces, ut admítti júbeas deprecámur, súpplici confessióne dicéntes:
  

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

  

Communio. Beáta víscera Maríæ Vírginis, quæ portavérunt ætérni Patris Filium.

   

POSTCOMMUNIO

Sumptis, Dómine, salútis nostræ, subsídiis: da, quǽsumus, beátæ Maríæ semper Vírginis patrocíniis nos ubíque prótegi; in cujus veneratióne hæc tuæ obtúlimus majestáti. Per Dóminum.

  

***

Die 12 Octobris

In Conmemoratióne Beátæ Maríæ Vírginis de Colúmna, Patrónæ Hispanitátem

Altera Missa

  

Introitus. Exod. 13, 22. Colúmnam ducem habémus quæ númquam défuit per diem néque per noctem coram pópulo. (T.P. Allelúja, allelúja.) Ps. 98, 6-7. Invocábant Dóminum, et ipse exaudiébat eos: in colúmna nubis loquebátur ad eos. ℣. Glória Patri. 

  

ORATIO

Omnípotens sempitérne Deus, qui per gloriosíssimam Filii tui Matrem cœléste præsídium nobis mirabíliter præparásti: concéde propítius; ut quam peculiári título de Colúmna pia devotióne venerámur auxílio. Per eúndem Dóminum.

   

Léctio libri Sapiéntiæ.

Eccli. 24, 5-13.

   

Ego ex ore Altíssimi prodívi primogénita ante omnem creatúram. Ego feci in cœlis, ut orirétur lumen indefíciens, et sicut nébula texi om­nem terram. Ego in altíssimis habitávi, et thronus meus in colúmna nubis. Gyrum cœli circuívi sola, et profúndum abýssi penetrávi: in flúc­tibus maris ambulávi, et in omni terra steti, et in omni pópulo et in omni gente primátum hábui: et ómnium excelléntium et humílium corda virtúte calcávi: et in his ómnibus réquiem quæsívi, et in hereditáte Dómini morábor. Tunc præcépit et dixit mihi Creátor ómnium: et qui creávit me requiévit in tabernáculo meo, et dixit mihi: In Jacob inhábita, et in Ísraël hereditáre, et in eléctis meis mitte radíces.

  

Graduale. Ps. 26, 6. In petra exaltávit me: et nunc exaltávit caput meum super inimícos meos.

℣. Ps. 39, 7. Státuit super petram pedes meos: et diréxit gressus meos.

  

Allelúja, allelúja. ℣. Exod. 17, 9. En ego stabo ibi coram te super petram. Allelúja.

  

Post Septuagesimam, omissis Allelúja et Versu sequenti, dicitur:

Tractus. Prov. 9, 1. Sapiéntia ædificávit sibi domum, excídit colúmnas septem.

℣. Ps. 86, 1-2. Fundaménta ejus in móntibus sanctis.

℣. Díligit Dóminus portas Sion super ómnia tabernácula Jacob.

  

Tempore autem Paschali, omittitur Graduale et ejus loco, dicitur:

Allelúja, allelúja.

℣. Gen. 28, 22. Lapis iste, quem eréxi in títulum, vocábitur domus Dei. Allelúja.

℣. Ps. 83, 2-3. Quam dilécta tabernácula tua Dómine virtútum: concupíscit, et déficit ánima mea in átria Dómini. Allelúja.

✠ Sequéntia sancti Evangélii secúndum Lucam

Luc. 11, 27-28.

  

In illo témpore: Loquénte Jesu ad turbas, extóllens vocem quǽdam múlier de turba dixit illi: Beátus venter qui te portávit et úbera quæ suxísti. At ille dixit: Quinímmo beáti qui áudiunt verbum Dei et custódiunt illud.

  

Credo.

   

Offertorium. Eccli. 45, 14. Coróna áurea super caput ejus, expréssa signo sanctitátis et glória honóris: opus virtútis, et desidéria oculórum. (T.P. Allelúja.) 

  

SECRETA

Deus, qui protegénte Genitríce Fílii tui, fídei lumen nobis splendéscere fecísti; præsta, quǽsumus: ejus méritis et précibus, in eádem fide stábiles inveniámur, et in caritáte fervéntes. Per eúmdem Dóminum.

  

Præfatio de Beatæ Mariæ Virginem: Et te in Festivitáte.

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus:  Et te in Festivitáte Pilar beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et virginitátis glória permanénte, lumen ætérnum mundo effúdit, Jesum Christum Dóminum nostrum. Per quem Majestátem tuam láudant Ángeli, adórant Dominatiónes, tremunt Potestátes, Cœli, cœlorúmque Virtútes, ac beáta Séraphim, sócia exsultatióne concélebrant. Cum quibus et nostras voces, ut admítti júbeas deprecámur, súpplici confessióne dicéntes:
  

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

  

Communio. Isa. 22, 16. Excidísti in excélso memoriále diligénter, in petra tabernáculum tibi. (T.P. Allelúja).

   

POSTCOMMUNIO

Cœléstibus pasti delíciis, te súpplices deprecámur, Dómine Deus noster; ut beatissímæ Genetrícis Fílii tui título de Colúmna solemnitátem celebrántes, ipsa intercedénte, ad gáudia ætérna felíciter perveníre valeámus. Per eúmdem Dóminum.