S. Bernardini Realini Confessoris Soc. Jesu.
Duplex
Introitus. Eccli. 45, 1-2 et 4. Diléctus Deo et homínibus, cujus memória in benedictióne est. Símilem illum fecit in glória sanctórum. In fide et lenitáte ipsíus sanctum fecit illum. Ps. 99, 1. Jubiláte Deo, omnis terra: servíte Dómino in lætítia: introíte in conspéctu ejus, in exsultatióne. ℣. Glória Patri.
ORATIO
Largíre nobis, Dómine, beáto Bernardíno intercedénte, spíritum demissiónis et caritátis: quo eum divínitus replétum benignitátis tuae minístrum exímium effecísti. Per Dóminum.
Léctio Epístolæ beáti Joánnis Apóstoli
1. Joann. 2, 1-6; 4, 10.
Filióli mei, hæc scribo vobis, ut non peccétis. Sed et si quis peccáverit, advocátum habémus apud Patrem, Jesum Christum justum: et ipse est propitiátio pro peccátis nostris: non pro nostris áutem tantum, sed étiam pro totíus mundi. Et in hoc scimus quóniam cognóvimus eum, si mandáta ejus observémus. Qui dicit se nosse eum, et mandáta ejus non custódit, mendax est, et in hoc véritas non est. Qui áutem servat verbum ejus, vere in hoc cáritas Dei perfécta est: et in hoc scimus quóniam in ipso sumus. Qui dicit se in ipso manére, debet sicut ille ambulávit, et ipse ambuláre. In hoc est cáritas; non quasi nos dilexérimus Deum, sed quóniam ipse prior diléxit nos, et misit Fílium suum propitiatiónem pro peccátis nostris.
Graduale. Ps. 118, 78. Fiat misericórdia tua ut consolétur me, secúndum elóquium tuum servo tuo.
℣. Ps. Ibid., 79. Véniant mihi miseratiónes tuae et vivam.
Allelúja, allelúja. ℣. Ps. Ibid., 88. Secúndum misericórdiam tuam vivífica me: et custódiam testimónia oris tui. Alleluja.
✠ Sequéntia sancti Evangélii secúndum Matthǽum.
Matth. 11, 25-30.
In illo témpore: Respóndens Jesus, dixit: Confíteor tibi, Pater, Dómine cœli et terræ, quia abscondísti hæc a sapiéntibus et prudéntibus, et revelásti ea párvulis. Ita, Pater: quóniam sic fuit plácitum ante te. Ómnia mihi trádita sunt a Patre meo. Et nemo novit Fílium nisi Pater: neque Patrem quis novit nisi Fílius, et cui volúerit Fílius reveláre. Veníte ad me, omnes, qui laborátis et oneráti estis, et ego refíciam vos. Tóllite jugum meum super vos, et díscite a me, quia mitis sum et húmilis corde: et inveniétis réquiem animábus vestris. Jugum enim meum suave est et onus meum leve.
Offertorium. Ps. 33, 9 et 19. Gustáte et vidéte, quóniam suávis est Dóminus: beátus vir, qui sperat in eo. Juxta est Dóminus iis qui tribuláto sunt corde, et húmiles spíritu salvábit, allelúja.
SECRETA
Múnera quæ tibi offérimus Dómine Deus beáti Bernardíni commemoratióne lætántes, a nobis, quǽsumus, benígne suscípere dignéris, sicut olim de mánibus ejus suscepísti. Per Dóminum nostrum Jesum Christum Filium tuum: qui tecum vivit et regnat in unitáte Spíritus Sancti, Deus, per ómnia sǽcula sæculórum. Amen.
Communio. Gal. 2, 20. Vivo ego, jam non ego: vivit vero in me Christus. In fide vivo Fílii Dei, qui diléxit me et trádidit semetúpsum pro me.
POSTCOMMUNIO
Mensæ tuæ participatióne refécti, Dómine Jesu Christe, te súpplices exorámus: ut beáti Bernardíni précibus et méritis, tecum caritáte conjúncti sine intermissióne maneámus: Qui vivis et regnas cum Deo Patre in unitáte Spíritus Sancti, Deus, per ómnia sǽcula sæculórum. Amen.
No hay comentarios:
Publicar un comentario
Los comentarios deberán relacionarse con el artículo. Los administradores se reservan el derecho de publicación, y renuncian a TODA responsabilidad civil, administrativa, penal y canónica por el contenido de los comentarios que no sean de su autoría. La blasfemia está estrictamente prohibida, y los insultos a la administración constituyen causal de no publicación.
Comentar aquí significa aceptar las condiciones anteriores. De lo contrario, ABSTENERSE.
+Jorge de la Compasión (Autor del blog)
Jorge Rondón Santos (Editor colaborador)