MISA DE LA VIGILIA DE LA VIRGEN DEL CARMEN

Del Misal Carmelita.

Introitus. Jer. 2, 7. Indúxi vos in terram Carméli, ut comedéritis fructum ejus, et óptima illíus. Ps. 132, 1. Ecce quam bonum, et quam jucúndum, habitáre fratres in unum. ℣. Glória Patri. 

ORATIO

Crescat, Dómine, semper in nobis sanctæ devotiónis afféctus, ut beatíssimæ Vírginis Maríæ, cujus solémnem Commemoratiónem prævenímus obséquio, méritis, et intercessiónibus commendémur. Per Dóminum.

Pro S. Henrico

ORATIO

Deus, qui hodiérna die beátum Henrícum Confessórem tuum e terréni cúlmine impérii ad regnum ætérnum transtulísti: te súpplices exorámus; ut, sicut illum, grátiæ tuæ ubertáte prævéntum, illécebras sǽculi superáre fecísti, ita nos fácias, ejus imitatióne, mundi hujus blandiménta vitáre, et ad te puris méntibus perveníre.

De Spiritu Sancto

ORATIO

Deus, qui corda fidélium Sancti Spíritus illustratióne docuísti: da nobis in eódem Spíritu recta sápere; et de ejus semper consolatióne gaudére. Per Dóminum nostrum Jesum Christum, Fílium tuum: qui tecum vivit et regnat in unitáte ejúsdem Spíritus Sancti Deus, per ómnia sǽcula sæculórum. Amen.

Lectio Isaíæ Prophétæ 

Is. 35, 1–7.

 

Hæc dicit Dóminus: Lætábitur desérta et ínvia, et exsultábit solitúdo, et florébit quási lílium. Gérminans germinábit, et exsultábit lætabúnda et láudans: glória Líbani data est ei: decor Carméli et Saron, ipsi vidébunt glóriam Dómini, et decórem Dei nostri. Confortáte manus dissolútas, et génua debília roboráte. Dícite pusillánimis: Confortámini, et nolíte timére: ecce, Deus vester ultiónem addúcet retributiónis: Deus ipse véniet, et salvábit vos. Tunc aperiéntur óculi cæcórum, et aures surdórum patébunt. Tunc sáliet sicut cervus cláudus, et apérta erit língua mutórum: quia scissæ sunt in desérto áquæ, et torréntes in solitúdine. Et quæ erat árida, erit in stagnum, et sítiens in fontes aquárum: ait Dóminus omnípotens.

  

Graduale. Ps. 90, 4-5. Scápulis suis obumbrábit tibi, et sub pennis ejus sperábis. Scuto circúmdabit te véritas ejus: non timébis a timóre noctúrno

℣. Num. 14, 13-14. Ut áudiant Ægýpti, de quórum médio eduxísti pópulum istum, et habitatóres terræ hujus, quod tu, Dómine, in pópulo isto sis. Nubes tua prótegat illos.

✠ Sequéntia sancti Evangélii secúndum Joánnem.

Joann. 19, 25-27.

  

In illo témpore: Stabant juxta Crucem Jesu Mater ejus, et soror Matris ejus, María Cléophæ, et María Magdaléne. Cum vidísset ergo Jesus Matrem, et discípulum stantem, quem diligébat, dicit Matri suæ: Múlier, ecce fílius tuus. Deínde dicit discípulo: Ecce Mater tua. Et ex illa hora accépit eam discípulus in sua. 

Offertorium. Ez. 16, 8. Expándi amíctum meum super te: et jurávi pactum tecum.

   

SECRETA

Súscipe, Dómine, sacrifícium placatiónis et láudis: quod nos, intercedénte beatíssima Vírgine Matre tua, cujus solémnem Commemoratiónem praevenímus; et perdúcat ad véniam, et in perpétua gratiárum constítuat actióne: Qui vivis et regnas cum Deo Patre in unitáte Spíritus Sancti Deus, per ómnia sǽcula sæculórum. Amen.

Pro S. Henrico

SECRETA

Láudis tibi, Dómine, hóstias immolámus in tuórum commemoratióne Sanctórum: quibus nos et præséntibus éxui malis confídimus et futúris.

   

De Spiritu Sancto

SECRETA

Múnera, quǽsumus, Dómine, obláta sanctífica: et corda nostra Sancti Spíritus illustratióne emúnda. Per Dóminum nostrum Jesum Christum, Fílium tuum: qui tecum vivit et regnat in unitáte eiúsdem Spíritus Sancti Deus, per ómnia sǽcula sæculórum. Amen.

 

Præfatio Communis.

Vere dignum et justum est, ǽquum et salutáre, nos tibi semper et ubíque grátias agere: Dómine sancte, Pater omnípotens, ætérne Deus: per Christum, Dóminum nostrum. Per quem majestátem tuam láudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quíbus et nostras voces ut admítti júbeas, deprecámur, súpplici confessione dicéntes: Sanctus…

  

Communio. Ez. 46, 1. Porta atri interióris, quæ réspicit ad oriéntem, erit cláusa sex diébus: die áutem sábbati aperiétur.

POSTCOMMUNIO

Quæ súmpsimus, Dómine, sacrosáncta mystéria: quǽsumus; ut, beatíssimæ Vírginis intercessióne, præséntem nibis misericórdiam cónferant, et æternam. Per Dóminum.

   

Pro S. Henrico

POSTCOMMUNIO

Refécti cibo potúque cœlésti, Deus noster, te súpplices exorámus: ut, in cujus hæc commemoratióne percépimus, ejus muniámur et précibus.

De Spiritu Sancto

POSTCOMMUNIO

Sancti Spíritus, Dómine, corda nostra mundet infúsio: et sui roris íntima aspersióne fecúndet. Per Dóminum nostrum Jesum Christum, Fílium tuum: qui tecum vivit et regnat in unitáte ejúsdem Spíritus Sancti Deus, per ómnia sǽcula sæculórum. Amen.