MISA DE LA VIGILIA DE SAN SANTIAGO APÓSTOL, PATRONO DE ESPAÑA

Del Misal Propio de España.

   

Die 24 Julii
IN VIGÍLIA SANCTI JACÓBI APÓSTOLI, HISPANIÁRUM PATRÓNI

   
Introitus. Matth. 4, 21. Procédens Dóminus juxta mare Galilǽæ, vidit duos fratres, Jacóbum Zebedǽi, et Joánnem fratrem ejus in navi cum Zebedǽo patre eórum, reficiéntes rétia sua: et vocávit eos. Ps. 18, 2. Cœli enárrant glóriam Dei: et ópera mánuum ejus annúntiat firmaméntum. ℣. Glória Patri.

  

ORATIO

Da, quǽsumus, omnípotens Deus: ut beáti Jacóbi Apóstoli tui, quam prævenímus, veneránda sollémnitas, et devotiónem nobis áugeat et salútem. Per Dóminum nostrum.

 
Et fit Commemoratio S. Christinæ Virginis et Martyris:
ORATIO

Indulgéntiam nobis, quǽsumus, Dómine, beáta Christína Virgo et Martyr implóret: quæ tibi grata semper éxstitit, et merito castitátis, et tuæ professióne virtútis.

Deinde, pro Sancta Maria:
ORATIO
Concéde nos fámulos tuos, quǽsumus, Dómine Deus, perpétua mentis et córporis, sanitáte gaudére: et, gloriósa beátæ Maríæ semper Vírginis intercessióne, a præsénti liberáti tristítia, et ætérna pérfrui lætítia. Per Dóminum.

  

Léctio libri Sapiéntiæ.
Eccli. 44, 25-27; 45, 2-4 et 6-9.

  

Benedíctio Dómini super caput justi. Ídeo dedit illi Dóminus hereditátem, et divísit illi partem in tríbubus duódecim: et invénit grátiam in conspéctu omnis carnis. Et magnificávit eum in timóre inimicórum, et in verbis suis monstra placávit. Glorificávit illum in conspéctu regum, et jussit illi coram pópulo suo, et osténdit illi glóriam suam. In fide et lenitáte ipsíus sanctum fecit illum, et elégit eum ex omni carne. Et dedit illi coram præcépta, et legem vitæ et disciplínæ: et excélsum fecit illum. Státuit ei testaméntum ætérnum, et circumcínxit eum zona justítiæ, et índuit eum Dóminus corónam glóriæ.

Graduale. Ps. 138, 17-18. Nimis honoráti sunt amíci tui, Deus: nimis confortátus est principátus eórum.

℣. Dinumerábo eos, et super arénam multiplicabúntur.

  

✠ Sequéntia sancti Evangélii secúndum Marcum.

Marc. 3, 13-20.

   

In illo témpore: Ascéndens Jesus in montem, vocávit ad se quos vóluit ipse: et venérunt ad eum. Et fecit ut essent duódecim cum illo: et ut mítteret eos prædicáre. Et dedit illis potestátem curándi infirmitátes et ejiciéndi dæmónia. Et impósuit Simóni nomen Petrus: et Jacóbum Zebedǽi, et Joánnem fratrem Jacóbi, et impósuit eis nómina Boanérges, quod est, Fílii tonítrui: et Andrǽam, et Philíppum, et Bartholomǽum, et Matthǽum, et Thomam, et Jacóbum Alphǽi, et Thaddǽum, et Simónem Cananǽum, et Judas Iscariótem, qui et tradídit illum. Et véniunt ad domum: et convénit íterum turba, ita ut non possent neque panem manducáre. Credo.

Offertorium. Ps. 8, 6-7. Glória et honóre coronásti eum: et constituísti eum super ópera mánuum tuárum, Dómine.
  

SECRETA

Apostólici reveréntia cúlminis offeréntes tibi sacra mystéria, Dómine, quǽsumus: ut beáti Jacóbi Apóstoli tui suffrágiis, cujus natalícia prævénimus; plebs tua semper et sua vota deprómat, et desideráta percípiat. Per Dóminum.

  
Pro S. Christina.

SECRETA

Hóstias tibi, Dómine, beátæ Christínæ Vírginis et Martyris tuæ dicátas méritis, benígnus assúme: et ad perpétuum nobis tríbue proveníre subsídium.

  
De Sancta Maria.

SECRETA

Tua, Dómine, propitiatióne, et beátæ Maríæ semper Vírginis intercessióne, ad perpétuam atque præséntem hæc oblátio nobis profíciat prosperitátem et pacem. Per Dóminum.
  

Præfatio de Apostolis.

Vere dignum et justum est, ǽquum et salutáre: Te, Dómine, supplíciter exoráre, ut gregem tuum, Pastor ætérne, non déseras: sed per beátos Apóstolos tuos contínua protectióne custódias. Ut iísdem rectóribus gubernétur, quos óperis tui vicários eídem contulísti præésse pastóres. Et ídeo cum Ángelis et Archángelis, cum Thronis et Dominatiónibus cumque omni milítia cœléstis exércitus hymnum glóriæ tuæ cánimus, sine fine dicéntes:

   

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

  
Communio. Marc. 3, 17. Vocávit Dóminus Jacóbum Zebedǽi, et Joánnem fratrem Jacóbi, et impósuit eis nómina Boanérges, quod est, Fílii tonítrui.

 
POSTCOMMUNIO

Sancti Apóstoli tui Jacóbi, qusumus, Dómine, supplicatióne placátus: et véniam nobis tríbue, et remédia sempitérna concéde. Per Dóminum.

  
Pro S. Christina
POSTCOMMUNIO

Divíni númeris largitáte satiáti, quǽsumus, Dómine, Deus noster: ut, intercedénte beáta Christína Vírgine et Mártyre tua, in ejus semper participatióne vivámus.
  
De Sancta Maria.

POSTCOMMUNIO

Sumptis, Dómine, salútis nostræ subsídiis: da, quǽsumus, beátæ Maríæ semper Vírginis patrocíniis nos úbique prótegi; in cujus veneratióne hæc tuæ obtúlimus majestáti. Per Dóminum.

 
¶ Si hodie fuerit Sabbatum, ubi adest obligatio Chori, lecta post Tertiam extra Chorum Missa de Festo sine Commemoratione Vigiliæ, in Choro post Nonam dicitur Missa de ipsa Vigilia sine Commemoratione Festi, additis in Missa Vigilia: 2. Oratione de Sancta Maria Concéde, et 3. contra prosecutores Ecclesiæ; ac de Vigilia item legi possunt Missæ privatæ, cum 2. tamen Oratione de S. Apolinare, et 3. de S. Liborio Exáudi, ex Missa Sacerdótes tui, de Communi Confessoris Pontificis II loco.