Misa aprobada por la Sagrada Congregación de Ritos el 27 de Febrero de 1890 para la Sociedad de María y para Australia.
Die 28 Aprilis.
In festo S. Petri Aloisii Mariæ Chanel, Martyris.
Introitus. Isa. 66, 19. Mittam ex eis qui salváti fúerint ad gentes in mare, ad ínsulas longe, ad eos qui non audiérunt de me, et non vidérunt glóriam meam; et annuntiábunt glóriam meam géntibus. (T. P. Alleluja, alleluja). Ps. 96, 1. Dóminus regnávit, exsúltet terra, læténtur ínsulæ multæ. ℣. Glória Patri.
ORATIO
Deus, qui Beátum Petrum Alóisium Maríam, Mártyrem tuum,
ad prædicándum Evangélium mira mansuetúdine, flagránti charitáte, et invícta constántia decorásti: da nobis quǽsumus; ut ipsíus
vestígiis inhæréntes, fidem quam profitémur, úsque ad mortem teneámus. Per Dóminum.
Et in Missis privatis, fit Commemoratio S. Pauli a Cruce, Confessoris.
ORATIO
Dómine Jesu Christe, qui, ad mystérium Crucis prædicándum, sanctum Paulum singulári caritáte donásti, et per eum novam in Ecclésia famíliam floréscere voluísti: ipsíus nobis intercessióne concéde; ut, passiónem tuam júgiter recoléntes in terris, ejúsdem fructum cónsequi mereámur in cœlis.
Pro S. Vitalis Martyris.
ORATIO
Præsta, quǽsumus, omnípotens Deus: ut, qui beáti Vitális Mártyris tui natalítia cólimus, intercessióne ejus in tui nóminis amóre roborémur. Per Dóminum.
Léctio Epístolæ beáti Páuli Apóstoli ad Colossénses. Colos. 3, 12-17.
Fratres: Indúite vos sicut elécti Dei, sancti et dilécti, víscera misericórdiæ, benignitátem, humilitátem, modéstiam, patiéntiam: supportántes ínvicem et donántes vobismetípsis, si quis advérsus áliquem habet querélam: sicut et Dóminus donávit vobis, ita et vos. Super ómnia áutem hæc, caritátem habéte, quod est vínculum perfectiónis: et pax Christi exsúltet in córdibus vestris, in qua et vocáti estis in uno córpore: et grati estóte. Verbum Christi habítet in vobis abundánter in omni sapiéntia: docéntes et commonéntes vosmetípsos, psalmis, hymnis et cánticis spirituálibus, in grátia cantántes in córdibus vestris Deo. Omne quodcúmque fácitis in verbo aut in ópere, ómnia in nómine Dómini Jesu Christi, grátias agéntes Deo et Patri per Jesum Christum Dóminum nostrum.
Allelúja, allelúja.
℣. Ps. 20, 3. Desidérium ánimæ ejus tribuísti ei, Dómine, et voluntáte labiórum ejus non fraudásti eum. Allelúja.
℣. Isa. 24, 15-16. In ínsulis maris nomen Dómini Dei Ísraël; a fínibus terræ laudes audivímus, glóriam justi. Allelúja.
Extra Tempus Paschale, dicitur:
Graduale. Isa. 42, 10. Cantáte Dómino cánticum novum, laus ejus ab extrémis terræ: qui descénditis in mare et plenitúdo ejus; ínsulæ et habitatóres eárum.
℣. Ibid., 12. Ponent Dómino glóriam et láudes ejus in ínsulis nuntiábunt.
Allelúja, allelúja. ℣. Isa. 24, 15-16. In ínsulis maris nomen Dómini Dei Ísraël; a fínibus terræ laudes audivímus, glóriam justi. Allelúja.
✠ Sequéntia Sancti Evangélii secúndum Matthǽum.
Matth. 16, 24-27.
In illo témpore: Dixit Jesus discípulis suis: Si quis vult post me veníre, ábneget semetípsum, et tollat crucem suam, et sequátur me. Qui enim voluerit ánimam suam salvam fácere, perdet eam: qui áutem perdíderit ánimam suam propter me, invéniet eam. Quid enim prodest hómini, si mundum univérsum lucrétur, ánimæ vero suæ detriméntum patiátur? Aut quam dabit homo commutatiónem pro ánima sua? Fílius enim hóminis ventúrus est in glória Patris sui cum Ángelis suis, et tunc reddet unicuíque secúndum ópera ejus.
Offertorium. Isa. 52, 7. Quam pulchri pedes annuntiántis et prædicántis pacem: annuntiántis bonum, prædicántis salútem, dicéntis Sion, Regnábit Deus tuus. (T. P. Allelúja).
SECRETA
Hæc hóstia, Dómine, quam in Beáti Petri Alóisii Maríæ triúmpho deférimus, corda nostra tui amóris igne júgiter inflámmet; et ad promíssa perseverántibus prǽmia dispónat. Per Dóminum.
Commemoratio S. Pauli a Cruce, Confessoris.
SECRETA
Cœléstem nobis, Dómine, prǽbeant mystéria hæc passiónis et mortis tuæ fervórem: quo sanctus Paulus, ea offeréndo, corpus suum hóstiam vivéntem, sanctam tibíque placéntem exhíbuit.
Pro S. Vitalis Martyris.
SECRETA
Munéribus nostris, quǽsumus, Dómine, precibúsque suscéptis: et cœléstibus nos munda mystériis, et cleménter exáudi. Per Dóminum.
Communio. Ps. 20, 4. Prævenísti eum in benedictiónibus dulcédinis: posuísti in cápite ejus corónam de lápide pretióso. (T. P. Allelúja).
POSTCOMMUNIO
Angelórum pane nutríti et supérna dulcédine perfúsi, te, Dómine, supplíciter exorámus, ut Beáti Petri Alóisii Maríæ, Mártyris tui exémplo, discámus terréna cuncta despícere et amáre cœléstia. Per Dóminum.
Commemoratio S. Pauli a Cruce, Confessoris.
POSTCOMMUNIO
Súmpsimus, Dómine, divínum sacraméntum, imménsæ caritátis tuæ memoriále perpétuum: tríbue, quǽsumus; ut, sancti Pauli méritis et imitatióne, aquam de fóntibus tuis hauriámus in vitam ætérnam saliéntem, et tuam sacratíssimam passiónem córdibus nostris impréssam móribus et vita teneámus.
Pro S. Vitalis Martyris.
POSTCOMMUNIO
Da, quǽsumus, Dómine, Deus noster: ut, sicut tuórum commemoratióne Sanctórum temporáli gratulámur offício; ita perpétuo lætémur aspéctu. Per Dóminum.
No hay comentarios:
Publicar un comentario
Los comentarios deberán relacionarse con el artículo. Los administradores se reservan el derecho de publicación, y renuncian a TODA responsabilidad civil, administrativa, penal y canónica por el contenido de los comentarios que no sean de su autoría. La blasfemia está estrictamente prohibida, y los insultos a la administración constituyen causal de no publicación.
Comentar aquí significa aceptar las condiciones anteriores. De lo contrario, ABSTENERSE.
+Jorge de la Compasión (Autor del blog)
Jorge Rondón Santos (Editor colaborador)