MISA DE SAN JOSÉ ARTESANO, PATRONO DE LOS TRABAJADORES CATÓLICOS

Misa aprobada por Pío XII en 1956, luego de que el año anterior proclamara a San José como Patrono de los trabajadores Católicos. No obstante, a fin de resolver alguna objeción tipo «No se puede celebrar esta misa porque el 1 de Mayo es una efemérides comunista» (como algunos tradicionalistas razonan, cuando precisamente se instituyó para alejar a los trabajadores católicos de esa ideología, harto condenada por la Iglesia), se recomienda hacer también conmemoración de los Santos Apóstoles Felipe y Santiago el Menor, o emplearla como Misa votiva.

 

Die 1 Maji

SANCTE JOSEPH OPIFICIS, SPONSI BEATÆ MARIÆ VIRGINIS, CONFESSORIS
Duplex I. classis

Introitus. Sap. 10, 17. Sapiéntia réddidit iustis mercédem labórum suórum, et dedúxit illos in via mirábili, et fuit illis in velaménto díei et in luce stellárum per noctem. (T.P. Allelúja, allelúja.) Ps. 126, 1. Nisi Dóminus ædificáverit domum, in vanum labórant qui ædíficant eam. ℣. Glória Patri.

  
ORATIO
Rerum cónditor Deus, qui legem labóris humáno géneri statuísti: concéde propítius; ut, sancti Joseph exémplo et patrocínio, ópera perficiámus quæ prǽcipis, et prǽmia consequámur quæ promíttis. Per Dóminum.

Et fit Commemoratione Ss. Philippi et Jacobi Apostolórum.
ORATIO
Deus, qui nos ánnua Apostolórum tuórum Philíppi et Jacóbi sollemnitáte lætíficas: præsta, quǽsumus: ut, quorum gaudémus méritis, instruámur exémplis. Per Dóminum.

  

Léctio Epístolæ beáti Pauli Apóstoli ad Colossénses.

Col. 3, 14-15, 17, 23-24.

  

Fratres: Caritátem habéte, quod est vínculum perfectiónis, et pax Christi exsúltet in córdibus vestris, in qua et vocáti estis in uno córpore, et grati estóte. Omne quodcúmque fácitis in verbo aut in ópere, ómnia in nómine Dómini Jesu Christi, grátias agéntes Deo et Patri per ipsum. Quodcúmque fácitis, ex ánimo operámini sicut Dómino, et non homínibus, sciéntes quod a Dómino accipiétis retributiónem hereditátis. Dómino Christo servíte.

  

Allelúja, allelúja.

℣. De quacúmque tribulatióne clamáverint ad me, exáudiam eos, et ero protéctor eórum semper. Allelúja.
℣. Fac nos innócuam, Joseph, decúrrere vitam: sitque tuo semper tuta patrocínio. Allelúja.

In Missis votivis extra Tempus Paschale dicitur:
Graduale. Ps. 127, 1-2. Beátus quicúmque times Dóminum, qui ámbulas in viis ejus.
℣. Labórem mánuum tuárum manducábis et bene tibi erit.

Allelúja, allelúja. ℣. De quacúmque tribulatióne clamáverint ad me, exáudiam eos, et ero protéctor eórum semper. Allelúja.

Post Septuagesimam, omissis Allelúja et versu sequenti, dicitur:
Tractus. Ps. 111, 1-3. Beátus vir, qui timet Dóminum: in mandátis ejus cupit nimis.
℣. Potens in terra erit semen ejus: generátio rectórum benedicétur.
℣. Glória et divítiæ in domo ejus: et justítia ejus manet in sǽculum sǽculi.

  

✠ Sequéntia sancti Evangélii secúndum Matthǽum.

Matth. 13, 54-58. 

   

In illo témpore: Véniens Jesus in pátriam suam, docébat eos in synagógis eórum, ita ut miraréntur et dícerent: Unde huic sapiéntia hæc et virtútes? Nonne hic est fabri fílius? Nonne mater ejus dícitur María, et fratres eius Jacóbus et Joseph et Simon et Judas? Et soróres ejus nonne omnes apud nos sunt? Unde ergo huic ómnia ista? Et scandalizabántur in eo. Jesus autem dixit eis: Non est prophéta sine honóre nisi in pátria sua et in domo sua. Et non fecit ibi virtútes multas propter incredulitátem illórum.

  

Et dicitur Credo.

  

Offertorium. Ps. 89, 17. Bónitas Dómini Dei nostri sit super nos, et opus mánuum nostrárum secúnda nobis, et opus mánuum nostrárum secúnda. (T.P. Allelúja.)

  

SECRETA

Quas tibi, Dómine, de opéribus mánuum nostrárum offérimus hóstias, sancti Joseph interpósito suffrágio, pignus fácias nobis unitátis et pacis. Per Dóminum.

  
Commemoratio Ss. Philippi et Jacobi Apostolorum.
SECRETA
Múnera, Dómine, quæ pro Apostolórum tuórum Philippi et Jacóbi sollemnitáte deférimus, propítius súscipe: et mala ómnia, quæ meréraur, avérte. Per Dóminum.
   
Præfatio de S. Joseph Et te in Veneratióne.

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: Et te in Veneratióne beáti Joseph débitis magnificáre præcóniis, benedícere et prædicáre. Qui et vir justus, a te Deíparæ Vírgini Sponsus est datus: et fidélis servus ac prudens, super Famíliam tuam est constitútus: ut Unigénitum tuum, Sancti Spíritus obumbratióne concéptum, paterna vice custodíret, Jesum Christum, Dóminum nostrum. Per quem majestátem tuam laudant Angeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admítti júbeas, deprecámur, súpplici confessióne dicéntes:
  

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

  
Communio. Matth. 13, 54,55. Unde huic sapiéntia hæc et virtútes? Nonne hic est fabri fílius? Nonne mater ejus dícitur María? (T.P. Allelúja.)

  
POSTCOMMUNIO

Haec sancta quæ súmpsimus, Dómine: per intercessiónem beáti Joseph; et operatiónem nostram cómpleant, et prǽmia confírment. Per Dóminum nostrum.

Commemoratio Ss. Philippi et Jacobi Apostolirum.
POSTCOMMUNIO
Quǽsumus, Dómine, salutáribus repléti mystériis: ut, quorum sollémnia celebrámus, eórum oratiónibus adjuvémur. Per Dóminum.