MISA EN HONOR A SANTA CLARA DE ASÍS

Del Misal Romano de San Pío V -la Misa “Dilexísti” es la del Común de las Vírgenes-. La Misa Votiva, que cuenta con Prefacio propio, es del Misal Seráfico, donde es celebrada como Doble de 1ª clase con Octava.

  

Die 12 Augusti
Sancta Claræ Vírginis.
Duplex

  

Introitus. Ps. 44, 8. Dilexísti justítiam, et odísti iniquitátem: proptérea unxit te Deus, Deus tuus, óleo lætítiae præ consórtibus tuis. (T. P. Allelúja, allelúja.) Ps. ibid., 2. Eructávit cor meum verbum bonum: dico ego ópera mea Regi. ℣. Glória Patri.

 

ORATIO

Exáudi nos, Deus, salutáris noster: ut, sicut de beátæ Claræ Vírginis tuæ festivitáte gaudémus; ita piæ devotiónis erudiámur afféctu. Per Dóminum nostrum.

  

Léctio Epístolæ beáti Pauli Apóstoli ad Coríntios.

2. Cor. 10, 17-18; 11, 1-2.

  

Fratres: Qui gloriátur, in Dómino gloriétur. Non enim, qui seípsum comméndat, ille probátus est; sed quem Deus comméndat. Útinam sustinerétis módicum quid insipiéntiæ meæ, sed et supportáte me: ǽmulor enim vos Dei æmulatióne. Despóndi enim vos uni viro vírginem castam exhibére Christo.

 
Graduale. Ps. 44, 15. Spécie tua et pulchritúdine tua inténde, próspere procéde et regna.

℣. Propter veritátem et mansuetúdinem et justítiam: et dedúcet te mirabíliter déxtera tua.

 
Allelúja, allelúja. ℣. Ibid., 15 et 16. Adducántur Regi Vírgines post eam: próximæ ejus afferéntur tibi in lætítia. Allelúja

 
Post Septuagesimam, omissis Allelúja et Versu sequenti, dicitur:
Tractus. Ps. 44, 11 et 12. Audi, fília, et vide, et inclína aurem tuam: quia concupívit Rex spéciem tuam.

℣. Ibid., 13 et 10. Vultum tuum deprecabúntur omnes dívites plebis: fíliæ regum in honóre tuo.

℣. Ibid., 15-16. Adducéntur Regi Vírgines post eam: próximæ ejus afferéntur tibi.
℣. Afferéntur in lætítia et exsultatióne: adducántur in templum Regis.

   
Tempore autem Pascháli omittitur Graduale, et ejus loco dicitur:
Allelúja, allelúja.
℣. Ps. 44, 15 et 16. Adducéntur Regi Vírgines post eam: próximæ ejus afferéntur tibi in lætítia. Allelúja.

℣. Ibid., 5. Spécie tua et pulchritúdine tua inténde, próspere procéde et regna. Allelúja.

 

✠ Sequéntia sancti Evangélii secúndum Matthǽum.

Matth. 25, 1-13.

   

In illo témpore: Dixit Jesus discípulis suis parábolam hanc: Simile erit regnum cœlórum decem virgínibus: quæ, accipiéntes lámpades suas, exiérunt óbviam sponso et sponsæ. Quinque autem ex eis erant fátuæ, et quinque prudéntes: sed quinque fátuæ, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Horam autem faciénte sponso, dormitavérunt omnes et dormiérunt. Média autem nocte clamor factus est: Ecce, sponsus venit, exíte óbviam ei. Tunc surrexérunt omnes vírgines illæ, et ornavérunt lámpades suas. Fátuæ autem sapiéntibus dixérunt: Date nobis de óleo vestro: quia lámpades nostræ exstinguúntur. Respondérunt prudéntes, dicéntes: Ne forte non suffíciat nobis et vobis, ite pótius ad vendéntes, et émite vobis. Dum autem irent émere, venit sponsus: et quæ parátæ erant, intravérunt cum eo ad núptias, et clausa est jánua. Novíssime vero véniunt et réliquæ vírgines, dicéntes: Dómine, Dómine, apéri nobis. At ille respóndens, ait: Amen, dico vobis, néscio vos. Vigiláte ítaque, quia nescítis diem neque horam.
 

Offertorium. Ps. 44, 10. Fíliæ regum in honóre tuo, ástitit regína a dextris tuis in vestítu deauráto, circúmdata varietate. (T. P. Allelúja.)
  
SECRETA

Accépta tibi sit, Dómine, sacrátæ plebis oblátio pro tuórum honóre Sanctórum: quórum se méritis de tribulatióne percepísse cognóscit auxílium. Per Dóminum

  

Communio. Matth. 25, 4 et 6. Quinque prudéntes vírgines accepérunt óleum in vasis suis cum lampádibus: média autem nocte clamor factus est: Ecce, sponsus venit: exite óbviam Christo Dómino. (T. P. Allelúja.)

 
POSTCOMMUNIO

Satiásti, Dómine, famíliam tuam munéribus sacris: ejus, quǽsumus, semper interventióne nos réfove, cujus sollémnia celebrámus. Per Dóminum.
   

¶ Infrascriptæ Missæ de Sancta Clara, ex Proprium trium Ordinum Fratrum Minorum S. Francisci, dici possunt ut festivæ ubicumque, ad libitum sacerdotis, juxta rubricas. Similiter hujusmodi Missæ dici possunt etiam ut votivæ, nisi aliqua expresse excipiatur:

  

Die 12 Augusti
Sancta Claræ Vírginis, Ómnium Clarissárum Institutrícis.

Altera Missa

 

Introitus. Ps. 44, 11. Áudi, fília, et vide, et inclína áurem tuam, et oblivíscere pópulum tuum, et domum patris tui (T. P. Allelúja, allelúja.) Ps. Ibid, 2. Eructávit cor meum verbum bonum: dico ego ópera mea Regi. ℣. Glória Patri.

 

ORATIO

Fámulos tuos, quǽsumus Dómine, beátæ Vírginis tuæ Claræ votíva natalítia recenséntes, cœléstium gaudiórum sua fácias interventióne partícipes, et tui Unigéniti cohærédes: Qui tecum vivit et regnat in unitáte Spíritus Sancti Deus, per ómnia sǽcula sæculórum. Amen.
 
In die Octava dicitur sequens:

ORATIO

Deus, qui Ecclésiam tuam beátæ Vírginis Claræ miris illústras virtútum splendóribus et nova prole fœcúndas: concéde, propítius; ut per ejus vestígia gradiéntes, ætérnæ glóriæ claritátem cónsequi mereámur. Per Dóminum.

  

Léctio Libri Sapiéntiæ.

Cant. 2, 10-14.

  

En diléctus meus lóquitur mihi: Surge, própera amíca mea, colúmba mea, formósa mea, et veni. Jam enim hiems tránsiit, imber ábiit, et recéssit. Flores apparuérunt in terra nostra; tempus putatiónis advénit: vox túrturis audíta est in terra nostra: ficus protulit grossos suos: víneæ floréntes dedérunt odórem suum. Surge, amíca mea, speciósa mea, et veni: colúmba mea in foramínibus petræ, in cavérna macériæ, osténde mihi fáciem tuam, sonet vox tua in áuribus meis: vox enim tua dulcis, et fácies tua decóra.

 
Graduale. ℣. Ps. 44, 15 et 14. Adducéntur Regi Vírgines post eam: próximæ ejus afferéntur tibi.

℣. Afferéntur in lætítia, et exsultatióne: adducéntur in templum Regis.

 
Allelúja, allelúja. ℣. Judith 13, 22. Benedíxit te Dóminus in virtúte sua; quia per te ad níhilum redégit inimícos. Allelúja.

 
Post Septuagesimam, omissis Allelúja et Versu sequenti, dicitur:
Tractus. Ps. 44, 6, 8 et 11. Concupívit Rex decórem tuum, quóniam ipse est Dóminus Deus tuus.

℣. Áudi, fília, et vide, et inclína áurem tuam.

℣. Hæc est virgo sápiens, et una de número prudéntum.
℣. Judith 13, 22. Benedíxit te Dóminus in virtúte sua; quia per te ad níhilum redégit inimícos.

   
Tempore autem Pascháli omittitur Graduale, et ejus loco dicitur:
Allelúja, allelúja.
℣. Sap. 4, 19. O quam pulchra est casta generátio cum claritáte! Allelúja.

℣. Judith 13, 22. Benedíxit te Dóminus in virtúte sua; quia per te ad níhilum redégit inimícos. Allelúja.

 

✠ Sequéntia sancti Evangélii secúndum Matthǽum.

Matth. 25, 1-13.

   

In illo témpore: Dixit Jesus discípulis suis parábolam hanc: Simile erit regnum cœlórum decem virgínibus: quæ, accipiéntes lámpades suas, exiérunt óbviam sponso et sponsæ. Quinque autem ex eis erant fátuæ, et quinque prudéntes: sed quinque fátuæ, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Horam autem faciénte sponso, dormitavérunt omnes et dormiérunt. Média autem nocte clamor factus est: Ecce, sponsus venit, exíte óbviam ei. Tunc surrexérunt omnes vírgines illæ, et ornavérunt lámpades suas. Fátuæ autem sapiéntibus dixérunt: Date nobis de óleo vestro: quia lámpades nostræ exstinguúntur. Respondérunt prudéntes, dicéntes: Ne forte non suffíciat nobis et vobis, ite pótius ad vendéntes, et émite vobis. Dum autem irent émere, venit sponsus: et quæ parátæ erant, intravérunt cum eo ad núptias, et clausa est jánua. Novíssime vero véniunt et réliquæ vírgines, dicéntes: Dómine, Dómine, apéri nobis. At ille respóndens, ait: Amen, dico vobis, néscio vos. Vigiláte ítaque, quia nescítis diem neque horam.
  
Dicitur Credo, per totam Octavam.

 
Offertorium. Ps. 44, 14 et 15. Adducéntur Regi vírgines post eam: próximæ ejus afferéntur tibi in lætítia, et exsultatióne: adducéntur in templum Regi Dómino. (T. P. Allelúja.)
  
SECRETA

Obláta tibi, quǽsumus Dómine, dona sanctífica: quæ Majestáti tua accépta fácie beátæ Vírginis tuæ Claræ intercéssio veneránda. Per Dóminum.

  

Præfatio de Sancta Claræ

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus. Qui fámulam tuam Claram, per beátum Francíscum, stúdio vitæ sublimióris incénsam ad sanctæ Maríæ Vírginis aram Fílio tuo mýstice desponsásti: eámque ad Seráphicæ perfectiónis culmen evéctam, matrem plurimárum vírginum delegísti. Et ídeo cum Ángelis et Archángelis, cum Thronis et Dominatiónibus cumque omni milítia cœléstis exércitus hymnum glóriæ tuæ cánimus, sine fine dicéntes:

  

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

   

Communio. Ps. 88, 2. Misericórdias Dómini in ætérnum cantábo. (T. P. Allelúja.)

 
POSTCOMMUNIO

Protégant, quǽsumus Dómine, plebem tuam gloriósæ Vírginis tuae Claræ continuáta præsídia: et sumpta pro illíus glória Corpóris tui sacri, et pretiósi Sánguinis sacraménta: Qui vivis et regnas cum Deo Patre in unitáte Spíritus Sancti Deus, per ómnia sǽcula sæculórum. Amen.