MISA DE LOS SANTOS MÁRTIRES DE GORCUM

Del Misal propio de Bélgica. La Misa “Intret in conspéctu” es del Común de muchos Santos Mártires fuera del Tiempo Pascual, pero las oraciones son propias.

Die 9 Julii

In festo Sanctórum Mártyrum Gorcomiénsium

Duplex

   

Introitus. Ps. 78, 11, 12 et 10. Intret in conspéctu tuo, Dómine, gemitus compeditórum: redde vicínis nostris séptuplum in sinu eórum: víndica sánguinem Sanctórum tuórum, qui effúsus est. Ps. Ibid., 1. Deus, venérunt gentes in hereditátem tuam: polluérunt templum sanctum tuum: posuérunt Jerúsalem in pomórum custódiam. ℣. Glória Patri.

   

ORATIO

Deus, qui beatórum Mártyrum tuórum Nicolái, Leonárdi et Sociórum ejus, gloriósum pro fide tua certámen æternitátis láurea decorásti: concéde propítius; ut eórum méritis et imitatióne certantes in terris, cum ipsis coronári mereámur in cœlis. Per Dóminum.

Léctio libri Sapiéntiæ.

Sap. 3, 1-8.

   

Justorum ánimæ in manu Dei sunt, et non tanget illos torméntum mortis. Visi sunt óculis insipiéntium mori: et æstimáta est afflíctio éxitus illórum: et quod a nobis est iter, extermínium: illi áutem sunt in pace. Et si coram homínibus torménta passi sunt, spes illórum immortalitáte plena est. In páucis vexáti, in multis bene disponéntur: quóniam Deus tentávit eos, et invénit illos dignos se. Tamquam aurum in fornáce probávit illos, et quasi holocáusti hóstiam accépit illos, et in témpore erit respéctus illórum. Fulgébunt justi, et támquam scintíllæ in arundinéto discúrrent. Judicábunt natiónes, et dominabúntur pópulis, et regnábit Dóminus illórum in perpétuum.

  

Graduale. Exodi 15, 11. Gloriósus Deus in Sanctis suis: mirábilis in majestáte, fáciens prodígia. 

℣. Ibid., 6. Déxtera tua, Dómine, glorificáta est in virtúte: déxtera manus tua confrégit inimícos.

   

Allelúja, allelúja. ℣. Eccli. 44, 14. Córpora Sanctórum in pace sepúlta sunt, et nómina eórum vivent in generatiónem et generatiónem. Allelúja.

   

Post Septuagesimam, omissis Allelúja et Versu sequenti, dicitur:

Tractus. Ps. 125, 5-6. Qui séminant in lácrimis, in gáudio metent.

℣. Eúntes ibant et flébant, mitténtes sémina sua.

℣. Veniéntes autem vénient cum exsultatióne, portántes manípulos suos.

    

✠ Sequéntia sancti Evangélii secúndum Lucam.

Luc. 21, 9-19.

  

In illo témpore: Dixit Jesus discípulis suis:  Cum audiéritis prǿlia et seditiónes, nolíte terréri: opórtet primum hæc fíeri, sed nondum statim finis. Tunc dicébat illis: Surget gens contra gentem, et regnum advérsus regnum. Et terræmótus magni erunt per loca, et pestiléntiæ, et fames, terrorésque de cœlo, et signa magna erunt. Sed ante hæc ómnia injícient vobis manus suas, et persequéntur tradéntes in synagógas et custódias, trahéntes ad reges et prǽsides propter nomen meum: contínget áutem vobis in testimónium. Pónite ergo in córdibus vestris non præmeditári, quemádmodum respondeátis. Ego enim dabo vobis os et sapiéntiam, cui non potérunt resístere et contradícere omnes adversárii vestri. Tradémini áutem a paréntibus, et frátribus, et cognátis, et amícis, et morte affícient ex vobis: et éritis ódio ómnibus propter nomen meum: et capíllus de cápite vestro non períbit. In patiéntia vestra possidébitis ánimas vestras.

   

Post Septuagesimam in fine sequentis Offertorii Allelúja omíttitur.

  

Offertorium. Ps. 67, 36. Mirábilis Deus in Sanctis suis: Deus Ísraël, ipse dabit virtútem et fortitúdinem plebi suæ: benedíctus Deus, allelúja.

   

SECRETA

Múnera tibi, Dómine, nostræ devotiónis offérimus: quæ et pro tuórum tibi grata sint honóre justórum, et nobis salutária, te miseránte, reddántur. Per Dóminum.

   

Communio. Sap. 3, 4, 5 et 6. Et si coram homínibus torménta passi sunt, Deus tentávit eos: támquam aurum in fornáce probávit eos, et quási holocáusta accépit eos.

  

POSTCOMMUNIO

Præsta nobis, quǽsumus, Dómine, intercedéntibus beátis Martýribus Nicoláo, Leonárdo, et Sóciis ejus, ut quod ore contíngimus, pura mente capiámus. Per Dóminum.