MISA DE LA BEATA MARGARITA BOURGEOUYS

Misa aprobada para Canadá y la diócesis de Troyes (Francia). La Misa Dilexísti es del Común de las Vírgenes, pero la oración es propia.

Die 12 Januárii

In festo B. Margarítæ Bourgeoys, Vírginis

Semiduplex

Introitus. Ps. 44, 8. Dilexísti justítiam, et odísti iniquitátem: proptérea unxit te Deus, Deus tuus, óleo lætítiæ præ consórtibus tuis. (T. P. Allelúja, allelúja.) Ps. ibid., 2. Eructávit cor meum verbum bonum: dico ego ópera mea Regi. ℣. Glória Patri.

ORATIO

Deus, qui ad christiánam juventútis institutiónem beátam Margarítam elegísti, ac nova per eam família Ecclésiam tuam fœcundásti: præsta, quǽsumus; nos ejus exémplo et intercessióne, ita fácere et docére, ut prǽmia consequámur ætérna. Per Dóminum.

   

Léctio Epístolæ beáti Pauli Apóstoli ad Corínthios.

2. Cor. 10, 17-18; 11, 1-2.

   

Fratres: Qui gloriátur, in Dómino gloriétur. Non enim qui seípsum comméndat, ille probátus est: sed quem Deus comméndat. Útinam sustinerétis módicum quid insipiéntiæ meæ, sed et supportáte me: ǽmulor enim vos Dei æmulatióne. Despóndi enim vos uni viro vírginem castam exhibére Christo.

   

Graduale. Ps. 44, 5. Spécie tua, et pulchritúdine tua inténde, próspere procéde, et regna. 

℣. Propter veritátem, et mansuetúdinem, et justítiam: et dedúcet te mirabíliter déxtera tua.

   

Allelúja, allelúja. ℣. Ibid., 15 et 16. Adducéntur Regi vírgines post eam: próximæ ejus afferéntur tibi in lætítia. Allelúja.

   

Post Septuagesimam, omissis Allelúja et Versu sequenti, dicitur:

Tractus. Ps. 44, 11 et 12. Audi, fília, et vide, et inclína áurem tuam: quia concupívit Rex spéciem tuam.

℣. Ibid., 13 et 10. Vultum tuum deprecabúntur omnes dívites plebis: fíliæ regum in honóre tuo.

℣. Ibid., 15-16. Adducéntur Regi vírgines post eam: próximæ ejus afferéntur tibi.

℣. Afferéntur in lætítia, et exsultatióne: adducéntur in templum Regis.

   

Tempore autem Paschali omittitur Graduale, et ejus loco dicitur:

Allelúja, allelúja.

℣. Ps. 44, 15 et 16. Adducéntur Regi vírgines post eam: próximæ ejus afferéntur tibi in lætítia. Allelúja.

℣. Ibid., 5. Spécie tua, et pulchritúdine tua inténde, próspere procéde, et regna. Allelúja.

     

✠ Sequéntia sancti Evangélii secúndum Matthǽum.

Matth. 25, 1-13.

  

In illo témpore: Dixit Jesus discípulis suis parábolam hanc: Símile erit regnum cœlórum decem virgínibus: quæ accipiéntes lámpadas suas, exiérunt óbviam sponso et sponsæ. Quínque áutem ex eis erant fátuæ, et quínque prudéntes: sed quínque fátuæ, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Moram áutem faciénte sponso, dormitavérunt omnes, et dormiérunt. Média áutem nocte clamor factus est: Ecce sponsus venit, exíte óbviam ei. Tunc surrexérunt omnes vírgines illæ, et ornavérunt lámpades suas. Fátuæ áutem sapiéntibus dixérunt: Date nobis de óleo vestro: quia lámpades nostræ exstinguúntur. Respondérunt prudéntes, dicéntes: Ne forte non suffíciat nobis, et vobis, ite pótius ad vendéntes, et émite vobis. Dum áutem irent émere, venit sponsus: et quæ parátæ erant, intravérunt cum eo ad núptias, et clausa est jánua. Novíssime vero véniunt et réliquæ vírgines, dicéntes: Dómine, Dómine, áperi nobis. At ille respóndens, ait: Amen dico vobis, néscio vos. Vigiláte ítaque, quia nescítis diem, néque horam.

Offertorium. Ps. 44, 10. Fíliæ regum in honóre tuo, ástitit regína a dextris tuis in vestítu deauráto, circúmdata varietáte. (T. P. Allelúja.)

   

SECRETA

Accépta tibi sit, Dómine, sacrátæ plebis oblátio pro tuórum honóre Sanctórum: quórum se méritis de tribulatióne percepísse cognóscit auxílium. Per Dóminum.

   

Communio. Matth. 25, 4 et 6. Quínque prudéntes vírgines accepérunt óleum in vasis suis cum lampádibus: média autem nocte clamor factus est: Ecce sponsus venit: exíte óbviam Christo Dómino. (T. P. Allelúja.)

POSTCOMMUNIO

Satiásti, Dómine, famíliam tuam munéribus sacris: ejus, quǽsumus, semper interventióne nos réfove, cujus solémnia celebrámus. Per Dóminum.