MISA A NUESTRA SEÑORA, AUXILIO DE LOS AGONIZANTES

Del Misal Romano-Lugdunense de 1853 (Siguiendo las normas de Divíno Afflátu, la trasladamos para el Sábado antes de Todos los Santos; pero en caso de coincidir con la Vigilia, se traslada al 10 de Noviembre).

   

Sabbato ante Omnium Sanctorum

BEÁTÆ MARÍÆ VÍRGINIS, AUXÍLIUM AGONIZÁNTIUM

Duplex Majus

  
Introitus. Sedulius. Salve, sancta Parens, eníxa puérpera Regem: qui cœlum terrámque regit in sǽcula sæculórum. Ps. 44, 2. Eructávit cor meum verbum bonum: dico ego ópera mea Regi. ℣. Glória Patri.

 
Dicitur Glória in excélsis.
  

ORATIO
Deus, qui Unigénito tuo pendénti in Cruce pro animárum salúte Genitrícem Vírginem Maríam adésse voluísti: fac, ut nos in extrémo vitæ perículo constituísti ejus intercessióne adjuvémur, et ætérna prǽmia consequámur. Per eúmdem Dóminum.
  
Et fit Commemoratio feriæ.

 

Léctio libri Sapiéntiæ.
Eccli. 24, 14-16.

  

Ab inítio et ante sǽcula creáta sum, et usque ad futúrum sǽculum non désinam, et in habitatióne sancta coram ipso ministrávi. Et sic in Sion firmáta sum, et in civitáte sanctificáta simíliter requiévi, et in Jerúsalem potéstas mea. Et radicávi in pópulo honorificáto, et in parte Dei mei heréditas illíus, et in plenitúdine sanctórum deténtio mea.

 
Graduale. Benedícta et venerábilis es, Virgo María: quæ sine tactu pudóris invénia es Mater Salvatóris.

℣. Virgo, Dei Génetrix, quem totus non capit orbis, in tua se clausit víscera factus homo.

 
Allelúja, allelúja. ℣. Post partum, Virgo, invioláta permansísti: Dei Génetrix, intercéde pro nobis. Allelúja.

 

✠ Sequéntia sancti Evangélii secúndum Lucam.

Luc. 11, 27-28.

  

In illo témpore: Loquénte Jesu ad turbas, extóllens vocem quædam múlier de turba, dixit illi: Beátus venter, qui te portávit, et úbera, quæ suxísti. At ille dixit: Quinímmo beáti, qui áudiunt verbum Dei, et custódiunt illud. Credo.

 
Offertorium. Luc. 1, 28 et 42. Ave, María, grátia plena; Dóminus tecum: benedícta tu in muliéribus, et benedíctus fructus ventris tui.

 

SECRETA

Tua, Dómine, propitiatióne, et beátæ Maríæ Vírginis intercessióne, vivis ad médelam, mortuísque ad suffrágia oblátio hæc profíciat, usque ad ætérnam prosperitátem et pacem. Per Dóminum.
   
Et fit commemoratio feriæ.
  

Præfatio de Beatæ Mariæ Virginis

Vere dignum et justum est, ǽquum et salutáre, nos tibi semper et ubique grátias ágere: Dómine sancte, Pater omnípotens, ætérne Deus: Et te in Festivitáte beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et, virginitátis glória permanénte, lumen ætérnum mundo effúdit, Jesum Christum, Dóminum nostrum. Per quem majestátem tuam laudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admitti jubeas, deprecámur, súpplici confessióne dicéntes:

 

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

    

Communio. Beáta viscera Maríæ Vírginis, quæ portavérunt ætérni Patris Fílium, allelúja.

  

POSTCOMMUNIO

Sumptis, Dómine, salútis nostræ subsídiis: da, quǽsumus, beátæ Maríæ semper Vírginis suffrágiis vivos et mórtuos ubíque prótegi; in cujus veneratióne hæc tuæ obtúlimus majestáti. Per Dóminum.

Et fit commemoratio feriæ.