MISA DEL BIENAVENTURADO JUAN NEPOMUCENO NEUMANN

Misa aprobada por la Sagrada Congregación de Ritos para la Congregación del Santísimo Redentor. La Misa Státuit es del Común de Confesores Pontífices, pero las oraciones son propias.

  

Die 5 Januarii

In festo B. Joánni Nepomucéni Neumann C. Ss. R., Pontíficis et Confessóris.

Semiduplex

Introitus. Eccli. 45, 30. Státuit ei Dóminus testaméntum pacis, et príncipem fecit eum: ut sit illi sacerdótii dígnitas in ætérnum. (T. P. Allelúja, allelúja.) Ps. 131, 1. Meménto, Dómine, David: et omnis mansuetúdinis ejus. ℣. Glória Patri.

   

ORATIO

Deus, qui beátum Joánnem Confessórem tuum atque Pontíficem pastorálibus ministériis clarescére voluísti; concéde propítius: ut ejus mónita et exémpla sectántes, vitam consequámur ætérnam. Per Dóminum.

   

Léctio libri Sapiéntiæ.

Eccli. 44, 16-27; 45, 3-20.

   

Ecce sacérdos magnus, qui in diébus suis plácuit Deo, et invéntus est justus: et in témpore iracúndiæ factus est reconciliátio. Non est invéntus símilis illi, qui conservávit legem Excélsi. Ídeo jurejurándo fecit illum Dóminus créscere in plebem suam. Benedictiónem ómnium géntium dedit illi, et testaméntum suum confirmávit super caput ejus. Agnóvit eum in benedictiónibus suis: conservávit illi misericórdiam suam: et invenit grátiam coram óculis Dómini. Magnificávit eum in conspéctu regum: et dedit illi corónam glóriæ. Státuit illi testaméntum ætérnum, et dedit illi sacerdótium magnum: et beatificávit illum in glória. Fungi sacerdótio, et habére laudem in nómine ipsíus, et offérre illi incénsum dignum in odórem suavitátis.

  

Graduale. Eccli. 44, 16. Ecce sacérdos magnus, qui in diébus suis plácuit Deo.

℣. Ibid., 20. Non est invéntus símilis illi, qui conserváret legem Excélsi.

  

Allelúja, allelúja. ℣. Ps. 109, 4. Tu es sacérdos in ætérnum, secúndum órdinem Melchísedech. Allelúja.

   

Post Septuagesimam, omissis Allelúja et Versu sequenti, dicitur:

Tractus. Ps. 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicétur.

℣. Glória et divítiæ in domo ejus: et justítia ejus manet in sǽculum sǽculi.

Tempore autem Paschali omittitur Graduale, et ejus loco dicitur:

Allelúja, allelúja.

℣. Ps. 109, 4. Tu es sacérdos in ætérnum, secúndum órdinem Melchísedech. Allelúja.

℣. Hic est sacérdos, quem coronávit Dóminus. Allelúja. 

   

✠ Sequéntia sancti Evangélii secúndum Matthǽum.

Matth. 25, 14-23.

   

In illo témpore: Dixit Jesus discípulis suis parábolam hanc: Homo péregre proficíscens vocávit servos suos, et trádidit illis bona sua. Et uni dedit quínque talénta, álii áutem duo, álii vero unum, unicuíque secúndum própriam virtútem, et proféctus est statim. Ábiit áutem, qui quínque talénta accéperat, et operátus est in eis, et lucrátus est ália quínque. Simíliter et, qui duo accéperat, lucrátus est ália duo. Qui áutem unum accéperat, ábiens fodit in terram, et abscóndit pecúniam dómini sui. Post multum vero témporis venit dóminus servórum illórum, et pósuit ratiónem cum eis. Et accédens qui quínque talénta accéperat, óbtulit ália quínque talénta, dicens: Dómine, quínque talénta tradidísti mihi, ecce, ália quínque superlucrátus sum. Ait illi dóminus ejus: Euge, serve bone et fidélis, quía super pauca fuísti fidélis, super multa te constítuam: intra in gáudium dómini tui. Accéssit áutem et qui duo talénta accéperat, et ait: Dómine, duo talénta tradidísti mihi, ecce, ália duo lucrátus sum. Ait illi dóminus ejus: Euge, serve bone et fidélis, quía super pauca fuísti fidélis, super multa te constítuam: intra in gáudium dómini tui.

  

Offertorium. Ps. 88, 21-22. Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum. (T. P. Allelúja.) 

 

SECRETA

Hóstiam, quam tibi, Dómine, in honórem beáti Pontíficis Joánnis offérimus, propítius réspice: et ignem tui amóris, quo ipse flagrávit, in nobis accénde. Per Dóminum.

    

Communio. Luc. 12, 42. Fidélis servus et prudens, quem constítuit dóminus super famíliam suam: ut det illis in témpore trítici mensúram. (T. P. Allelúja.)

   

POSTCOMMUNIO

Pretioso Córpore et Sánguine dilécti Fílii tui, Dómine, recreáti, te súpplices exorámus; ut, beati Joánnis méritis, ipsum Pontíficem pastórum secúti in terris, ad páscua perveniámus ætérna. Qui tecum vivit et regnat in unitáte Spíritus Sancti, Deus, per ómnia sǽcula sæculórum. Amen.