MISA DE SAN MILLÁN DE LA COGOLLA

Del Misal Romano de San Pío V. La misa Os Justi es del Común de Abades, aunque con oración propia.

Die 12 Novembris

Sancti Æmiliáni Abbátis.

Duplex majus.

Introitus. Ps. 36, 30-31. Os justi meditábitur sapiéntiam, et lingua ejus loquétur judícium: lex Dei ejus in corde ipsíus (T.P. Allelúja, allelúja). Ps. ibid., 1. Noli æmulári in malignántibus: neque zeláveris faciéntes iniquitátem. ℣. Glória Patri.

  

ORATIO

Sancti Æmiliáni Abbátis mérita nos, Dómine, pretiósa tueántur: in quíbus tuæ majestátis ópera prædicántes, ab hóstibus mentis et córporis et præsens capiámus adjutórium et futúrum. Per Dóminum.

   

Commemoratio S. Martini, Papæ et Martyr.

ORATIO

Gregem tuum, Pastor ætérne, placátus inténde: et, per beátum Martínum Mártyrem tuum átque Summum Pontíficem, perpétua protectióne custódi; quem totíus Ecclésiæ præstitísti esse pastórem. Per Dóminum.

  

Léctio libri Sapiéntiæ.
Eccli. 45, 1-6.

 

Diléctus Deo et homínibus, cujus memória in benedictióne est. Símilem illum fecit in glória sanctórum, et magnificávit eum in timóre inimicórum, et in verbis suis monstra placávit. Gloríficávit illum in conspéctu regum, et jussit illi coram pópulo suo, et osténdit illi glóriam suam. In fide et lenitáte ipsíus sanctum fecit illum, et elégit eum; ex omni carne. Audívit enim eum et vocem ipsíus, et indúxit illum in nubem. Et dedit illi coram præcépta, et legem vitæ et disciplínæ

 
Graduale. Ps. 20, 4-5. Dómine, prævenísti eum in benedictiónibus dulcédinis: posuísti in cápite ejus corónam de lápide pretióso.

℣. Ibid., 3. Vitam pétiit a te, et tribuísti ei longitúdinem diérum in sǽculum sǽculi.

 
Allelúja, allelúja. ℣. Ps. 91, 13. Justus ut palma florébit: sicut cedrus Líbani multiplicábitur. Allelúja. 

   

¶ In Missis votivis post Septuagesimam, omissis Allelúja, et Versu sequenti, dicitur:

Graduale. Ps. 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicétur.

℣. Glória et divítiæ in domo ejus: et justítia ejus manet in sǽculum sǽculi.

Tempore autem Paschali omittitur Graduale, et ejus loco dicitur:

Allelúja, allelúja.

℣. Ps. 111, 1. Beátus vir, qui timet Dóminum: in mandátis ejus cupit nimis. Allelúja, allelúja. 

℣. Osee 14, 6. Justus germinábit sicut lílium: et florébit in ætérnum ante Dóminum. Allelúja.

     

✠ Sequéntia sancti Evangélii secúndum Matthǽum.
Matth. 19, 27-29.

  

In illo témpore: Dixit Petrus ad Jesum: Ecce, nos relíquimus ómnia, et secúti sumus te: quid ergo erit nobis? Jesus áutem dixit illis: Amen, dico vobis, quod vos, qui secúti estis me, in regeneratióne, cum séderit Fílius hóminis in sede majestátis suæ, sedébitis et vos super sedes duódecim, judicántes duódecim tribus Ísraël. Et omnis, qui relíquerit domum, vel fratres, aut soróres, aut patrem, aut matrem, aut uxórem, aut fílios, aut agros, propter nomen meum, céntuplum accípiet, et vitam ætérnam possidébit.

  

Offertorium. Ps. 2, 3 et 4. Desidérium ánimæ ejus tribuísti ei, Dómine, et voluntáte labiórum ejus non fraudásti eum: posuísti in cápite ejus corónam de lápide pretióso. (T.P. Allelúja.)

  

SECRETA

Sacris altáribus, Dómine, hóstias superpósitas sanctus Æmiliánus Abbas, quǽsumus, in salútem nobis proveníre depóscat. Per Dóminum.

  

Commemoratio S. Martini, Papæ et Martyr.

SECRETA

Oblátis munéribus, quǽsumus, Dómine, Ecclésiam tuam benígnus illúmina: ut, et gregis tui profíciat ubíque succéssus, et grati fiant nómini tuo, te gubernánte, pastóres. Per Dóminum.

    

Communio. Luc. 12, 42. Fidélis servus et prudens, quem constítuit dóminus super famíliam suam: ut det illis in témpore trítici mensúram. (T.P. Allelúja.)

POSTCOMMUNIO

Prótegat nos, Dómine, cum tui perceptióne sacraménti beátus Æmiliánus Abbas, pro nobis intercedéndo: ut et conversatiónis ejus experiámur insígnia, et intercessiónis percipiámus suffrágia. Per Dóminum.

  

Commemoratio S. Martini, Papæ et Martyr.

POSTCOMMUNIO

Refectióne sancta enutrítam gubérna, quǽsumus, Dómine, tuam placátus Ecclésiam: ut, poténti moderatióne dirécta, et increménta libertátis accípiat et in religiónis integritáte persístat. Per Dóminum.