MISA EN HONOR A SAN JOSÉ CAFASSO

Die 27 Junii

SANCTI JOSEPHI CAFASSO, CONFESSÓRIS

Semiduplex

Introitus. Dan. 12, 3. Qui docti fúerint fulgébunt sicut splendor firmaménti: et qui justítiam erúdiunt multos sicut stellæ in perpétuas æternitátes. Ps. 118, 1. Beáti immaculáti in via: qui ámbulant in lege Dómini. ℣. Glória Patri.

   

ORATIO

Deus, qui, ad plúrimos pro salúte animárum perferéndos labóres, sanctum Joséphum Confessórem tuum mirábili caritáte et invícta patiéntia decorásti: concéde propítius; ut, eius exémplis instrúcti et intercessiónibus adiúti, ætérnæ vitæ prǽmia consequamur. Per Dominum nostrum.

   

Léctio libri Sapiéntiæ.

Eccli. 7. 31-40.

  

In tota ánima tua time Dóminum, et sacerdótes illíus sanctífica. In omni virtúte tua dílige eum qui te fecit, et minístros ejus ne derelínquas. Honóra Deum ex tota ánima tua, et honorífica sacerdótes, et propúrga te cum bráchiis. Da illis partem, sicut mandátum est tibi, primitiárum et purgatiónis, et de negligéntia tua purga te cum paucis. Datum brachiórum tuórum, et sacrifícium sanctificatiónis ófferes Dómino, et inítia sanctórum. Et páuperi pórrige manum tuam, ut perficiátur propitiátio et benedíctio tua. Grátia dati in conspéctu omnis vivéntis, et mórtuo non prohíbeas grátiam. Non desis plorántibus in consolatióne, et cum lugéntibus ámbula. Non te pígeat visitáre infírmum: ex his enim in dilectióne firmáberis. In ómnibus opéribus tuis memoráre novíssima tua, et in ætérnum non peccábis.

   

Graduale. Ps. 23, 3-4. Quis ascéndet in montem Dómini, aut quis stabit in loco sancto ejus?

℣. Innocens mánibus et mundo corde qui non accépit in vano ánimam suam, nec jurávit in dolo próximo suo.

   

Allelúja, allelúja. ℣. Ps. 109, 4. Jurávit Dóminus, et non pœnitébit eum: Tu es sacérdos in ætérnum, secúndum órdinem Melchísedech. Allelúja.

   

¶ In missis votivis post Septuagesimam, ommisis Allelúja et versu sequenti, dicitur:

Tractus. Ps. 91, 13-14. Justus ut palma florébit: sicut cedrus Líbani multiplicábitur.

℣. Plantátus in domo Dómini: in átriis domus Dei nostri.

℣.  Ps. 111, 2 et 3. Potens in terra erit semen ejus: generátio rectórum benedicétur.

℣. Glória et divítiæ in domo ejus: et justítia ejus manet in sǽculum sǽculi.

    

Tempore Paschali omittitur Graduale, et ejus loco dicitur:

Allelúja, allelúja.

℣. Eccli. 45, 9. Amávit eum Dóminus, et ornávit eum: stolam glóriæ índuit eum. Allelúja.

℣. Osee 14, 6. Justus germinábit sicut lílium: et florébit in ætérnum ante Dóminum. Allelúja.

    

✠ Sequéntia sancti Evangélii secundum Matthǽum.

Matth. 25, 31-40.

   

In illo témpore: Dixit Jesus discípulis suis: Cum vénerit Fílius hóminis in maiestáte sua, et omnes Angeli cum eo, tunc sedébit super sedem maiestátis suæ: et congregabúntur ante eum omnes gentes, et separábit eos ab ínvicem, sicut pastor ségregat oves ab hædis: et státuet oves quidem a dextris suis, hædos autem a sinístris. Tunc dicet Rex his, qui a dextris ejus erunt: Veníte, benedícti Patris mei, possidéte parátum vobis regnum a constitutióne mundi. Esurívi enim, et dedístis mihi manducáre; sitívi, et dedístis mihi bíbere; hospes eram, et collegístis me; nudus, et cooperuístis me; infírmus, et visitástis me; in cárcere eram, et venístis ad me. Tunc respondébunt ei justi, dicéntes: Dómine, quando te vídimus esuriéntem, et pávimus te; sitiéntem, et dedimus tibi potum? quando autem te vídimus hóspitem, et collégimus te? aut nudum, et cooperúimus te? aut quando te vídimus infírmum, aut in cárcere, et vénimus ad te? Et respóndens Rex, dicet illis: Amen, dico vobis: quámdiu fecístis uni ex his frátribus meis mínimis, mihi fecístis.

   

Offertorium. Ps. 23, 3-4. Desidérium ánimæ ejus tribuísti ei, Dómine, et voluntáte labiórum ejus non fraudásti eum: posuísti in cápite ejus corónam de lápide pretióso.

   

SECRETA

Oblátum tibi munus, quǽsumus, Dómine, in odórem suavitátis ascéndat: et, intercedénte beáto Josépho Confessóre tuo, nos corpóre et mente puríficet. Per Dominum.

   

Communio. Joann. 12, 26. Qui mihi mínistrat, me sequátur: et ubi sum ego, illic et miníster meus erit.

   

POSTCOMMUNIO

Divinitátis tuæ, Dómine, sempitérna fruitióne satiémur: quam beátus Joséphus Conféssor tuus in sacro altáris mystério prægustábat. Per Dominum nostrum.