MISA DE NUESTRA SEÑORA DE FÁTIMA

Del Misal propio de Portugal.

  

Die 13 Maji

IN APPARITIÓNIS BEÁTÆ MARÍÆ VÍRGINIS DE FÁTIMA

Duplex.

  

Introitus. Hebr. 4, 16. Adeámus cum fidúcia ad thronum grátiæ, ut misericórdiam consequámur, et grátiam inveniámus in auxílio opportúno. Ps. 44, 2. Eructávit cor meum verbum bonum: dico ego ópera mea regi. ℣. Glória Patri.

  

ORATIO

Peccatórum nostrórum, Deus, multitúdine prævalénte, ad beátæ Maríæ Vírginis recurrímus singuláre suffrágium: ut, qui ejúsdem Cordis pietáte fovémur, tua misericórdia præveniénte, indulgéntiam delictórum consequámur. Per Dóminum.

 

Et, in Missis privatis tantum, fit Commemoratio S. Roberti Bellarmino, Episcopi, Confessoris et Ecclesiæ Doctoris.

ORATIO

Deus, qui ad errórum insídias repellándas et Apostólicæ Sedis jura propugnánda beátum Robértum Pontíficem tuum atque Doctórem mira eruditióne et virtúte decorásti; ejus méritis et intercessióne concéde, ut nos in veritátis amóre crescámus et errántium corda ad Ecclésiæ tuæ rédeant unitátem. Per Dóminum.

 

Léctio libri Sapiéntiæ

Eccli. 24, 23-31.

 

Ego quasi vitis fructificávi suavitátem odóris: et flores mei, fructus honóris et honestátis. Ego mater pulchræ dilectiónis, et timóris, et agnitiónis, et sanctæ spei. In me grátia omnis viæ et veritátis: in me omnis spes vitæ, et virtútis. Transíte ad me omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes sæculórum. Qui edunt me, adhuc esúrient: et qui bibunt me, adhuc sítient. Qui audit me, non confundétur: et qui operántur in me, non peccábunt. Qui elúcidant me, vitam ætérnam habébunt.

 

Graduale. Ps. 12, 6. Exsultábit cor meum in salutári tuo: cantábo Dómino, qui bona tríbuit mihi: et psallam nómini Dómini altíssimi.

℣. Ps. 44, 18. Mémores erunt nóminis tui in omni generatióne et generatiónem: proptérea pópuli confitebúntur tibi in ætérnum.

 

Allelúja, allelúja. ℣. Luc. 1, 46, 47. Magníficat ánima mea Dóminum: et exsultávit spíritus meus in Deo salutári meo. Allelúja.

 

In Missis votivis post Septuagesimam, omissis Allelúja et Versu sequenti, dicitur:

Tractus. Prov. 8, 32, 35. Nunc ergo, fílii, audíte me: Beáti qui custódiunt vias meas. Audíte disciplínam et estóte sapiéntes, et nolíte abjícere eam.

℣. Beátus homo qui audit me, et qui vígilat ad fores meas quotídie, et obsérvat ad postes óstii mei.

℣. Qui me invénerit, invéniet vitam, et háuriet salútem a Dómino.

 

Tempore autem Paschali omittitur Graduale, et ejus loco dicitur:

Allelúja, allelúja.

℣. Luc. 1, 46-47. Magníficat ánima mea Dóminum: et exsultávit spíritus meus in Deo salutári meo. Allelúja.
℣. Beátam me dicent omnes generatiónes, quia ancíllam húmilem respéxit Deus. Allelúja.

✠ Sequéntia sancti Evangélii secúndum Joánnem.

Joann. 19, 25-27.

  

In illo témpore: Stabant juxta crucem Jesu mater ejus, et soror matris ejus María Cléophæ, et María Magdaléne. Cum vidísset ergo Jesus matrem, et discípulum stantem, quem diligébat, dicit matri suæ: Múlier, ecce fílius tuus. Deinde dicit discípulo: Ecce mater tua. Et ex illa hora accépit eam discípulus in sua.

  

Credo.

  

Offertorium. Luc. 1, 46, 49. Exsultávit spíritus meus in Deo salutári meo; quia fecit mihi magna qui potens est, et sanctum nomen ejus.

 

SECRETA

Convérte, Dómine, quǽsumus, nostras rebélles voluntátes et tríbue: ut, auxiliánte beatíssima Vírgine María, divína mystéria castis jucunditátibus celebrémus. Per Dóminum.

Commemoratio S. Roberti Bellarmino, Episcopi, Confessoris et Ecclesiæ Doctoris.

SECRETA

Hóstias tibi, Dómine, in odórem suavitátis offérimus; et præsta, ut beáti Robérti mónitis et exémplis edócti, per sémitas mandatórum tuórum dilatáto corde currámus. Per Dóminum nostrum.

  

Præfatio de Beatæ Mariæ Virginem: Et te in Festivitáte.

Vere dignum et justum est, ǽquum et salutáre, nos tibi semper et ubique grátias ágere: Dómine sancte, Pater omnípotens, ætérne Deus:  Et te in Festivitáte beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et virginitátis glória permanénte, lumen ætérnum mundo effúdit, Jesum Christum Dóminum nostrum. Per quem Majestátem tuam láudant Ángeli, adórant Dominatiónes, tremunt Potestátes, Cœli, cœlorúmque Virtútes, ac beáta Séraphim, sócia exsultatióne concélebrant. Cum quibus et nostras voces, ut admítti júbeas deprecámur, súpplici confessióne dicéntes:
  

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

Communio. Joann. 19, 27. Dixit Jesus matri suæ: Múlier, ecce fílius tuus: deinde dixit discípulo: Ecce mater tua. Et ex illa hora accépit eam discípulus in sua.

POSTCOMMUNIO

Porrígere, quæsumus, Dómine, déxteram tua pópulo deprecánti, et cui tríbuis supplicándi benígnus afféctum, intercedénte Vírgine María, præbe palcátus auxílium, ut cuncta mala déclinet et ómnia bona apprehéndat. Per Dóminum.

Commemoratio S. Roberti Bellarmino, Episcopi, Confessoris et Ecclesiæ Doctoris.

POSTCOMMUNIO

Sacraménta, quæ súmpsimus, Dómine, Deus noster, in nobis fóveant caritátis ardórem: quo beátus Robértus veheménter accénsus, pro Ecclésia tua se júgiter impendébat. Per Dóminum.