MISA DEL BEATO BUENAVENTURA DE POTENZA

Del Misal Romano-Seráfico. La Misa Os justi es de los Confesores no pontífices, mas las oraciones son propias.

26 Octobris

B. BONAVENTÚRÆ A POTÉNZA, CONF. 1. ORD.

Duplex

Introitus. Ps. 36, 30-31. Os justi meditábitur sapiéntiam, et língua ejus loquétur judícium: lex Dei ejus in corde ipsíus. Ps. ibid., 1. Noli æmulári in malignántibus: néque zeláveris faciéntes iniquitátem. ℣. Glória Patri.

 

ORATIO

Deus, qui in beáto Bonaventúra Confessóre tuo exímium obœdiéntiæ exémplum constitúere dignátus es: præsta, quǽsumus; ut ejus imitatióne voluntatem nostram abnegántes, mandátis tuis perpétuo inhærére valeamus. Per Dóminum. 

   

Et fit Commemoratio S. Evaristi Papæ et Mart. 

ORATIO 

Infirmitátem nostram réspice, omnípotens Deus: et, quia pondus própriæ actiónis gravat, beáti Evarísti Mártyris tui átque Pontíficis intercéssio gloriósa nos prótegat. Per Dóminum. 

  

Léctio libri Sapiéntiæ.
Eccli. 24, 14-16.

Beátus vir, qui invéntus est sine mácula, et qui post áurum non ábiit, nec sperávit in pecúnia et thesáuris. Quis est hic, et laudábimus eum? fecit enim mirabília in vita sua. Qui probátus est in illo et perféctus est, erit illi glória ætérna: qui pótuit tránsgredi, et non est transgréssus; fácere mala, et non fecit: ídeo stabilita sunt bona illius in Dómino, et eleemosýnas illíus enarrábit omnis ecclésia sanctórum.

 

Graduale. Ps. 91, 13 et 14. Justus ut palma florébit: sicut cedrus Líbani multiplicábitur in domo Dómini.

℣. Ibid., 3. Ad annuntiándum mane misericórdiam tuam, et veritátem tuam per noctem.

 

Allelúja, allelúja. ℣. Jac. 1, 12. Beátus vir, qui suffert tentatiónem: quóniam, cum probátus fúerit, accípiet corónam vitæ. Allelúja.

Post Septuagesimam, omissis Allelúja, et Versu sequenti, dicitur:

Tractus. Ps. 111, 1-3. Beátus vir qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicétur.

℣. Glória et divítiæ in domo ejus: et justítia ejus manet in sǽculum sǽculi.

Tempore autem Paschali omittitur Graduate, et ejus loco dicitur:

Allelúja, allelúja.

℣. Jac. 1, 12. Beátus vir, qui suffert tentatiónem: quóniam, cum probátus fúerit, accípiet corónam vitæ. Allelúja.

℣. Eccli. 45, 9. Amávit eum Dóminus, et ornávit eum: stolam glorire índuit eum. Allelúja.

 

✠ Sequéntia sancti Evangélii secúndum Lucam.

Luc. 12, 35-40.

  

In illo témpore: Dixit Jesus discípulis suis: Sint lumbi vestri præcíncti, et lucérnæ ardéntes in mánibus vestris, et vos símiles homínibus exspectántibus dóminum suum, quándo revertátur a núptiis: ut, cum vénerit et pulsáverit, conféstim apériant ei. Beáti servi illi, quos, cum vénerit dóminus, invénerit vigilántes: amen dico vobis, quod præcínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc áutem scitóte, quóniam si sciret paterfamílias qua hora fur veníret, vigiláret útique, et non síneret pérfodi domum suam. Et vos estóte paráti, quía, qua hora non putátis, Fílius hóminis véniet.

Offertorium. Ps. 88, 25. Véritas mea et misericordia mea cum ipso, et in nomine meo exaltabitur cornu ejus.

SECRETA

Láudis tibi, Dómine, hostias immolámus in tuórum commemoratióne Sanctórum: quíbus nos et præséntibus éxui malis confídimus et futúris. Per Dóminum. 

  

Pro S. Evaristo

SECRETA

Hóstias tibi, Dómine, beáti Evarísti Mártyris tui átque Pontíficis dicátas méritis, benígnus assúme: et ad perpétuum nobis tríbue proveníre subsídium. Per Dóminum.

Communio. Matth. 24, 46-47. Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum. 

   

POSTCOMMUNIO

Refécti cibo potúque cœlésti, Deus noster, te súpplices exorámus: ut, in cujus hæc commemoratiíne percépimus, ejus muniámur et precibus. Per Dóminum. 

   

Pro S. Evaristo

POSTCOMMUNIO 

Refécti participatióne múneris sacri, quǽsumus, Dómine Deus noster: ut, cujus exséquimur cultum, intercedénte beáto Evarísto Mártyre tuo átque Pontífice, sentiámus efféctum. Per Dóminum.

MISA DE SAN GERARDO MARÍA DE MAYELA

Misa propia de la Congregación del Santísimo Redentor.

Die 16 Octobris

S. GERARDI MAJELLA Confessoris

Duplex 2. Classis.

  

Introitus. Gal. 2, 19-20. Christo confíxus sum Cruci: vivo áutem, jam non ego: vivit vero in me Christus. Ps. 41, 1. Quemádmodum desíderat cerva rivos aquárum, ita desíderat ánima mea te, Deus. V. Glória Patri.

ORATIO

Deus, qui beátum Gerárdum a juventúte sua ad Te attráhere, et imágini Fílii Tui Crucifíxi confórmem fíeri voluísti: tríbue, quǽsumus, ut ejus exémpla sectántes, in eámdem imáginem transformémur. Per eúmdem Dóminum.

  

Et fit commemoratio S. Hedwigis Viduæ:

ORATIO

Deus, qui beátam Hedwígem a sǽculi pompa ad húmilem tuæ Crucis sequélam toto corde transíre docuísti: concéde; ut ejus méritis et exémplo discámus peritúras mundi calcáre delícias, et in ampléxu tuæ Crucis ómnia nobis adversántia superáre: Qui vivis.

   

Léctio Epístolæ beáti Pauli Apóstoli ad Romános.

Rom. 8, 14-18, 28-30.

  

Fratres: Quicúmque Spíritu Dei agúntur, ii sunt fílii Dei. Non enim accepístis spíritum servitútis íterum in timóre, sed accepístis spíritum adoptiónis filiórum, in quo clamámus: Abba, Pater. Ipse enim Spíritus testimónium reddit spirítui nostro quod sumus filii Dei; si áutem filii, et herédes: herédes quídem Dei, coherédes áutem Christi, si tamen compátimur, ut et conglorificémur. Exístimo enim quod non sunt condígnæ passiónes hujus témporis ad futúram glóriam quæ revelábitur in nobis. Scimus áutem quóniam diligéntibus Deum ómnia cooperántur in bonum, iis qui secúndum propósitum vocáti sunt sancti. Nam quos præscívit, et prædestinávit confórmes fíeri imáginis Fílii sui, ut sit ipse primogénitus in multis frátribus. Quos áutem prædestinávit, hos et vocávit; et quos vocávit, hos et justificávit: quos áutem justificávit, illos et glorificávit.

  

Graduale. Coloss. 3, 3-4. Mórtui enim estis, et vita vestra est abscóndita cum Christo in Deo.

℣. Cum Christus apparúerit, vita vestra, tunc et vos apparébitis cum ipso in glória.

  

Allelúia, allelúia. ℣. Jac. 1, 9. Gloriétur frater húmilis in exaltatióne sua. Allelúja.

  

In Missis votivis post Septuagesimam, omissis Allelúja et versu sequenti, dicitur:

Tractus. Gal. 5, 24. Qui áutem sunt Christi, carnem suam crucifixérunt cum vítiis et concupiscéntiis.

℣. Coloss. 1, 24. Adímpleo ea, quæ desunt passiónum Christi, in carne mea.

℣. Philipp. 1, 20-21. Et nunc magnificábitur Christus in córpore meo, sive per vitam sive per mortem. Mihi enim vívere Christus est, et mori lucrum.

  

Tempore autem Paschali omittitur Graduale, et ejus loco dicitur:

Allelúja, allelúja.

℣. Jac. 1, 9. Gloriétur frater húmilis in exaltatióne sua. Allelúja.

℣. Phil. 3, 20-21. Salvatórem exspectámus Dóminum nostrum Jesum Christum, qui reformávit corpus humilitátis nostræ configurátum córpori claritátis suæ. Allelúja.

   

✠ Sequéntia sancti Evangélii secúndum Matthǽum.

Matth. 11, 25-30.

   

In illo témpore: Respóndens Jesus, dixit: Confíteor tibi, Pаter, Dómine cœli et terræ, quía abscondísti hæc a sapiéntibus et prudéntibus, et revelásti ea párvulis. Ita Pater: quóniam sic fuit plácitum ante te. Ómnia mihi trádita sunt a Patre meo. Et nemo novit Fílium, nisi Pater: néque Patrem quis novit, nisi Fílius, et cui volúerit Fílius reveláre. Veníte ad me, omnes qui laborátis et oneráti estis, et ego refíciam vos. Tóllite jugum meum super vos, et díscite a me, quía mitis sum et húmilis corde: et inveniétis réquiem animábus vestris. Jugum enim meum suáve est, et onus meum leve. 

  

Offertorium. Rom. 12, 1. Obsecro vos, fratres, per misericórdiam Dei, ut exhibeátis córpora vestra hóstiam vivéntem, sanctam, Deo placéntem.

SECRETA

Accénde, Dómine, corda nostra tuæ caritátis igne, quo fámulus tuus Gerárdus, dum Sacris áderat, æstuábat. Per Dóminum. 

  

Pro S. Hedwige.

SECRETA

Accépta tibi sit, Dómine, sacrátæ plebis oblátio pro tuórum honóre Sanctórum: quórum se méritis de tribulatióne percepísse cognóscit auxílium. Per Dóminum.

  

Communio. 1 Petr. 4, 13. Communicántes Christi passiónibus gaudéte, ut in revelatióne glóriæ ejus gaudeátis exsultántes.

POSTCOMMUNIO

Quod súmpsimus, Dómine, Sacraméntum, perpétuum nobis Tibi placéndi íngerat desidérium: beáti Gerárdi exémplo, voluntátem tuam júgiter éxsequi studeámus. Per Dóminum.

  

Pro S. Hedwige.

POSTCOMMUNIO

Satiásti, Dómine, famíliam tuam munéribus sacris: ejus, quǽsumus, semper interventióne nos réfove, cujus solémnia celebrámus. Per Dóminum.

MISA DE SAN ALEJANDRO MARÍA SAULI

Del Misal Romano de San Pío V. La misa Státuit es la primera de los Confesores Pontífices, pero la oración es propia.

  

Die 11 Octobris

In Festo S. Alexandri Sauli, Ep. Conf.

Dúplex

Introitus. Eccli. 45, 30. Státtuit ei Dóminus testaméntum pacis, et príncipem fecit eum: ut sit illi sacerdótii dígnitas in ætérnum. (T. P. Allelúja, allelúja.) Ps. 131, 1. Meménto, Dómine, David: et omnis mansuetúdinis ejus. ℣. Glória Patri.

ORATIO

Deus, qui in Ecclésia tua per beátum Alexándrum Confessórem tuum átque Pontíficem, reguláris disciplínæ et pastorális sollicitúdinis exémpla instauráre dignátus es: fac nos, quǽsumus, ita ejus inhærére vestígiis, ut ad ánimæ salútem júgiter inténti, gáudia cum ipso assequámur ætérna. Per Dóminum.

  

Léctio libri Sapiéntiæ.

Eccli. 44, 16-27; 45, 3-20.

Ecce sacérdos magnus, qui in diébus suis plácuit Deo, et invéntus est justus: et in témpore iracúndiæ factus est reconciliátio. Non est invéntus símilis illi, qui conservávit legem Excélsi. Ídeo jurejurándo fecit illum Dóminus créscere in plebem suam. Benedictiónem ómnium géntium dedit illi, et testaméntum suum confirmávit super caput ejus. Agnóvit eum in benedictiónibus suis: conservávit illi misericórdiam suam: et invénit grátiam coram óculis Dómini. Magnificávit eum in conspéctu regum: et dedit illi corónam glóriæ. Státuit illi testaméntum ætérnum, et dedit illi sacerdótium magnum: et beatificávit illum in glória. Fungi sacerdótio, et habére laudem in nómine ipsíus: et offérre illi incénsum dignum in odórem suavitátis.

  

Graduale. Eccli. 44, 16. Ecce sacérdos magnus, qui in diébus suis plácuit Deo.

℣. Ibid., 20. Non est invéntus símilis illi, qui conserváret legem Excélsi.

  

Allelúja, allelúja. ℣. Ps. 109, 4. Tu es sacérdos in ætérnum, secúndum órdinem Melchísedech. Allelúja.

Post Septuagesimam, omissis Allelúja et Versu sequenti, dicitur:

Tractus. Ps. 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicétur.

℣. Glória et divítiae in domo ejus: et justítia ejus manet in sǽculum sǽculi.

Tempore autem Paschali omittitur Graduale, et ejus loco dicitur:

Allelúja, allelúja.

℣. Ps. 109, 4. Tu es sacérdos in ætérnum, secúndum órdinem Melchísedech. Allelúja.

℣. Hic est sacérdos, quem coronávit Dóminus. Allelúja.

✠ Sequéntia sancti Evangélii secúndum Matthǽum.

Matth. 25, 14-23.

  

In illo témpore: Dixit Jesus discípulis suis parábolam hanc: Homo péregre proficíscens, vocávit servos suos, et trádidit illis bona sua. Et uni dedit quinque talénta, álii autem duo, álii vero unum, unicuíque secúndum própriam virtútem, et proféctus est statim. Ábiit áutem qui quínque talénta accéperat, et operátus est in eis, et lucrátus est ália quínque. Simíliter et qui duo accéperat, lucrátus est ália duo. Qui áutem unum accéperat, ábiens fodit in terram, et abscóndit pecúniam dómini sui. Post multum vero témporis venit dóminus servórum illórum, et pósuit ratiónem cum eis. Et accédens qui quínque talénta accéperat, óbtulit ália quínque talénta, dicens: Dómine, quínque talénta tradidísti mihi, ecce ália quínque superlucrátus sum. Ait illi dóminus ejus: Éuge serve bone et fidélis, quía super páuca fuísti fidélis, super multa te constítuam: intra in gáudium dómini tui. Accéssit áutem et qui duo talénta accéperat, et ait: Dómine, duo talénta tradidísti mihi, ecce ália duo lucrátus sum. Ait illi dóminus ejus: Éuge, serve bone et fidélis, quía super páuca fuísti fidélis, super multa te constítuam: intra in gáudium dómini tui.

Offertorium. Ps. 88, 21-22. Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum. (T. P. Allelúja.)

SECRETA

Sancti tui, quǽsumus, Dómine, nos ubíque lætíficent: ut, dum eórum mérita recólimus, patrocínia sentiámus. Per Dóminum.

Communio. Luc. 12, 42. Fidélis servus et prudens, quem constítuit dóminus super famíliam suam: ut det illis in témpore trítici mensúram. (T. P. Allelúja.)

POSTCOMMUNIO

Præsta, quǽsumus, omnípotens Deus: ut, de percéptis munéribus grátias exhibéntes, intercedénte beáto Alexándro Confessóre tuo átque Pontífice, benefícia potióra sumámus. Per Dóminum.

MISA DE SAN LUIS BELTRÁN

Misa tomada del Común de Confesores no pontífices, con oración propia. En Colombia, cuyo patrón principal es, cuenta con Misa propia y octava.

   

Die 9 Octobris

In festo S. Ludovíci Bertrándi OP, Confessóris.

Duplex majus.

Introitus. Ps. 36, 30-31. Os justi meditábitur sapiéntiam, et língua ejus loquétur judícium: lex Dei ejus in corde ipsíus. (T. P. Allelúja, allelúja). Ps. ibid., 1. Noli aemulári in malignántibus: neque zeláveris faciéntes iniquitátem. ℣. Glótia Patri. 

ORATIO

Deus, qui beátum Ludovícum confessórem tuum per córporis mortificatiónem, et fídei præcónium, sanctórum glóriæ coæquásti: præsta, ut quod fide profitémur, pietátis opéribus júgiter impleámus: Per eúmdem Dóminum.

Lectio libri Sapiéntiæ.

Eccli. 31, 8-11.

Beátus vir, qui invéntus est sine mácula, et qui post áurum non ábiit, nec sperávit in pecúnia et thesáuris. Quis est hic, et laudábimus eum? fecit enim mirabília in vita sua. Qui probátus est in illo, et perféctus est, erit illi glória ætérna: qui pótuit tránsgredi, et non est transgréssus: fácere mala, et non fecit: ídeo stabilíta sunt bona illíus in Dómino, et eleemósynas illíus enarrábit omnis ecclésia sanctórum.

Graduale. Ps. 91, 13 et 14. Justus ut palma florébit: sicut cedrus Líbani multiplicábitur in domo Dómini.

℣. Ibid., 3. Ad annuntiándum mane misericórdiam tuam, et veritátem tuam per noctem.

Allelúja, allelúja. ℣. Jac. 1, 12. Beátus vir, qui suffert tentatiónem: quóniam cum probátus fúerit, accípiet corónam vitæ. Allelúja.

Post Septuagesimam, omissis Allelúja et Versu sequenti, dicitur:

Tractus. Ps. 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicétur.

℣. Glória et divítiæ in domo ejus: et justítia ejus manet in sǽculum sǽculi.

Tempore autem Paschali omittitur Graduale, et ejus loco dicitur:

Allelúja, allelúja.

℣. Jac. 1, 12. Beátus vir, qui suffert tentatiónem: quóniam cum probátus fúerit, accípiet corónam vitæ. Allelúja.

℣. Eccli. 45, 9. Amávit eum Dóminus, et ornávit eum: stolam glóriæ índuit eum. Allelúja.

✠ Sequéntia sancti Evangélii secundum Lucam.

Luc. 12, 35-40.

   

In illo témpore: Dixit Jesus discípulis suis: Sint lumbi vestri præcíncti, et lucérnæ ardéntes in mánibus vestris, et vos símiles homínibus exspectántibus dóminum suum, quándo revertátur a núptiis: ut, cum vénerit et pulsáverit, conféstim apériant ei. Beáti servi illi, quos, cum vénerit dóminus, invénerit vigilántes: amen dico vobis, quod præcínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc áutem scitóte, quóniam si sc iret paterfamílias, qua hora fur veníret, vigiláret útique, et non síneret pérfodi domum suam. Et vos estóte paráti: quía qua hora non putátis, Fílius hóminis véniet.

  

Offertorium. Ps. 88, 25. Véritas mea, et misericórdia mea cum ipso: et in nómine meo exaltábitur cornu ejus. (T. P. Allelúja.)

   

SECRETA

Láudis tibi, Dómine, hóstias immolámus in tuórum commemoratióne Sanctórum: quibus nos et præséntibus éxui malis confídimus et futúris. Per Dóminum.

  

Communio. Matth. 24, 46-47. Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum. (T. P. Allelúja.)

   

POSTCOMMUNIO

Refécti, cibo potúque cœlésti, Deus noster, te súpplices exorámus: ut, in cujus hæc commemoratióne percépimus, ejus muniámur et précibus. Per Dóminum.

***

Die 9 Octobris

In festo S. Ludovíci Bertrándi OP, Confessóris, Patrónus Principális Colúmbiæ

Duplex 1. Classis cum Octava communi.

  

Introitus. Ps. 29, 12-13. Convertísti planctum meum in gáudium mihi: conscidísti saccum meum, et præcinxísti me lætítia: Dómine Deus meus in ætérnum confitébor tibi. Ps. ibid., 2. Exaltábo te, Dómine, quóniam suscepísti me: nec delectásti inimícos meos super me. ℣. Glória Patri. 

  

Dicitur Glória in excélsis.

ORATIO

Deus, qui beátum Ludovícum confessórem tuum per córporis mortificatiónem, et fídei præcónium, sanctórum glóriæ coæquásti: præsta, ut quod fide profitémur, pietátis opéribus júgiter impleámus: Per eúmdem Dóminum.

Lectio Epístolæ Beáti Pauli Apóstoli ad Romános.

Rom. 10, 10-18.

Fratres: Corde enim créditur ad justítiam: ore áutem conféssio fit ad salútem. Dicit enim Scriptúra: Omnis, qui credit in illum, non confundétur. Non enim est distínctio Judǽi et Græci: Nam idem Dóminus ómnium, dives in omnes, qui ínvocant illum. Omnis enim, quicúmque invocáverit nomen Dómini, salvus erit. Quómodo ergo invocábunt, in quem non credidérunt? Aut quómodo credent ei, quem non audiérunt? Quómodo áutem áudient sine prædicánte? Quómodo vero prædicábunt nisi mittántur? Sicut scriptum est: Quam speciósi pedes evangelizántium pacem, evangelizántium bona! Sed non omnes obédiunt Evangélio. Isaías enim dicit: Dómine, quis crédidit audítui nostro? Ergo fides ex audítu, audítus áutem per verbum Christi. Sed dico: Númquid non audiérunt? Et quídem in omnem terram exívit sonus eórum, et in fines orbis terræ verba eórum.

Graduale. Ps. 17, 45 et 50. Pópulus, quem non cognóvi, servivit mihi: in audítu auris obœdívit mihi.

℣. Ibid., 50. Proptérea confitébor tibi in pópulis Dómine: et nómini tuo psalmum dicam.

Allelúja, allelúja. ℣. Ps. 17, 2-3. Díligam te Dómine virtus mea: Dóminus firmaméntum meum, et refúgium meum, et liberátor meus: Deus meus adjútor meus, sperábo in eum. Allelúja.

In missis votivs post Septuagesimam, omissis Allelúja et Versu sequenti, dicitur:

Tractus. Eccli. 50, 6-8. Quási stella matutína in médio nébulæ, et quási luna plena in diébus suis.

℣. Et quási sol refúlgens, sic ille refúlsit in templo Dei.

℣. Quási arcus refúlgens inter nébulas glóriæ, et quási flos rosárum in diébus vernis.

   

Tempore autem Paschali omittitur Graduale, et ejus loco dicitur:

Allelúja, allelúja.

℣. Ps. 17, 2-3. Díligam te Dómine virtus mea: Dóminus firmaméntum meum, eí refúgium meum, et liberátor meus: Deus meus adjútor meus, sperábo in eum. Allelúja.

℣. Luc. 24, 46. Oportébat pati Christum, et resúrgere a mórtuis: et ita intráre in glóriam suam. Allelúja.

✠ Sequéntia sancti Evangélii secundum Marcum.

Marc. 16, 15-18.

   

In illo témpore: Dixit Jesus discípulis suis: Eúntes in mundum univérsum, prædicáte evangélium omni creatúræ. Qui credíderit, et baptizátus fúerit, salvus erit: Qui vero non credíderit, condemnábitur. Signa áutem eos, qui credíderint, hæc sequéntur: In nómine meo dæmónia ejícient: línguis loquéntur novis: serpéntes tollent: Et si mortíferum quid bíberint, non eis nocébit: Super ægros manus impónent, et bene habébunt. Credo.

  

Offertorium. Ps. 22, 4-5. Virga tua, et báculus tuus, ipsa me consoláta sunt: parásti in conspéctu meo mensam, advérsus eos, qui tríbulant me: impinguásti in óleo caput meum.

   

SECRETA

Sacrifícium hujus sacræ mensæ, a Rege regum Jesu Christo pro nobis parátæ, tibi Deus offérimus: et beáti Ludovíci suffragántibus méritis, nostrum inde subsídium et solámen hauríre concéde. Per eúmdem Dóminum.

  

Communio. Isa. 49, 6. Ecce dedi te in lucem géntium, ut sis salus mea usque ad extrémum terræ.

   

POSTCOMMUNIO

Præsta, quǽsumus, omnípotens et miséricors Deus, ut qui beáti Ludovíci mérita celebrámus; ejus étiam virtútes imitémur: et imitándo proficiámus; et proficiéndo ad cœléstia regna cum eo perveníre valeámus: Per Dóminum.

    

Quando per annum celebratur de S. Ludovico ex voto, vel devotione, omnia fiant ut supra, excepto Credo.

MISA DE SAN PEDRO CLAVER

Misa aprobada por la Sagrada Congregación de Ritos el 9 de Julio de 1888.

Die 9 Septembris.

S. Petri Claver, Confessóris.

Duplex (In Columbianæ ditionis, ac Societatis Jesu, Dúplex 2. Classis).

Introitus. Ps. 106, 9 et 10. Satiávit Dóminus ánimam inánem: sedéntes in ténebris et umbra mortis, vinctos in mendicitáte et ferro. Ps. ibid, 8. Confiteántur Dómino misericórdiæ ejus: et mirabília ejus fíliis hóminum. ℣. Glória Patri.

ORATIO

Deus, qui abréptos in servitútem Nigrítas, ad agnitiónem tui nóminis. vocatúrus, beátum Petrum mira in eis juvándis caritáte et patiéntia roborásti: ejus nobis intercessióne concéde; ut, quæ Jesu Christi sunt quæréntes, próximos ópere et veritáte diligámus.

Et fit Commemorationis S. Gorgonii martyris.

ORATIO

Sanctus tuus, Dómine, Gorgónius sua nos intercessióne lætíficet: et pia fáciat solemnitáte gaudére.

  

Pro octava Nativitatis B. Mariæ V.

ORATIO

Fámulis tuis, quǽsumus, Dómine, cœléstis grátiæ munus impertíre: ut, quibus beátæ Vírginis partus éxstitit salútis exórdium; Nativitátis ejus votíva sollémnitas pacis tríbuat increméntum. Per Dominum nostrum.

  

Léctio Isaíæ Prophétæ.

Isa. 58, 6-10.

  

Hæc dicit Dóminus: Dissólve colligatiónes impietátis, solve fascículos depriméntes, dimítte eos, qui confrácti sunt, líberos, et omne onus dirúmpe. Frange esuriénti panem tuum, et égenos vagósque induc in domum tuam: cum víderis nudum, óperi eum, et carnem tuam ne despéxeris. Tunc erúmpet quási mane lumen tuum, et sánitas tua cítius oriétur, et anteíbit fáciem tuam justítia tua, et glória Dómini cólliget te. Tune invocábis, et Dóminus exáudiet: clamábis, et dicet: Ecce adsum. Cum effúderis esuriénti ánimam tuam, et ánimam afflíctam repléveris, oriétur in ténebris lux tua, et ténebræ tuæ erunt sicut merídies.

 

Graduale. Ps. 71, 12-14. Liberábit páuperem a poténte, et páuperem cui non erat adjútor: parcet páuperi et ínopi, et ánimas páuperum salvas fáciet.

℣. Exusúris et iniquitáte rédimet ánimas eórum: et honorábile nomen eórum coram illo.

Allelúja, allelúja. Ps. 9, 33 et 35. Exsúrge, Dómine Deus, exaltétur manus tua; ne obliviscáris páuperum. Tibi derelíctus est páuper; órphano tu eris adjútor. Allelúja.

Post Septuagesimam, omissis Allelúja et Versu sequenti, dicitur.

Tractus. Isa. 61, 1. Misit me Dóminus ut medérer contrítis corde, et prædicárem captívis indulgéntiam.

℣. 1. Cor. 9, 22. Factus sum infírmis infírmus, ut infírmos lucrifácerem.

℣. Ómnibus ómnia factus sum, ut omnes fácerem salvos.

Tempore autem Paschali omittitur Graduale, et ejus loco dicitur:

Allelúja, allelúja.

℣. Ps. 123, 7. Ánima nostra, sicut passer, erépta est de láqueo venántium: láqueus contrítus est, et nos liberáti sumus. Allelúja.

℣. Ps. 84, 10. Prope timéntes Dóminum Deum salutáre ipsíus: ut inhábitet glória in terra nostra. Allelúja.

  

✠ Sequéntia sancti Evangélii secúndum Lucam.

Luc. 10, 29-37.

In illo témpore: Legisperítus quídam, volens justificáre seípsum, dixit ad Jesum: Et quis est meus próximus? Suscípiens áutem Jesus dixit: Homo quídam descendébat ab Jerúsalem in Jericho, et íncidit in latrónes, qui étiam despoliavérunt eum: et plagis impósitis abiérunt, semivívo relícto. Áccidit áutem ut sacérdos quídam descénderet éadem via: et viso illo præterívit. Simíliter et levíta, cum esset secus locum, et víderet eum, pertránsiit. Samaritánus áutem quídam iter fáciens, venit secus eum: et videns eum, misericórdia motus est. Et apprópians alligávit vúlnera ejus, infúndens óleum et vinum: et impónens ilium in juméntum suum, duxit in stábulum, et curam ejus egit. Et áltera die prótulit duos denários, et dedit stabulário, et ait: Curam illíus habe; et quodcúmque supererogáveris, ego cum redíero, reddam tibi. Quis horum trium vidétur tibi próximus fuísse illi, qui íncidit in latrónes? At ille dixit: Qui fecit misericórdiam in illum. Et ait illi Jesus: Vade, et tu fac simíliter.

Et dicitur Credo.

Offertorium. Job 29, 12-13 et 15-16. Eo quod liberássem páuperem vociferántem, et pupíllum, cui non esset adjútor, benedíctio peritúri super me veniébat, et cor víduæ consolátus sum: óculus fui cæco, et pes cláudo: pater eram páuperum.

SECRETA

Caritátis víctima, quam immolántes offérimus, sit nobis, Dómine, te miseránte, propitiábilis: et, beáti Petri précibus et méritis, ad obtinéndum patiéntiæ et caritátis augméntum, éfficax et salutáris. Per eúmdem Dóminum.

Commemoratio S. Gorgonii martyris.

SECRETA

Grata tibi sit, Dómine, nostræ servitútis oblátio:  pro qua sanctus Gorgónius Martyr intervéntor exsístat.

  

Pro octava Nativitatis B. Mariæ V.

SECRETA

Unigéniti tui, Dómine, nobis succúrrat humánitas:  ut, qui natus de Vírgine, matris integritátem non mínuit, sed sacrávit; in Nativitátis ejus solémniis, nostris nos piáculis éxuens, oblatiónem nostram tibi fáciat accéptam Jesus Christus, Dóminus noster: Qui tecum vivit et regnat in unitáte Spíritus Sancti Deus, per ómnia sǽcula sæculórum.

Præfatio de Beatæ Mariæ Virginis Et te in Festivitáte pro ratione Octavæ.

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: Et te in Festivitáte beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et, virginitátis glória permanénte, lumen ætérnum mundo effúdit, Jesum Christum, Dóminum nostrum. Per quem majestátem tuam laudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admitti jubeas, deprecámur, súpplici confessióne dicéntes:

 

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

  

Communio. Ezech. 34, 15-16. Ego pascam oves meas: et ego eas accubáre fáciam, dicit Dóminus Deus. Quod períerat requíram, et quod abjéctum erat redúcam, et quod confráctum fúerat alligábo et quod infírmum fúerat consolidábo.

POSTCOMMUNIO

Crescat in nobis, Dó­mine, tuæ pietátis efféctus salutáris: ut, cœlésti pábulo nutríti, ætérnæ vitæ corónam, beáto Petro intercedénte, felíciter assequámur. Per Dóminum.

Commemoratio S. Gorgonii martyris.

POSTCOMMUNIO

Famíliam tuam, Deus, suávitas ætérna contíngat et végetet: quæ in Mártyre tuo Gorgónio Christi, Fílii tui, bono júgiter odóre pascátur.

  

Pro octava Nativitatis B. Mariæ V.

POSTCOMMUNIO

Súmpsimus, Dómine, celebritátis ánnuæ votíva sacraménta: præsta, quǽsumus; ut et temporális vitæ nobis remédia prǽbeant et ætérnæ. Per Dóminum nostrum.

MISA DE SAN AGUSTÍN

Del Misal Romano de San Pío V. La Misa propia de la Orden de San Agustín cuenta con oraciones, lección, verso aleluyático, secuencia, prefacio y antífona de comunión propios.

  

Die 28 Augusti

S. Augustini, Ep., Conf. et Eccl. Doct.

Duplex

  

Introitus. Eccli. 15, 5. In médio Ecclésiæ apéruit os ejus: et implévit eum Dóminus spíritu sapiéntiæ et intelléctus: stolam glóriæ índuit eum. Ps. 91, 2. Bonum est confitéri Dómino: et psállere nómini tuo, Altíssime. ℣. Glória Patri.

   

ORATIO

Adésto supplicatiónibus nostris, omnípotens Deus: et, quibus fidúciam sperándæ pietátis indúlges, intercedénte beáto Augustíno Confessóre tuo atque Pontífice, consuétæ misericórdiæ tríbue benígnus efféctum. Per Dóminum nostrum.

   

Et fit Com. S. Hermetis Martyris.

ORATIO

Deus, qui beátum Hermétem Mártyrem tuum virtúte constántiæ in passióne roborásti: ex ejus nobis imitatióne tríbue; pro amóre tuo próspera mundi despícere, et nulla ejus advérsa formidáre. Per Dóminum.

    

Léctio Epístolæ beáti Pauli Apóstoli ad Timótheum

2. Tim. 4, 1-8.

  

Caríssime: Testíficor coram Deo, et Jesu Christo, qui judicatúrus est vivos et mórtuos, per advéntum ipsíus et regnum ejus: prǽdica verbum, insta opportúne, importúne: árgue, óbsecra, íncrepa in omni patiéntia, et doctrína. Erit enim tempus, cum sanam doctrínam non sustinébunt, sed ad sua desidéria coacervábunt sibi magístros, pruriéntes áuribus, et a veritáte quidem audítum avértent, ad tábulas autem converténtur. Tu vero vígila, in ómnibus labóra, opus fac Evangelístæ, ministérium tuum ímpie. Sóbrius esto. Ego enim jam delibor, et tempus resolutiónis meæ instat. Bonum certámen certávi, cursum consummávi, fidem servávi. In relíquo repósita est mihi coróna justítiæ, quam reddet mihi Dóminus in illa die, justus judex: non solum autem mihi, sed et iis, qui díligunt advéntum ejus.

  

Graduale. Ps. 36, 30-31. Os justi meditábitur sapiéntiam, et lingua ejus loquétur judícium.

℣. Lex Dei ejus in corde ipsíus: et non supplantabúntur gressus ejus.

  

Allelúja, allelúja. ℣. Ps. 88, 21. Invéni David servum meum, óleo sancto meo unxi eum. Allelúja.

  

✠ Sequéntia sancti Evangélii secúndum Matthǽum.

Matth. 5, 13-19.

  

In illo témpore: Dixit Jesus discípulis suis: Vos estis sal terræ. Quod si sal evanúerit, in quo saliétur? Ad níhilum valet ultra, nisi ut mittatur foras, et conculcétur ab homínibus. Vos estis lux mundi. Non potest cívitas abscóndi supra montem pósita. Neque accéndunt lucérnam, et ponunt eam sub módio, sed super candelábrum, ut lúceat ómnibus qui in domo sunt. Sic lúceat lux vestra coram homínibus, ut videant ópera vestra bona, et gloríficent Patrem vestrum, qui in cœlis est. Nolíte putare, quóniam veni sólvere legem aut prophétas: non veni sólvere, sed adimplére. Amen, quippe dico vobis, donec tránseat cœlum et terra, jota unum aut unus apex non præteríbit a lege, donec ómnia fiant. Qui ergo solvent unum de mandátis istis mínimis, et docúerit sic hómines, mínimus vocábitur in regno cœlórum: qui autem fécerit et docúerit, hic magnus vocábitur in regno cœlórum. 

  

Credo.

  

Offertorium. Ps. 91, 13. Justus ut palma florébit: sicut cedrus, quæ in Líbano est, multiplicábitur.

  

SECRETA

Sancti Augustíni Pontíficis tui átque Doctóris nobis, Dómine, pia non desit orátio: quæ et múnera nostra concíliet; et tuam nobis indulgéntiam semper obtíneat. Per Dóminum.

   

Et fit Commemoratio S. Hermetis.

SECRETA

Sacrifícium tibi, Dómine, láudis offérimus in tuórum commemoratióne Sanctórum: da, quǽsumus; ut, quod illis cóntulit glóriam, nobis prosit ad salútem. Per Dóminum.

   

Communio. Luc. 12, 42. Fidélis servus et prudens, quem constítuit dóminus super famíliam suam: ut det illis in témpore trítici mensúram.

  

POSTCOMMUNIO

Ut nobis, Dómine, tua sacrifícia dent salútem: beátus Augustínus Póntifex tuus et Doctor egrégius, quǽsumus, precátor accédat. Per Dóminum.

  

Et fit Commemoratio S. Hermetis.

POSTCOMMUNIO

Repleti, Dómine, benedictióne cœlésti, quǽsumus cleméntiam tuam: ut, intercedénte beáto Herméte Mártyre tuo, quæ humíliter gérimus, salúbriter sentiámus. Per Dóminum.

____________

Die 28 Augusti

S. P. N. Augustini, Ep., Conf. et Eccl. Doct.

Altera Missa

  

Introitus. Eccli. 15, 5. In médio Ecclésiæ apéruit os ejus: et implévit eum Dóminus spíritu sapiéntiæ et intelléctus: stolam glóriæ índuit eum. Ps. 91, 2. Bonum est confitéri Dómino: et psállere nómini tuo, Altíssime. ℣. Glória Patri.

   

ORATIO

Deus, qui abditióra sapiéntiæ tuæ arcána beáto Patri Augustíno, revelándo, et divínæ charitátis flammas in ejus corde excitándo, miráculum colúmnæ nubis et ignis in Ecclésia tua renovásti: concéde ut ejus ductu mundi vórtices felíciter transeámus, et ad ætérnam promissiónis pátriam perveníre mereámur. Per Dóminum.

   

Lectio libri Sapiéntiæ.

Eccli. 50, 1-14.

Ecce Sacérdos magnus, qui in vita sua suffúlsit domum, et in diébus suis corroborávit templum. Templi étiam altitúdo ab ipso fundáta est, duplex ædificátio, et excélsi parietes templi. In diébus ipsíus emanavérunt pútei aquárum, et quasi mare adimpléti sunt supra modum. Qui curávit gentem suam, et liberávit eam a perditióne. Qui præváluit amplificáre civitátem, qui adéptus est glóriam in conversatióne gentis: et ingréssum domus et atrii amplificávit. Quasi stella matutina in médio nébulæ, et quasi luna plena in diébus suis qui timétis Deum, quanta lucet. Et quasi sol refúlgens, sic fecit ánimæ meæ miséricors et iste effúlsit in templo Dei. Quasi miserátor Dóminus, longánimis, arcus refúlgens inter nébulas glóriæ, et quasi flos rosárum in diébus vernis, et quasi lília, quæ sunt in tránsitu aquæ, et quasi thus rédolens in diébus æstátis. Quasi ignis effulgens, et thus ardens in igne. Quasi vas auri sólidum, ornátum omni lápide pretióso. Quasi olíva púllulans, et cypréssus in altitúdinem se extóllens. Circa illum coróna fratrum, et quasi plantátio cedri in monte Líbano, sic circa illum stetérunt quasi rami palma, et omnes fílii Áaron in glória sua.

    

Graduale. Ps. 36, 30-31. Os justi meditábitur sapiéntiam, et lingua ejus loquétur judícium.

℣. Lex Dei ejus in corde ipsíus: et non supplantabúntur gressus ejus.

  

Allelúja, allelúja. ℣. Augustíne Lux Doctórum, firmaméntum Ecclésiæ, málleus hæreticórum summum vas sciéntiæ, pro tuis fílii roga Deum quǽsumus.

  

SEQUENTIA “De profúndis tenebrárum”

De profúndis tenebrárum
Mundo lumen exit clarum,
Et scintíllat hódie:
Olim quidem vas erróris,
Augustínus vas honóris
Datus est Ecclésiæ.
   
Verbo Dei dum obœ́dit,
Credit errans, et accédit
Ad Baptísmi grátiam.
Quam in primis tuebátur,
Verbis, scriptis, exsecrátur
Erróris falláciam.
  
Firmans fidem, formans mores,
Legis sacræ perversóres
Verbi necat gládio.
Obmutéscit Fortunátus:
Cedunt Manes, et Donátus
Tantæ lucis rádio.
  
Mundus marcens, et inánis,
Et doctrínis doctus vanis
Per pestem hæréticam.
Multum cœpit fructum ferre,
Dum in fines orbis terræ
Fidem sparsit únicam.
  
Monachális vitæ formam
Conquadrávit juxta normam
Cœtus Apostólici.
Sui quippe nil habébant;
Tanquam suum, sed vidébant
In commúne Clérici.
  
Sic multórum pro salúte
Diu vivens in virtúte,
Tandem bona senectúte
Dormívit cum Pátribus.
In extrémis nil legávit
Qui nil suum æstimávit:
Immo totum reputávit
Commúne cum frátribus.
 
Salve gemma confessórum,
Lumen Christi, vox cœlórum,
Tuba vitæ, lux Doctórum,
Præsul beatíssime.
Qui te Patrem venerántur,
Te Ductóre, consequántur
Vitam, in qua gloriántur
Beatórum ánimæ.
Amen. Allelúja.

  

✠ Sequéntia sancti Evangélii secúndum Matthǽum.

Matth. 5, 13-19.

  

In illo témpore: Dixit Jesus discípulis suis: Vos estis sal terræ. Quod si sal evanúerit, in quo saliétur? Ad níhilum valet ultra, nisi ut mittatur foras, et conculcétur ab homínibus. Vos estis lux mundi. Non potest cívitas abscóndi supra montem pósita. Neque accéndunt lucérnam, et ponunt eam sub módio, sed super candelábrum, ut lúceat ómnibus qui in domo sunt. Sic lúceat lux vestra coram homínibus, ut videant ópera vestra bona, et gloríficent Patrem vestrum, qui in cœlis est. Nolíte putare, quóniam veni sólvere legem aut prophétas: non veni sólvere, sed adimplére. Amen, quippe dico vobis, donec tránseat cœlum et terra, jota unum aut unus apex non præteríbit a lege, donec ómnia fiant. Qui ergo solvent unum de mandátis istis mínimis, et docúerit sic hómines, mínimus vocábitur in regno cœlórum: qui autem fécerit et docúerit, hic magnus vocábitur in regno cœlórum. 

  

Credo.

  

Offertorium. Ps. 91, 13. Justus ut palma florébit: sicut cedrus, quæ in Líbano est, multiplicábitur.

  

SECRETA

Omnípotens sempitérne Deus, qui præcláro sapiéntiæ lúmine beáti Patris nostri Augustíni mentem illustrásti, et sancti amóris jáculo ejúsdem cor transverberásti: da nobis fámulis tuis, ut illíus doctrínæ et charitátis partícipes éffici mereámur. Per Dóminum.

   

Præfatio de S. Augustino.

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: Quia vas electiónis tuæ, et lux Doctórum mellífluus Augustínus, toto terrárum orbe rádio miræ claritátis infúlsit, et Ecclésiam Sanctam Fídei Orthodóxæ, vere Augustínus ilustrávit: destrúxit hæréses, erróres repúlit, hæreticósque postrávit, ac status fidélium univérsæ Christiánæ vitæ, Augustínus móribus decorávit. Cléricos dócuit, láicos mónuit, dévios in viam veritátis redúxit: cunctótumque conditiónibus salúbriter previdéndo, tuam in hoc mari navículam Augustínus próvide gubernávit. Et ídeo cum Ángelis et Archángelis, cum Thronis et Dominatiónibus cumque omni milítia cœléstis exércitus hymnum glóriæ tuæ cánimus, sine fine dicéntes.

   

Communio. Luc. 12, 42. Fidélis servus et prudens, quem constítuit dóminus super famíliam suam: ut det illis in témpore trítici mensúram.

  

POSTCOMMUNIO

Fove, Dómine, famíliam tuam munéribus sacris, quam cœlésti libámine recreásti: et ut solémnia sancti Patris nostri Augustíni devóte concelébret; infúnde lumen supérnæ cognitiónis, et flammam ætérnæ charitátis. Per Dóminum nostrum.

  

Infra octavam S. P. N. Augustini, Miisa dicitur ut in die festo: secunda oratio de B. Maria, Concéde, nisi facienda sit aliqua commemoratio: tertia contra persecutores Ecclesiæ vel pro Papa. Et dicitur Credo.

   

¶ In Octava (die 4 Septembris), Missa sicut in die, sed dicitur Orationes sequentibus.

ORATIO

Deus, qui beátum Patrem nostrum Augustínum Ecclésiæ tuæ in exponéndis sacræ Scriptúræ mystériis Doctórem óptimum, et eléctum Antístitem providísti: da nobis, quǽsumus, ejus semper doctrínis ínstrui, er oratione fulciri. Per Dominum.

SECRETA

Donis cœlétibus, quǽsumus Dómine, líbera nos tríbue mente inservíre; ut múnera, quæ deférimus, intercedénte beáto Patre Augustíno Confessóre tuo, átque Pontífice, et médelam nobis operéntur, et glóriam. Per Dóminum.

POSTCOMMUNIO

Repléti alimónia cœlésti, quǽsumus Dómine; ut interveniénte beáto Patre nostro Augustíno Confessóre tuo, átque Pontífice, misericórdiæ tuæ grátiam cónsequi mereámur. Per Dóminum.

MISA DE LA VIGILIA DE SAN AGUSTÍN

Del Misal propio de la Orden de Ermitaños de San Agustín.

   

Die 27 Augusti

In vigilia S. Patris nostri Augustini, Episcopi et Confessoris

Introitus. Ps. 131, 9-10. Sacerdótes tui, Dómine, índuant justítiam, et sancti tui exsúltent: propter David servum tuum, non avértas fáciem Christi tui. Ps. ibid., 1. Meménto, Dómine, David: et omnis mansuetúdinis ejus. ℣. Glória Patri.

ORATIO

Da, quǽsumus, omnípotens, Deus: ut beáti Patris nostri Augustíni Confessóris tui Pontíficis, quam prævenímus, veneránda solémnitas; et devotiónem nobis áugeat et salútem. Per Dóminum.

  

Si festum S. Patris nostri Augustini venerit Feria secunda, Missa de Vigilia dicetur in Sabbato: et tunc fecunda Oratio de S. Zephyrino, tertia de sancta Maria, Concéde nos.

Si autem festum S. Patris nostri Augustini venerit in Dominica: tunc secunda Oratio erit de beata Virgine, Concéde nos, tertia pro Papa Deus, ómnium, vel contra persecutores Ecclesiæ, Ecclésiæ tuæ.

Léctio libri Sapiéntiæ.

Eccli. 39, 6-14.

  

Justus cor suum tradet ad vigilándum dilúculo ad Dóminum, qui fecit illum, et in conspéctu Altíssimi deprecábitur. Apériet os suum in oratióne, et pro delíctis suis deprecábitur. Si enim Dóminus magnus volúerit, spíritu intellegéntiæ replébit illum: et ipse tamquam imbres mittet elóquia sapiéntiæ suæ, et in oratióne confitébitur Dómino: et ipse díriget consílium ejus et disciplínam, et in abscónditis suis consiliábitur. Ipse palam fáciet disciplínam doctrínæ suæ, et in lege testaménti Dómini gloriábitur. Collaudábunt multi sapiéntiam ejus, et úsque in sǽculum non delébitur. Non recédet memória ejus, et nomen ejus requirétur a generatióne in generatiónem. Sapiéntiam ejus enarrábunt gentes, et láudem ejus enuntiábit ecclésia.

  

Graduale. Ps. 91, 13 et 14. Justus ut palma florébit: sicut cedrus Líbani multiplicábitur in domo Dómini.

℣. Ibid., 3. Ad annuntiándum mane misericórdiam tuam, et veritátem tuam per noctem.

✠ Sequéntia sancti Evangélii secúndum Lucam.

Luc. 12, 35-40.

  

In illo témpore: Dixit Jesus discípulis suis: Sint lumbi vestri præcíncti, et lucérna; ardéntes in mánibus vestris, et vos similes homínibus exspectántibus dóminum suum, quámdo revertátur a núptiis: ut, cum vénerit et pulsáverit, conféstím apériant ei. Beáti servi illi, quos, cum vénerit dóminus, invénerit vigilántes: amen, dico vobis, quod præcínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc autem scitóte, quóniam, si sciret paterfamílias, qua hora fur veníret, vigiláret útique, et non síneret pérfodi domum suam. Et vos estóte paráti, quía, qua hora non putátis. Fílius hóminis véniet.

Offertorium. Ps. 88, 25. Véritas mea et misericórdia mea cum ipso: et in nómine meo exaltábitur cornu ejus.

SECRETA

Ut accépta tibi sint, Dómine, nostra jejúnia, præsta nobis, quǽsumus, beáti Patris nostri Augustíni suffrágiis, cujus natalítia prævénimus, purificátum tibi pectus offérre. Per Dóminum.

  

Præfatio communis.

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: per Christum, Dóminum nostrum. Per quem majestátem tuam láudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admítti jubeas, deprecámur, súpplici confessione dicéntes:

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

   

Communio. Matth. 24, 46-47. Beátus servus, quem, cum vénerit dóminus, invénerit vigilántem: amen, dico vobis, super ómnia bona sua constítuet eum.

POSTCOMMUNIO

Sancti Patris nostri Augustíni Confessóris tui átque Pontíficis, cujus natalítia prævenímus, quǽsumus, Dómine, supplicatióne placátus; et véniam nobis tríbue, et remédia sempitérna concéde. Per Dóminum.

MISA DE SANTA MICAELA DEL SANTÍSIMO SACRAMENTO

Misa propia de España.

Die 25 Augusti
S. Maríæ Michaéla a Sanctíssimo Sacraménto, Vírginis

Duplex

 

Introitus. Ps. 41, 2. Quemádmodum desíderat cervus ad fontes aquárum, ita desíderat ánima mea at te, Deus. Ps. ibid., 3. Sitívit ánima mea ad Deum fortem vivum: quando véniam et apparébo ante fáciem Deí? ℣. Glória Patri.

 

ORATIO

Dómine Jesu Christe, qui per beátam Maríam Michaélam, Vírginem tuam, novam in Ecclésia famíliam floréscere voluísti: præsta, quǽsumus: ut, ejus exémplo, Córporis et Sánguinis tui mystérium recoléntes, in tui et próximi dilectióne maneámus: Qui vivis.

   

Et fit Commemoratio Feriæ in Missis non conventualibus.

  

Léctio Epístolæ beáti Joánnis Apóstoli.

1. Joann. 3, 13-18.

Caríssimi: Nolíte mirári, si odit vos mundus. Nos scimus, quóniam transláti sumus de morte ad vitam quóniam dilígimus fratres. Qui non díligit, manet in morte: omnis qui odit fratrem suum, homicída est. Et scitis quóniam omnis homicída non habet vitam ætérnam in semetípso manéntem. In hoc cognóvimus caritátem Dei, quóniam ille ánimam suam pro nobis pósuit: et nos debémus pro frátribus ánimas pónere. Qui habúerit subtántiam hujus mundi, et víderit fratrem suum necessitátem habére, et cláuserit víscera sua ab eo: quómodo cáritas Dei manet in eo? Filíoli meli, non diligámus verbo, neque língua, sed ópere, et veritáte.

  

Graduale. Ps. 111, 9. Dispérsit, dedit paupéribus, justítia ejus manet in sǽculum sǽculi, cornu ejus exaltávitur in glória.

℣. Ps. 54, 23. Jacta super Dóminum curam tuam, et ipse te enútriet: non dabit in ætérnum fluctuatiónem justo.

  

Allelúja, allelúja. ℣. Prov. 31, 20. Manum suam apéruit ínopi, et palmas suas exténdit ad páuperem. Allelúja.

   

✠ Sequéntia sancti Evangélii secúndum Joánnem.

Joann. 15, 12-16.

  

In illo témpore: Dixit Jesus discípulis suis: Hoc est præcéptum meum, ut diligátis ínvicem, sicut diléxi vos. Majórem hac dilectiónem nemo habet, ut ánimam suam ponat quis pro amícis suis. Vos amíci meli estis, si fecéritis quæ ego præcípio vobis. Jam non dicam vos servos: quía servus nescit, quid fáciat dóminus ejus. Vos autem dixi amícos: quía ómnia, quæcúmque audívi a Patre meo, nota feci vobis. Non vos me elegístis: sed ego elégi vos, et pósui vos, ut eátis, et fructum afferátis: et fructus vester máneat: ut quodcúmque petiéritis Patrem in nómine meo, det vobis.

  

Ofertorium. Zach. 9, 17. Quid bonum ejus est, et quid pulchrum ejus, nisi fruméntum electórum et vinum gérminans vírgines?

 

SECRETA

In odórem suavitátis hoc sacrifícium láudis súscipe, Pater omnípotens, et præsta: ut, intercedénte beáta María Michaéla; tuórum múnerum abundántiam consequámur. Per Dóminum.

   

Et fit Commemoratio Feriæ.

 
Communio. Gal. 2, 20. Vivo áutem jam non ego; vivit vero in me Christus. Quod áutem nunc vivo in carne: in fide vivo Fílii Del, qui diléxit me, et trádidit semetípsum pro me.

  

POSTCOMMUNIO

Tuis, Dómine, pasti delíciis, súpplices exorámus, ut eódem igne inflammémur, qui beátam Maríam Michaélam veheménter accéndit. Per Dóminum.

MISA DE SAN LUIS REY DE FRANCIA

Del Misal Romano de San Pío V.

  

Die 25 Augusti

S. Ludovici Regis Franciæ, Confessoris 

Semiduplex

  

Introitus. Ps. 36, 31-32. Os justi meditábitur sapiéntiam, et língua ejus loquétur judícium: lex Dei ejus in corde ipsíus. Ps. Ibid, 1. Noli æmulári in malignántibus: néque zeláveris faciéntes iniquitátem. ℣. Glória Patri.

  

ORATIO

Deus, qui beátum Ludovícum Confessórem tuum de terréno regno ad cœléstis regni glóriam transtulísti: ejus, quǽsumus, méritis et intercessióne; Regis regum Jesu Christi, Fílii tui, fácias nos esse consórtes: Qui tecum vivit et regnat in unitáte Spíritus Sancti Deus per ómnia sǽcula sæculórum. Amen.

 

Ad poscenda suffragia Sanctorum

ORATIO

A cunctis nos, quǽsumus, Dómine, mentis et córporis defénde perículis: et, intercedénte beáta et gloriósa semper Vírgine Dei Genitríce María, cum beáto Joseph, beátis Apóstolis tuis Petro et Páulo, átque beáto N. et ómnibus Sanctis, salútem nobis tríbue benígnus et pacem; ut, destrúctis adversitátibus et erróribus univérsis, Ecclesia tua secúra tibi sérviat libertáte.

 

Léctio libri Sapiéntiæ.

Sap. 10, 10-14.

  

Justum dedúxit Dóminus per vias rectas, et osténdit illi regnum Dei, et dedit illi sciéntiam sanctórum: honestávit illum in labóribus, et complévit labóres illíus. In fráude circumveniéntium illum áffuit illi, et honéstum fecit illum. Custodívit illum ab inimícis, et a seductóribus tutávit illum, et certámen forte dedit illi, ut vínceret et sciret, quóniam ómnium poténtior est sapiéntia. Hæc vénditum justum non derelíquit, sed a peccatóribus liberávit eum: descendítque cum illo in fóveam, et in vínculis non derelíquit illum, donec afférret illi sceptrum regni, et poténtiam advérsus eos, qui eum deprimébant: et mendáces osténdit, qui maculavérunt illum, et dedit illi claritátem ætérnam, Dóminus, Deus noster.

 

Graduale. Ps. 91, 13, 14. Justus ut palma florébit: sicut cedrus Líbani multiplicábitur in domo Dómini.

Ibid., 3. Ad annuntiándum mane misericórdiam tuam, et veritátem tuam per noctem. 

Allelúja, allelúja. Jac. 1, 12. Beátus vir, qui suffert tentatiónem: quóniam cum probátus fúerit, accípiet corónam vitæ. Allelúja.

✠ Sequéntia sancti Evangélii secúndum Lucam

Luc. 19, 12-26.

  

In illo témpore: Dixit Jesus discípulis suis parábolam hanc: Homo quídam nóbilis ábiit in regionem longínquam accípere sibi regnum, et revérti. Vocátis áutem decem servis suis, dedit eis decem mnas, et ait ad illos: Negotiámini, dum vénio. Cives áutem ejus óderant eum: et misérunt legatiónem post illum, dicéntes: Nólumus hunc regnáre super nos. Et factum est, ut redíret accépto regno: et jussit vocári servos, quíbus dedit pecúniam, ut sciret, quántum quísque negotiátus esset. Venit áutem primus, dicens: Dómine, mna tua decem mnas acquisívit. Et ait illi: Éuge, bone serve, quía in módico fuísti fidélis, eris potestátem habens super decem civitátes. Et alter venit, dicens: Dómine, mna tua fecit quínque mnas. Et huic ait: Et tu esto super quínque civitátes. Et alter venit, dicens: Dómine, ecce mna tua, quam hábui repósitam in sudário: tímui enim te, quía homo austérus es: tollis, quod non posuísti, et metis, quod non seminásti. Dicit ei: De ore tuo te júdico, serve néquam. Sciébas, quod ego homo austérus sum, tollens, quod non pósui, et metens, quod non seminávi: et quáre non dedísti pecúniam meam ad mensam, ut ego véniens cum usúris útique exegíssem illam? Et astántibus dixit: Auférte ab illo mnam et date illi, qui decem mnas habet. Et dixérunt ei: Dómine, habet decem mnas. Dico áutem vobis: Quía omni habénti dábitur, et abundábit: ab eo áutem, qui non habet, et, quod habet, auferétur ab eo.

 

Offertorium. Ps. 88, 25. Véritas mea, et misericórdia mea cum ipso: et in nómine meo exaltábitur cornu ejus.

SECRETA

Præsta, quǽsumus, omnípotens Deus: ut, sicut beátus Ludovícus Conféssor tuus, spretis mundi oblectaméntis, soli Regi Christo placére stúduit; ita ejus orátio nos tibi reddat accéptos. Per eúmdem Dóminum.

  

Ad poscenda suffragia Sanctorum

SECRETA

Exáudi nos, Deus, salutáris noster: ut, per hujus sacraménti virtútem, a cunctis nos mentis et córporis hóstibus tueáris; grátiam tríbuens in præsénti, et glóriam in futúro.

Communio. Matth. 24, 26-27. Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum. 

POSTCOMMUNIO

Deus, qui beátum Confessórem tuum Ludovícum mirificásti in terris, et gloriósum in cœlis fecísti: eúndem, quǽsumus, Ecclésiæ tuæ constítue defensórem. Per Dóminum.

  

Ad poscenda suffragia Sanctorum

POSTCOMMUNIO

Mundet et múniat nos, quǽsumus, Dómine, divíni sacraménti munus oblátum: et, intercedénte beáta Vírgine Dei Genitríce María, cum beáto Joseph, beátis Apóstolis tuis Petro et Páulo, átque beáto N. et ómnibus Sanctis; a cunctis nos reddat et perversitátibus expiátos, et adversitátibus expedítos.

MISA DE SAN VICENTE DE PAÚL

Del Misal Romano de San Pío V. La Misa propia de Francia y de la Congregación de la Misión y las Hijas de la Caridad (cuyos textos se emplean también en la fiesta de la Traslación –26 de Abril– y del Patrocinio –20 de Diciembre–, aunque con oraciones propias) fue aprobada por Benedicto XIV el 10 de Abril de 1741.

Die 19 Julii

S. Vincentii a Paulo Confessoris

Duplex

Introitus. Ps. 91, 13-14. Justus ut palma florébit: sicut cedrus Líbani multiplicábitur: plantátus in domo Dómini: in átriis domus Dei nostri. Ps. ibid., 2. Bonum est confitéri Dómino: et psállere nómini tuo, Altíssime. ℣. Glória Patri.

   

ORATIO

Deus, qui, ad evangelizándum paupéribus et ecclesiástici órdinis decórem promovéndum, beátum Vincéntium apostólica virtúte roborásti: præsta, quǽsumus; ut, cujus pia mérita venerámur, virtútum quoque instruámur exémplis. Per Dóminum.

  

Léctio Epístolæ beáti Pauli Apóstoli ad Corínthios

1. Cor. 4, 9-14.

   

Fratres: Spectáculum facti sumus mundo et Ángelis et homínibus. Nos stulti propter Christum, vos áutem prudéntes in Christo: nos infírmi, vos áutem fortes: vos nóbiles, nos áutem ignóbiles. Úsque in hanc horam et esurímus, et sitímus, et nudi sumus, et cólaphis cǽdimur, et instábiles sumus, et laborámus operántes mánibus nostris: maledícimur, et benedícimus: persecutiónem pátimur, et sustinémus: blasphemámur, et obsecrámus: támquam purgaménta hujus mundi facti sumus, ómnium peripséma usque adhuc. Non ut confúndant vos, hæc scribo, sed ut fílios meos caríssimos móneo: in Christo Jesu, Dómino nostro.

Graduale. Ps. 36, 30-31. Os justi meditábitur sapiéntiam, et lingua ejus loquétur judícium.

℣. Lex Dei ejus in corde ipsíus: et non supplantabúntur gressus ejus.

  

Allelúja, allelúja. ℣. Ps. 111, 1. Beátus vir, qui timet Dóminum: in mandátis ejus cupit nimis. Allelúja.

  

✠ Sequéntia sancti Evangélii secúndum Lucam.

Luc. 10, 1-9.

  

In illo témpore: Designávit Dóminus et álios septuagínta duos: et misit illos binos ante fáciem suam in omnem civitátem et locum, quo erat ipse ventúrus. Et dicebat illis: Messis quídem multa, operárii áutem páuci. Rogáte ergo Dóminum messis, ut mittat operários in messem suam. Ite: ecce, ego mitto vos sicut agnos inter lupos. Nolíte portáre sácculum neque peram neque calceaménta; et néminem per viam salutavéritis. In quamcúmque domum intravéritis, primum dícite: Pax huic dómui: et si ibi fúerit fílius pacis, requiéscet super illum pax vestra: sin autem, ad vos revertétur. In eádem autem domo manéte, edéntes et bibéntes quæ apud illos sunt: dignus est enim operárius mercéde sua. Nolíte transíre de domo in domum. Et in quamcúmque civitátem intravéritis, et suscéperint vos, manducáte quæ apponúntur vobis: et curáte infírmos, qui in illa sunt, et dícite illis: Appropinquávit in vos regnum Dei.

  

Offertorium. Ps. 20, 2-3. In virtúte tua, Dómine, lætábitur justus, et super salutáre tuum exsultábit veheménter: desidérium ánimæ ejus tribuísti ei.

   

SECRETA

Præsta nobis, quǽsumus, omnípotens Deus: ut nostræ humilitátis oblátio et pro tuórum tibi grata sit honóre Sanctórum, et nos córpore páriter et mente puríficet. Per Dóminum.

  

Communio. Matth. 19, 28-29. Amen, dico vobis: quod vos, qui reliquístis ómnia et secúti estis me, céntuplum accipiétis, et vitam ætérnam possidébitis.

   

POSTCOMMUNIO

Quǽsumus, omnípotens Deus: ut, qui cœléstia aliménta percépimus, intercedénte beáto Vincéntio Confessóre tuo, per hæc contra ómnia advérsa muniámur. Per Dóminum.

   

***

   

Die 19 Julii

S. Vincentii a Paulo Confessoris

Própria Gálliæ, et Congregatiónis Missiónis ac Societátis Puellárum a Caritáte.

Dúplex majus.

Introitus. Ps. 131, 8. Páuperes Sion saturábo pánibus: sacerdótes ejus índuam salutári, et sancti ejus exsultatióne exsultábunt. Ps. ibid., 2. Meménto Dómine David: et ómnis mansuetúdinis ejus. ℣. Glória Patri.

ORATIO

Deus, qui ad salútem paupéribus et cleri disciplínam, novam in Ecclésia tua per beátum Vincéntium famíliam congregásti, da, quǽsumus; ut éodem nos quóque spíritu fervéntes, et amémus quod amávit et quod dócuit operémur. Per Dóminum.

  

Léctio epístolæ beáti Páuli Apóstoli ad Corínthios

1. Cor. 26-31; 2, 1-2.

   

Vidéte vocatiónem vestram, fratres, quía non multi sapiéntes secúndum carnem, non multi poténtes, non multi nóbiles: sed quæ stulta sunt mundi elégit Deus, ut confúndat sapiéntes: et infírma mundi elégit Deus, ut confúndat fórtia: et ignobília mundi et contemptibília elégit Deus, et ea quæ non sunt, ut ea quæ sunt destrúeret: ut non gloriétur omnis caro in conspéctu ejus. Ex ipso áutem vos estis in Christo Jesu, qui factus est nobis sapiéntia a Deo, et justítia, et sanctificátio, et redémptio: ut, quemádmodum scriptum est, qui gloriátur, in Dómino gloriétur. Et ego cum veníssem ad vos, fratres, veni non in sublimitáte sermónis aut sapiéntiæ annúntians vobis testimónium Christi. Non enim judicávi, me scire áliquid inter vos, nisi Jesum Christum, et hunc crucifíxum.

  

Graduale. Isa. 63, 4. Evangelizáre paupéribus misit me, sanáre contrítos corde.

℣. Ibid., 7. Parásti in dulcédine tua páuperi, Deus: Dóminus dabit verbum evangelizántibus, virtúte multa.

Allelúja, allelúja. ℣. Isa. 52, 7. Quam pulchri super montes pedes annuntiántis et prædicántis pacem; annuntiántis bonum, prædicántis salútem. Allelúja.

   

In Missis votivis post Septuagesima, omissis Allelúja, et versu sequenti dicitur:

Tractus. Prov. 31, 20. Manum suam apéruit ínopi: et palmas suas exténdit ad páuperem.

℣. Ps. 40, 2. Beátus quí intélligit super egénum, et páuperem: in die mala liberábit eum Dóminus.

℣. Ps. 111, 5 et 6. Jucúndus homo qui miserétur, et cómmodat: dispónet sermónes suos in judício, quía in ætérnum non commovébitur.

Tempore autem Paschali omittitur Graduale, et ejus loco dicitur:

Allelúja, allelúja.

℣. Isa. 52, 7. Quam pulchri super montes pedes annuntiántis et prædicántis pacem; annuntiántis bonum, prædicántis salútem. Allelúja.

℣. Ibid, 11. Exíte de médio Babylónis: mundámini quí fertis vasa Dómini. Allelúja.

   

✠ Sequéntia sancti Evangelii secúndum Mattǽum.

Matth. 9, 35-40.

In illo témpore: Circuíbat Jesus omnes civitátes, et castélla, docens in synagógis eórum, et prǽdicans Evangélium regni, et curans omnem languórem, et omnem infirmitátem. Videns áutem turbas, misértus est eis quía erant vexáti, et jacéntes sicut oves non habéntes pastórem. Tunc dicit discípulis suis: Messis quídem multa, operárii áutem páuci. Rogáte ergo Dóminum messis, ut mittat operários in messem suam. Credo.

Offertorium. 3. Reg. 8, 58. Inclínet Dóminus Deus noster corda nostra ad se, ut ambulémus in univérsis viis ejus, et custodiámus mandáta ejus, et cœremónias ejus, et judícia quæcúmque mandávit pátribus nostris.

  

SECRETA

Deus, qui beáto Vincéntio divína quotídie celebránti mystéria tribuísti quod tractábat imitári: ejus nobis précibus indúlge; ut immaculátam hóstiam offeréntes, ipsi quóque in holocáustum tibi accéptum transeámus.  Per Dóminum. 

Communio. Ps. 106, 2. Confiteántur Dómino misericórdiæ ejus, et mirabília ejus fílus hóminum, quía satiávit ánimam inánem, et ánimam esuriéntem satiávit bonis.

POSTCOMMUNIO

Cœléstibus, Dómine, refécti sacraméntis: quǽsumus; ut ad evangelizántem paupéribus Fílium tuum imitándum beáti Vincéntii sicut exémplis provocémur, ita et patrocíniis adjuvémur. Per Dóminum.