MISA DE NUESTRA SEÑORA, MADRE DE LA DIVINA PROVIDENCIA

Misa aprobada por el Papa León XIII en 1888.

  

Sabbato ante Dominicam tertiam Novembris

IN FESTO BEÁTÆ MARÍÆ VÍRGINIS, DIVÍNÆ PROVIDÉNTIÆ MATRIS

Duplex

 

Introitus. Joann. 19, 26-27. Múlier, ecce fílius tuus, dixit Jesus matri: deínde dixit discípulo quem diligébat: Ecce mater tua. (T. P. Allelúja, allelúja). Ps. 105, 1. Confitémini Dómino, quóniam bonus: quóniam in sǽculum misericórdia ejus. ℣. Glória Patri.

   

ORATIO

Deus, cujus providéntia in sui dispositióne non fállitur, te súpplices exorámus: ut, intercedénte beáta Vírgine ac Genitríce Fílii tui María; nóxia cuncta submóveas, et ómnia nobis profutúra concédas. Per eúmdem Dóminum.

     

Léctio libri Sapiéntiæ.

Eccli. 24, 1 et 4-13.

   

Sapiéntia laudábit ánimam suam, et in Deo honorábitur, et in médio pópuli sui gloriábitur. Et in multitúdine electórum habébit láudem et inter benedíctos benedicétur, dicens: Ego ex ore Altíssimi prodívi primogénita ante omnem creatúram: Ego feci in cœlis ut orirétur lumen indefíciens, et sicut nébula texi omnem terram: Ego in altíssimis habitávi, et thronus meus in colúmna nubis. Gyrum cœli circuívi sola, et profúndum abýssi penetrávi, in flúctibus maris ambulávi, et in omni terra steti: et in omni pópulo, et in omni gente primátum hábui: et ómnium excelléntium et humílium corda virtúte calcávi: et in his ómnibus réquiem quæsívi, et in hereditáte Dómini morábor. Tunc præcépit, et dixit mihi Creátor ómnium: et qui creávit me, requiévit in tabernáculo meo, et dixit mihi: In Jacob inhábita, et in Ísraël hereditáre, et in eléctis meis mitte radíces.

  

Graduale. Isai. 49, 15. Númquid oblivísci potest múlier infántem suum, ut non misereátur fílio úteri sui? 

℣.  Et si illa oblíta fúerit, ego tamen non oblivíscar tui.

 

Allelúja, allelúja. ℣.  Tob. 13, 17. Tu áutem lætáberis in fíliis tuis, quóniam omnes benedicéntur, et congregabúntur ad Dóminum. Allelúja.

 

In Missis votivis post Septuagesima, ommisis Allelúja et versu sequenti, dicitur:
Tractus.  Prov. 8, 32-35. Nunc ergo, fílii, audíte me: Beáti, qui custódiunt vias meas.
℣. Audíte disciplínam, et estóte sapiéntes, et nolíte abjícere eam.
℣. Beátus homo qui audit me, et qui vígilat ad fores meas quotídie, et obsérvat ad postes óstii mei.
℣. Qui me invénerit, invéniet vitam, et háuriet salútem a Dómino.

  

Tempore autem Paschali omittitur Graduale, et ejus loco dicitur:

Allelúja, allelúja.

℣. Isai. 66, 10 et 13. Lætámini et exsultáte, omnes qui dilígitis eam. Allelúja.

℣. Quómodo si cui mater blandiátur, ita ego consolábor vos. Allelúja.

    

✠ Sequéntia sancti Evangélii secúndum Joánnem.

Joann. 2, 1-11.

 

In illo témpore: Núptiæ factæ sunt in Cana Galilǽæ: et erat mater Jesu ibi. Vocátus est áutem et Jesus, et discípuli ejus ad núptias. Et deficiénte vino, dicit mater Jesu ad eum: Vinum non habent. Et dicit ei Jesus: Quid mihi et tibi est, múlier? nondum venit hora mea. Dicit mater ejus minístris: Quodcúmque díxerit vobis, fácite. Erant áutem ibi lapídeæ hýdriæ sex pósitæ secúndum purificatiónem Judæórum, capiéntes síngulæ metrétas binas vel ternas. Dicit eis Jesus: Impléte hýdrias áqua. Et implevérunt eas úsque ad summum. Et dicit eis Jesus: Hauríte nunc, et ferte architriclíno. Et tulérunt. Ut áutem gustávit architriclínus áquam vinum factam, et non sciébat unde esset, minístri áutem sciébant, qui háuserant áquam: vocat sponsum architriclínus, et dicit ei: Omnis homo primum bonum vinum ponit: et cum inebriáti fúerint, tunc id, quod detérius est. Tu áutem servásti bonum vinum úsque adhuc. Hoc fecit inítium signórum Jesus in Cana Galilǽæ: et manifestávit glóriam suam, et credidérunt in eum discípuli ejus.

 

Et dicitur Credo.

 

Offertorium. Sap. 14, 3. Tua áutem, Pater, providéntia gubérnat: quóniam dedísti et in mari viam, et inter fluctus sémitam firmíssimam. (T. P. Allelúja).

 

SECRETA

Adeúntibus cum fidúcia ad thronum grátiæ, propitiáre nobis, Dómine Deus: ut, benigníssima divínæ providéntiæ, Matre intercedénte, misericórdiam consequámur, et grátiam inveniámus in auxílio opportúno. Per Dóminum.

     

Præfatio de Beatæ Mariæ Virginis

Vere dignum et justum est, ǽquum et salutáre, nos tibi semper et ubique grátias ágere: Dómine sancte, Pater omnípotens, ætérne Deus: Et te in Festivitáte (in Missis votivis: in Veneratióne) beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et, virginitátis glória permanénte, lumen ætérnum mundo effúdit, Jesum Christum, Dóminum nostrum. Per quem majestátem tuam laudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admitti jubeas, deprecámur, súpplici confessióne dicéntes:

 

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

    

Communio. Ps. 127, 3. Fílii tui sicut novéllæ olivárum in circúitu mensæ tuæ. (T. P. Allelúja).

  

POSTCOMMUNIO

Cœléstis mensæ virtus, miséricors Deus, in fámulis tuis júgiter persevéret: ut, divínæ providéntiæ Matris intercessióne, regnum et justítiam tuam ante ómnia quæréntes, temporálibus non destituántur auxíliis. Per Dóminum.