MISA EN HONOR DE LAS CINCO LLAGAS DE NUESTRO SEÑOR JESUCRISTO

La devoción a las Cinco Llagas de Nuestro Señor, iniciada por la Virgen Santísima y por San Juan luego del Descendimiento de la Cruz, resurgió por las predicaciones de San Bernardo de Claraval y San Francisco de Asís, sumado al retorno de los Cruzados desde Tierra Santa; y la más temprana evidencia de una fiesta en honor de las Llagas de Cristo proviene del monasterio de Fritzlar en Turingia, donde en el siglo XIV se celebraba el Viernes posterior a la Octava de Corpus Christi. Según Guido María Dreves SJ, durante el siglo siguiente la fiesta se difundió en varias ciudades, como Salisbury (Inglaterra), Huesca y Jaca (España), Viena y Tours, y fue incluida en los Breviarios de los Carmelitas, Franciscanos, Dominicos y otras órdenes (Analécta Hýmnica Medii Ævi, tomos XXIV, XL, XLII). En Évora y otros lugares de Portugal, la fiesta de las Cinco Llagas era celebrada desde la Edad Media el 6 de Febrero (en Lisboa, el Viernes después de Ceniza), en conmemoración de la fundación del reino de Portugal en 1139, cuando, antes de la batalla de Ourique, Cristo crucificado se apareció a Alfonso Henríquez, prometiéndole la victoria sobre los almorávides si hacía insertar en el escudo del reino cinco escusones de azur, en reminiscencia de las Cinco Llagas (“Próprium Portugálliæ”, en Johann Baptist von Weiß, Weltgeschichte, tomo III, pág. 251). Desde 1831, esta fiesta está asignada al Viernes de la 3ª semana de Cuaresma, tras ser adoptada por la Urbe romana y los Padres Pasionistas. Salvo las Oraciones (que son propias), es la Misa Humiliávit de la Pasión de Cristo.

  

Feria VI post Dominicam III. Quadragesimæ

Sacrórum Quinque Vúlnerum Dómini Nostri Jesu Christi

Duplex Majus.

   
Introitus. Philipp. 2, 8-9. Humiliávit semetípsum Dóminus Jesus Christus usque ad mortem, mortem autem crucis: propter quod et Deus exaltávit illum, et donávit illi nomen, quod est super omne nomen. (T. P. Allelúja, allelúja.) Ps. 88, 2. Misericórdias Dómini in ætérnum cantábo: in generatiónem et generatiónem. ℣. Glória Patri.
   

ORATIO

Deus, qui unigéniti Fílii tui passióne et, per quinque Vúlnera ejus, sánguinis effusióne, humánam natúram peccáto pérditam reparásti: tríbue nobis, quǽsumus; ut, qui ab eo suscépta Vúlnera venerámur in terris, ejúsdem pretiosíssimi sánguinis fructum cónsequi mereámur in cœlis. Per eúndem Dóminum.

      

Léctio Zacharíæ Prophétæ.
Zach. 12, 10-11; 13, 6-7.

  
Hæc dicit Dóminus: Effúndam super domum David et super habitatóres Jerúsalem spíritum grátiæ et precum: et aspícient ad me, quem confixérunt: et plangent eum planctu quasi super unigénitum, et dolébunt super eum, ut doléri solet in morte primogéniti. In die illa magnus erit planctus in Jerúsalem, et dicétur: Quid sunt plagæ istæ in médio mánuum tuárum? Et dicet: His plagátus sum in domo eórum, qui diligébant me. Frámea, suscitáre super pastórem meum, et super virum cohæréntem mihi, dicit Dóminus exercítuum: pércute pastórem, et dispergéntur oves: ait Dóminus omnípotens.
 
Graduale. Ps. 68, 21-22. Impropérium exspectávi cor meum et misériam: et sustínui, qui simul mecum contristarétur, et non fuit: consolántem me quæsívi, et non invéni.
℣. Dedérunt in escam meam fel, et in siti mea potavérunt me acéto.
 
Tractus. Is. 53, 4-5. Vere languóres nostros ipse tulit et dolóres nostros ipse portávit.
℣. Et nos putávimus eum quasi leprósum et percússum a Deo et humiliátum.
℣. Ipse autem vulnerátus est propter iníquitates nostras, attrítus est propter scélera nostra.
℣. Disciplína pacis nostræ super eum: et livóre ejus sanáti sumus.
 
In Missis votivis ante Septuagesimam vel post Pentecostes, Graduale ut supra et, omisso Tractu, dicitur:
Allelúja, allelúja. ℣. Ave, Rex noster: tu solus nostros es miserátus erróres: Patri obœ́diens, ductus es ad crucifigéndum, ut agnus mansúetus ad occisiónem. Allelúja.
  
Tempore autem Paschali, omissis Graduali et Tractu, dicitur:
Allelúja, allelúja.
℣. Ave, Rex noster: tu solus nostros es miserátus erróres: Patri obœ́diens, ductus es ad crucifigéndum, ut agnus mansúetus ad occisiónem. Allelúja.
℣. Tibi glória, hosánna: tibi triúmphus et victória: tibi summæ laudis et honóris coróna. Allelúja.
 

✠ Sequéntia sancti Evangélii secúndum Joánnem.

Joann. 19, 28-35.

  
In illo témpore: Sciens Jesus, quia ómnia consummáta sunt, ut consummarétur Scriptúra, dixit: Sítio. Vas ergo erat pósitum acéto plenum. Illi autem spóngiam plenam acéto, hyssópo circumponéntes, obtulérunt ori ejus. Cum ergo accepísset Jesus acétum, dixit: Consummátum est. Et inclináto capite trádidit spíritum. Judǽi ergo (quóniam Parascéve erat), ut non remanérent in cruce córpora sábbato (erat enim magnus dies ille sábbati), rogavérunt Pilátum, ut frangeréntur eórum crura et tolleréntur. Venérunt ergo mílites: et primi quidem fregérunt crura et alteríus, qui crucifíxus est cum eo. Ad Jesum autem cum veníssent, ut vidérunt eum jam mórtuum, non fregérunt ejus crura, sed unus mílitum láncea latus ejus apéruit, et contínuo exívit sanguis et aqua. Et qui vidit, testimónium perhíbuit: et verum est testimónium ejus.
  
Et dicitur Credo.
  
Offertorium. Insurrexérunt in me viri iníqui: absque misericórdia quæsiérunt me interfícere: et non pepercérunt in fáciem meam spúere: lánceis suis vulneravérunt me, et concússa sunt ómnia ossa mea. (T. P. Allelúja.)
 

SECRETA

Majestáti tuæ, quǽsumus, Dómine, accépta sint dona: in quibus ipsa Unigéniti tui Vúlnera tibi offérimus, nostræ prétia libertátis. Per eúndem Dóminum.
 
Præfatio de Cruce.
Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: Qui salútem humáni géneris in ligno Crucis constituísti: ut, unde mors oriebátur, inde vita resúrgeret: et, qui in ligno vincébat, in ligno quoque vincerétur: per Christum, Dóminum nostrum. Per quem majestátem tuam laudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quibus et nostras voces ut admítti júbeas, deprecámur, súpplici confessióne dicéntes:
 
Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.
 
Communio. Ps. 21, 17-18. Fodérunt manus meas et pedes meos: dinumeravérunt ómnia ossa mea. (T. P. Allelúja.)

   

POSTCOMMUNIO

Refécti vitálibus alimóniis, quǽsumus, Dómine, Deus noster: ut, qui Vúlnera Dómini nostri Jesu Christi hódie devóte cólimus; hæc in nostris córdibus impréssa móribus et vita teneámus. Per eúndem Dóminum.