MISA DE SAN LÁZARO DE BETANIA

Del Misal Propio de Tierra Santa.
 

Die 17 Decembis

Sancti Lázari Resuscitati, Episcopi et Confessoris

Duplex majus

 

Introitus. Isa. 43, 1-3. Noli timére, quia redémi te, et vocávi te nómine tuo: meus es tu, cum ambuláveris in igne, non comburéris, et flamma non ardébit in te. Quia ego Dóminus Deus tuus, Sanctus Israël, salvátor tuus. Ps. 17, 2 et 3. Díligam te, Dómine, fortitúdo mea: Dóminus firmaméntum meum et refúgium meum, et liberátor meus. ℣. Glória Patri.

  

ORATIO

Deus, qui per Unigénitum tuum ad beátum Lázarum quatriduánum mórtuum suscitasti a monuménto; érige nos de túmulis peccatórum, ut mereámur adípisci consórtium electórum tuórum. Per eúmdem Dòminum.

  

Et it Commemoratio Feriæ.

  

Léctio libri Sapiéntiæ.

Eccli. 51, 1-12.

  

Confitébor tibi, Dómine rex, et collaudábo te Deum salvatórem meum. Confitébor nómini tuo, quóniam adjútor et protéctor factus es mihi, et liberásti corpus meum a perditióne: a láqueo linguæ iníquæ, et a lábiis operántium mendácium: et in conspéctu astántium factus es mihi adjútor. Et liberásti me, secúndum multitúdinem misericórdiæ nóminis tui, a rugiéntibus præpáratis ad escam: de mánibus quæréntium ánimam meam, et de portis tribulatiónum quæ circumdedérunt me; a pressúra flammæ quæ circúmdedit me, et in médio ignis non sum æstuátus; de altitúdine ventris inferi, et a lingua coinquináta, et a verbo mendácii, a rege iníquo, et a língua injústa. Laudábit usque ad mortem ánima mea Dóminum, et vita mea appropínquans erat in inférno deórsum. Circumdedérunt me úndique, et non erat qui adjuváret: respíciens eram ad adjutórium hóminum, et non erat. Memorátus sum misericórdiæ tuæ Dómine, et operatiónis tuæ, quæ a sǽculo sunt: quóniam éruis sustinéntes te, Dómine, et líberas eos de mánibus géntium.

  

Graduale. Phil. 2, 17. Si ímmolor supra sacrifícium et obséquium fidei vestræ, gáudeo et congrátulor ómnibus vobis.

℣. Idípsum et vos gaudéte, et congratulámini mihi.

 

Allelúja, allelúja. ℣. Lázare, festína, pétimus, succúrre nobis, néquiter ecce premit nos úndique túrbidus hostis. Allelúja.

  

✠ Sequéntia sancti Evangélii secúndum Joánnem.

Joan. 11, 1 et 32-45.

  

In illo témpore: Erat autem quidam lánguens Lázarus a Bethánia, de castéllo Maríæ et Marthæ soróris ejus. María ergo, cum venísset ubi erat Jesus, videns eum, cecídit ad pedes ejus, et dicit ei: Dómine, si fuísses hic, non esset mórtuus frater meus. Jesus ergo, ut vidit eam plorántem, et Judǽos, qui vénerant cum ea, plorántes, infrémuit spíritu, et turbávit seípsum, et dixit: Ubi posuístis eum? Dicunt ei: Dómine, veni, et vide. Et lacrimátus est Jesus. Dixérunt ergo Judǽi: Ecce quómodo amábat eum. Quidam autem ex ipsis dixérunt: Non póterat hic, qui apéruit óculos cæci nati, facére ut hic non morerétur? Jesus ergo rursum fremens in semetípso, venit ad monuméntum. Erat autem spelúnca, et lapis superpósitus erat ei. Ait Jesus: Tóllite lápidem. Dicit ei Martha, soror ejus qui mórtuus fúerat: Dómine, jam fœtet, quatriduánus est enim. Dicit ei Jesus: Nonne dixi tibi quóniam si credíderis, vidébis glóriam Dei? Tulérunt ergo lápidem: Jesus autem, elevátis sursum óculis, dixit: Pater, grátias ago tibi quóniam audísti me. Ego autem sciébam quia semper me audis, sed propter pópulum qui circúmstat, dixi: ut credant quia tu me misísti. Hæc cum dixísset, voce magna clamávit: Lázare, veni foras. Et statim pródiit qui fúerat mórtuus, ligátus pedes, et manus instítis, et fácies íllius sudário erat ligáta. Dixit eis Jesus: Sólvite eum et sínite abíre. Multi ergo ex Judǽis, qui vénerant ad Maríam, et Martham, et viderant quæ fecit Jesus, credidérunt in eum.

 

Ofertorium. Col. 1, 24-25. Gáudeo in passiónibus, et adímpleo ea quæ desunt passiónum Christi in carne mea, pro córpore ejus, quod est Ecclésia, cujus factus sum ego miníster.

  

SECRETA

Oblatiónem nostram, quǽsumus Dòmine, benedictiónis suæ rore perfúndet Spíritus Sanctus, et nos constántes ejíciat in ide veritátis, quam beátus Lázarus, Chisti discípulus, et præcónio vocis et sánguinis effusióne testátus est. Per eúmdem Dóminum.

  

Et fit Commemoratio feriæ.

 

Communio. 2 Cor. 1, 5. Sicut abúndant passiónes Christi in nobis, ita et per Christum abúndat consolátio nostra.

 

POSTCOMMUNIO

Cæléstis mensæ virtúte recreátis, præsta nobis, omnípotens Deus; ut, beàti Lázari précibus et exémplo, nec persecútio, nec gládius separáre nos possit a caritáte tua, quæ est in Christo Jesu Fílio tuo Dómino nostro: Qui tecum vivit.

  

Et fit Commemoratio feriæ.