MISA EN HONOR A SAN FELIPE DIÁCONO

Del Misal propio de Jerusalén.

   

Die 6 Junii

S. Philipi Diáconi, Confessóris

Duplex.

   

Introitus. Luc. 4, 18-19. Spíritus Dómini super me, propter quod unxit me; evangelizáre paupéribus

misit me, sanáre contrítos corde. (T.P. Allelúja, allelúja). Ps. 9, 33. Exsúrge, Dómine Deus, exaltétur manus tua; ne obliviscáris páuperum. ℣. Glória Patri.

   

ORATIO

Deus, qui omnes hómines vis salvos fieri, et ad agnitiónem veritátis veníre, mitte, quǽsumus intercessióne sancti Philíppi Diáconi, operários in messem tuam, et da eis cum omni fidúcia lóqui verbum tuum. Per Dóminum.

Et fit Commemoratio S. Norberti, Episcopi et Confessoris.

ORATIO

Deus, qui beátum Norbértum Confessórem tuum átque Pontíficem, verbi tui præcónem exímium efecísti, et per eum Ecclésiam tuam nova prole fœcundásti: præsta, quǽsumus; ut, ejúsdem sufragántibus méritis, quod ore simul et ópere dócuit, te adjuvánte, exercére valeámus. Per Dóminum.

Léctio Áctuum Apostolórum

Act. 8, 26-40.

In diébus illis: Ángelus Dómini locútus est ad Philíppum, dicens: Surge, et vade contra meridiánum, ad viam quæ descéndit ab Jerúsalem in Gazam; hæc est desérta; et surgens, ábiit. Et ecce vir Ǽthiops eunúchus, potens Candácis regínæ Æthiópum, qui erat super omnes gazas ejus, vénerat adoráre in Jerúsalem. Et revertebátur, sedens super currum suum, legénsque Isaúam Prophétam. Dixit áutem Spirítus Philíppo: Accéde, et adjúnge te ad currum istum. Accúrrens autem Philíppus, audívit eum legéntem Isaíam Prophétam, et dixit: Putásne, intélligis quæ legis? Qui ait: Et quómodo possum, si non áliquis osténderit mihi? Rogávitque Philíppum ut ascénderet et sedéret secum. Locus áutem Scriptúræ quam legébat, erat hic: Támquam ovis ad occisiónem ductus est, et sicut agnus coram tondénte se sine voce, sic non apéruit os suum. In humilitáte judícium ejus sublátum est. Generatiónem ejus quis enarrábit, quóniam tollétur de terra vita ejus? Respóndens áutem eunúchus Philíppo, dixit: Obsécro te, de quo Prophéta dicit hoc? De se, an de álio áliquo? Apériens áutem Philíppus os suum, et incípiens a Scriptúra ista evangelizávit illi Jesum. Et dum irent per viam, venérunt ad quámdam áquam; et ait eunúchus: Ecce áqua, quid próhibet me baptizári? Dixit áutem Philíppus: Si credis ex toto corde, licet. Et respóndens ait: Credo Fílium Dei esse Jesum Christum. Et jussit stare currum; et descendérunt utérque in áquam, Philíppus et eunúchus, et baptizàvit eum. Cum autem ascendíssent de áqua, Spíritus Dómini rápuit Philíppum, et ámplius non vidit eum eunúchus; ibat utem per viam suam gáudens. Philíppus áutem invéntus est in Azóto, et pertránsiens evangelizábat civitátibus cunctis, donec veniret Cæsaréam.

  

Graduale. Ps. 91, 13. Justus ut palma florébit; sicut cedrus Líbani multiplicábitur in domo Dómini.

℣. Ibid. 3. Ad annuntiándum mane misericórdiam tuam, et veritátem tuam per noctem.

   

Allelúja, allelúja. ℣. Ps. 67, 12. Dóminus dabit verbum evangelizántibus, virtúte multa. Allelúja.

   

In Tempore Paschali, ommititur Graduale, et ejus loco dicitur:

Allelúja, allelúja.

℣. Ps. 67, 12. Dóminus dabit verbum evangelizántibus, virtúte multa. Allelúja.

℣. Osee, 14, 6. Justus germinábit sicut lílium; et florébit in ætérnum ante Dóminum. Allelúja.

   

Post Septuagesimam, omissis Allelúja et versu sequenti, dicitur:

Tractus. Ps 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicátur.

℣. Glória et divítiæ in domo ejus: et justítia ejus manet in sǽculum sǽculi.

✠ Sequéntia sancti Evangélii secúndum Lucam

Luc. 10, 1-9.

Designávit Dóminus et álios septuagínta duos et misit illos binos ante fáciem suam in omnem civitátem et locum, quo erat ipse ventúrus. Et dicébat illis: Messis quídem multa, operárii áutem páuci. Rogáte ergo Dóminum messis, ut mittat operários in messem suam. Ite: ecce ego mitto vos sicut agnos inter lupos. Nolite portáre sácculum, néque peram, néque calceaménta, et néminem per viam salutavéritis. In quamcúmque domum intravéritis, primum dícite: Pax huic dómui: et si ibi fúerit fílius pacis, requiéscet super illum pax vestra. Sin áutem, ad vos revertétur. In eádem áutem domo manéte, edéntes et bibéntes quæ apud illos sunt; dignus est enim operárius mercéde sua. Nolite transíre de domo in domum. Et in quamcúmque civitátem intravéritis, et suscéperint vos, manducáte quæ apponúntur vobis: et curáte infírmos, qui in illa sunt, et dícite illis: Appropinquávit in vos regnum Dei.

  

Offertorium. Matth. 28, 19. Eúntes docéte omnes gentes, baptizántes eos in nómine Patris et Fílii et Spíritus Sancti. (T.P. Allelúja).

SECRETA

Emmíte, Dómine, qui per Spíritum Sanctum beátum Philíppum in septenárium Diaconórum número elegísti, super nos, fámulos tuos, spíritum tuæ benedictiónis, ut sacris conveniénter servíre mystériis valeámus. Per Dóminum.

   

Pro S. Norberto.

SECRETA

Sancti tui, quǽsumus, Dómine, nos ubíque lætíficent: ut, dumeórum mérita recólimus, patrocínia sentiámus. Per Dóminum.

Communio. Act. 8, 39. Ibat Philíppus per viam gáudens, quía Spíritus Dómini rápuit eum. (T.P. Alleluja).

   

POSTCOMMUNIO

Córporis sacri et pretiósi Sánguinis repléti libámine; quǽsumus, Dómine Deus noster, ut grátiæ tuæ munus, quod nobis imméritis contulísti, intercedénte beáto Diácono tuo Philíppo, propítius muniéndo custódias. Per Dóminum.

   

Pro S. Norberto.

POSTCOMMUNIO

Præsta, quǽsumus, omnípotens Deus: ut, de percéptis munéribus grátias exhibéntes, intercedénte beáto Norbérto Confessóre tuo átque Pontífice, benefícia potióra sumámus. Per Dóminum.