MISA DE SANTA ROSA DE LIMA

Del Misal Romano de San Pío V. La Misa “Dilexísti” es del Común de las Santas Vírgenes, mas las Oraciones son propias. Para Hispanoamérica y la Orden Dominica, donde es Doble de 1ª Clase, existe Misa propia.

Die 30 Augusti
SANCTÆ ROSÆ A SANCTA MARÍA, VÍRGINIS LIMÁNÆ
Duplex

  

Introitus. Ps. 44, 8. Dilexísti justítiam, et odísti iniquitátem: proptérea unxit te Deus, Deus tuus, óleo lætítiæ præ consórtibus tuis. (T.P. Allelúja, allelúja.) Ps. ibid., 2. Eructávit cor meum verbum bonum: dico ego ópera mea Regi. ℣. Glória Patri.

  

ORATIO

Bonórum ómnium largítor, omnípotens Deus, qui beátam Rosam, cœléstis grátiæ rore prævéntam, virginitátis et patiéntiæ decóre Indis floréscere voluísti: da nobis fámulis tuis; ut, in odórem suavitátis ejus curréntes, Christi bonus odor éffici mereámur: Qui tecum.

 
Et fit Commemoratio Ss. Felicis et Adaucti Martyrum.

ORATIO

Majestátem tuam, Dómine, súpplices exorámus: ut, sicut nos júgiter Sanctórum tuórum commemoratióne lætíficas; ita semper supplicatióne deféndas. Per Dóminum nostrum.

    

Léctio Epístolæ beáti Pauli Apóstoli ad Corínthios.
2. Cor. 10, 17-18; 11, 1-2.

  

Fratres: Qui gloriátur, in Dómino gloriétur. Non enim, qui seípsum comméndat, ille probátus est; sed quem Deus comméndat. Útinam sustinerétis módicum quid insipiéntiæ meæ, sed et supportáte me: ǽmulor enim vos Dei æmulatióne. Despóndi enim vos uni viro vírginem castam exhibére Christo.

 
Graduale. Ps. 44, 5. Spécie tua et pulchritúdine tua inténde, próspere procéde et regna.

℣. Propter veritátem et mansuetúdinem et justítiam: et dedúcet te mirabíliter déxtera tua.

 
Allelúja, allelúja. ℣. Ibid., 15 et 16. Adducántur Regi Vírgines post eam: próximæ ejus afferéntur
tibi in lætítia. Allelúja.

 
Post Septuagesimam, omissis Allelúja et Versu sequenti, dicitur:
Tractus. Ps. 44, 11 et 12. Audi, fília, et vide, et inclína aurem tuam: quia concupívit Rex spéciem tuam.

℣. Ibid. 13 et 10. Vultum tuum deprecabúntur omnes dívites plebis: fíliæ regum in honóre tuo.

℣. Ibid., 15-16. Adducéntur Regi Vírgines post eam: próximæ ejus afferéntur tibi.

℣. Afferéntur in lætítia et exsultatióne: adducántur in templum Regis.

 
Tempore autem Paschali omíttitur Graduale, et ejus loco dicitur:
Allelúia, allelúja.

℣. Ps. 44, 15 et 16. Adducéntur Regi Vírgines post eam: próximæ ejus afferéntur tibi in lætítia. Allelúja.

℣. Ibid., 5. Spécie tua et pulchritúdine tua inténde, próspere procéde et regna. Allelúja.

  

✠ Sequéntia sancti Evangélii secúndum Matthǽum.

Matth. 25, 1-13.

  

In illo témpore: Dixit Jesus discípulis suis parábolam hanc: Simile erit regnum cœlórum decem virgínibus: quæ, accipiéntes lámpades suas, exiérunt óbviam sponso et sponsæ. Quinque autem ex eis erant fátuæ, et quinque prudéntes: sed quinque fátuæ, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Horam autem faciénte sponso, dormitavérunt omnes et dormiérunt. Média autem nocte clamor factus est: Ecce, sponsus venit, exíte óbviam ei. Tunc surrexérunt omnes vírgines illæ, et ornavérunt lámpades suas. Fátuæ autem sapiéntibus dixérunt: Date nobis de óleo vestro: quia lámpades nostræ exstinguúntur. Respondérunt prudéntes, dicéntes: Ne forte non suffíciat nobis et vobis, ite pótius ad vendéntes, et émite vobis. Dum autem irent émere, venit sponsus: et quæ parátæ erant, intravérunt cum eo ad núptias, et clausa est jánua. Novíssime vero véniunt et réliquæ vírgines, dicéntes: Dómine, Dómine, áperi nobis. At ille respóndens, ait: Amen, dico vobis, néscio vos. Vigiláte ítaque, quia nescítis diem neque horam.

 
Offertorium. Ps. 44, 10. Fíliæ regum in honóre tuo, ástitit regína a dextris tuis in vestítu deauráto, circúmdata varietate. (T.P. Allelúja.)

  

SECRETA

Acépta tibi sit, Dómine, sacrátæ plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum nostrum.

 
Et fit Commemoratio Ss. Felicis et Adaucti.

SECRETA

Hóstias, Dómine, tuæ plebis inténde: et, quas in honóre Sanctórum tuórum devóta mente célebrat, profícere sibi séntiat ad salútem. Per Dóminum.

  

Communio. Matth. 25, 4 et 6. Quinque prudéntes vírgines accepérunt óleum in vasis suis cum lampádibus: média autem nocte clamor factus est: Ecce, sponsus venit: exite óbviam Christo Dómino. (T.P. Allelúja.)

 
POSTCOMMUNIO

Satiásti, Dómine, famíliam tuam munéribus sacris: ejus, quǽsumus, semper interventióne nos réfove, cujus sollémnia celebrámus. Per Dóminum.

 
Et fit Commemoratio Ss. Felicis et Adaucti.

POSTCOMMUNIO

Repléti, Dómine, munéribus sacris: quǽsumus: ut, intercedéntibus Sanctis tuis, in gratiárum semper actióne maneámus. Per Dóminum nostrum.
 

¶ Infrascriptæ Missæ de Sancta Rosæ a Sancta María, ex Proprium Ordinem Prædicatorum, ac Diœcesibus Hispano-Americanensis et Philippinensis, dici possunt ut festivæ ubicumque, ad libitum sacerdotis, juxta rubricas. Similiter hujusmodi Missæ dici possunt etiam ut votivæ, nisi aliqua expresse excipiatur:

  

Die 30 Augusti
SANCTÆ ROSÆ A SANCTA MARÍA, VÍRGINIS LIMÁNÆ
Duplex 1. Classis

  

Introitus. Gaudeámus omnes in Dómino, diem festum celebrántes, sub honóre beátæ Rosæ Vírginis: de cujus solemnitáte gáudent Ángeli, et colláudant Fílium Dei. Ps. 44, 2. Eructávit cor meum verbum bonum: dico ego ópera mea Regi. ℣. Glória Patri.

  

ORATIO

Bonórum ómnium largítor, omnípotens Deus, qui beátam Rosam, cœléstis grátiæ rore prævéntam, virginitátis et patiéntiæ decóre Indis floréscere voluísti: da nobis fámulis tuis; ut, in odórem suavitátis ejus curréntes, Christi bonus odor éffici mereámur: Qui tecum.

 
Et fit Commemoratio Ss. Felicis et Adaucti Martyrum.

ORATIO

Majestátem tuam, Dómine, súpplices exorámus: ut, sicut nos júgiter Sanctórum tuórum commemoratióne lætíficas; ita semper supplicatióne deféndas. Per Dóminum nostrum.

    

Léctio Epístolæ beáti Pauli Apóstoli ad Corínthios.
2. Cor. 10, 17-18; 11, 1-2.

  

Fratres: Qui gloriátur, in Dómino gloriétur. Non enim, qui seípsum comméndat, ille probátus est; sed quem Deus comméndat. Útinam sustinerétis módicum quid insipiéntiæ meæ, sed et supportáte me: ǽmulor enim vos Dei æmulatióne. Despóndi enim vos uni viro vírginem castam exhibére Christo.

 
Graduale. Ps. 44, 6 et 5. Adjuvábit eam Deus vultu suo: Deus in médio ejus non commovébitur.

℣. Flúminis ímpetus lætíficat civitátem Dei, sanctificávit tabernáculum suum Altíssimus.

 
Allelúja, allelúja. ℣. Eccli. 50, 8. Quasi arcus refúlgens inter nébulas glóriæ: et cuasi flos rosárum in diébus vernis. Allelúja.

   

✠ Sequéntia sancti Evangélii secúndum Matthǽum.

Matth. 13, 31-35.

  

In illo témpore: Dixit Jesus turbis parábolam hanc: Simile erit regnum cœlórum grano sinápis, quod accípiens homo seminávit in agro suo: quod mínimum quidem est ómnibus semínibus: cum autem créverit, majus est ómnibus oléribus, et fit arbor, ita ut vólucres cœli véniant et hábitent in ramis ejus. Aliam parábolam locútus est eis: Símile est regnum cœlórum ferménto, quod accéptum múlier abscóndit in farínæ satis tribus, donec fermentátum est totum. Hæc ómnia locútus est Jesus in parábolis ad turbas: et sine parábolis non loquebátur eis: ut implerétur quod dictum erat per Prophétam dicéntem: Apériam in parábolis os meum, eructábo abscóndita a constitutióne mundi. Credo.

 
Offertorium. Eccli. 39, 17-18. Obaudíte me, divíni fructus, et quasi rosa plantáta super rivos aquárum fructificáte: quasi Líbanus odórem suavitátis habéte.

  

SECRETA

Accéptæ sint tibi, Dómine, laudis hóstiæ, quas humíliter immolámus, beátæ Rosæ Vírginis fragrántia perfúsas: ut illi conférant ad honórem: et nobis propitiatóriæ reddántur ad salútem. Per Dóminum.

 
Et fit Commemoratio Ss. Felicis et Adaucti.

SECRETA

Hóstias, Dómine, tuæ plebis inténde: et, quas in honóre Sanctórum tuórum devóta mente célebrat, profícere sibi séntiat ad salútem. Per Dóminum.

  

Communio. Eccli. 39, 19. Floréte flores quasi lílium, et collaudáte cánticum: et benedícite Dóminum in opéribus suis.

 
POSTCOMMUNIO

Ascéndant ad te, Dómine, preces nostræ beátæ Rosæ Vírginis suavitátem redoléntes: ut cœléstibus dápibus temporáliter recreáti, ætérni convívii dulcédine perfruámur. Per Dóminum.

 
Et fit Commemoratio Ss. Felicis et Adaucti.

POSTCOMMUNIO

Repléti, Dómine, munéribus sacris: quǽsumus: ut, intercedéntibus Sanctis tuis, in gratiárum semper actióne maneámus. Per Dóminum nostrum.

Quando celebratur de beata Rosa ex voto, vel devotione per annum, Officium tempore Paschali fit ut supra, addito Allelúja, post Introitum, Oftertorium, et Communionem, et loco Gradualis dicitur:

Allelúja.

℣. Quasi arcus refúlgens inter nébulas glóriæ: et quasi flos rosárum in diébus vernis. Allelúja.

℣. Matth. 28, 9. Surréxit Christus, et occúrrens muliéribus, ait: Avéte. Tunc accessérunt, et tenuérunt pedes ejus. Allelúja.

Tempore Ascensionis, post secundum Allelúja, dicitur:

℣. Eph. 4, 8. Ascéndens Christus in altum, captívam duxit captivitátem: dedit dona homínibus. Allelúja.
 
Extra temporum Paschale, dicitur

Introitus. Ps. 44, 8. Dilexísti justítiam, et odísti iniquitátem: proptérea unxit te Deus, Deus tuus, óleo lætítiæ præ consórtibus tuis. Ps. ibid., 2. Eructávit cor meum verbum bonum: dico ego ópera mea Regi. ℣. Glória Patri.

 
Cœtera ut supra nisi quod infra Septuagesimam dicitur Graduale ut supra, et omisso Allelúja cum Versu sequenti, dicitur:

Tractus. Ps. 44, 11 et 12. Audi, fília, et vide, et inclína aurem tuam: quia concupívit Rex spéciem tuam.

℣. Ibid. 13 et 10. Vultum tuum deprecabúntur omnes dívites plebis: fíliæ regum in honóre tuo.

℣. Ibid., 15-16. Adducéntur Regi Vírgines post eam: próximæ ejus afferéntur tibi.

℣. Afferéntur in lætítia et exsultatióne: adducántur in templum Regis.

   
Cœtera ut in die, excepto Credo.