MISA DE SAN LUIS MARÍA DE MONFORT

Die 28 Aprilis

S. Ludovícum Maríæ a Montfort, Confessóris

Semiduplex.

   

Introitus. Isa. 52, 7. Quam pulchri super montes pedes annuntiántis et prædicántis pacem; annuntiántis bonum, prædicántis salútem, dicéntis Sion: Regnábit Deus tuus! (T.P. Allelúja, allelúja.) Ps. 48, 2. Audíte hæc, omnes gentes; áuribus percipite, omnes qui habitátis orbem.  ℣. Glória Patri.

   

Dicitur Glória in excélsis.

   

ORATIO

Deus, qui sanctum Ludovícum Maríam regni Unigéniti Fílii tui præcónem exímium effecísti, et géminam per eum famíliam religiósam in Ecclésia tus suscitásti: concéde, propítius; ut, ipsíus mónitis et exémplo, eídem dilécto Fílio tuo, sub suávi jugo beatíssimæ Vítginis et Matris ejus, perénniter servíre valeámus: qui tecum vivit et regnat in unitáte Spíritus Sancti Deus, per ómnia sǽcula sæculórum. Amen.

Léctio Epístolæ beáti Páuli Apóstoli ad Corínthios

1. Cor. 1, 17-25.

Fratres: Non misit me Christus baptizáre, sed evangelizáre: non in sapiéntia verbi, ut non evacúetur crux Christi. Verbum enim crucis pereúntibus quídem stultítia est: iis áutem qui salvi fiunt, id est nobis, Dei virtus est. Scriptum est enim: Perdam sapiéntiam sapiéntium, et prudéntiam prudéntium reprobábo. Ubi sápiens? ubi scriba? ubi conquisítor hujus sǽculi? Nonne stultam fecit Deus sapiéntiam hujus mundi? Nam quía in Dei sapiéntia non cognóvit mundus per sapiéntiam Deum: plácuit Deo per stultítiam prædicatiónis salvos fácere credéntes. Quóniam et Judǽi signa petunt, et Græci sapiéntiam quǽrunt: nos áutem prædicámus Christum crucifíxum: Judǽis quidem scándalum, géntibus áutem stultítiam, ipsis áutem vocátis Judǽis, átque Græcis Christum Dei virtútem, et Dei sapiéntiam: quóa quod stultum est Dei, sapiŕntius est homínibus: et quod infírmum est Dei, fórtius est homínibus.

  

Allelúja, allelúja.

℣. 1. Cor. 1, 23-24. Nos áutem prædicámus Christum crucifíxum: Dei virtútem, et Dei sapiéntiam. Allelúja.

℣. Eccli. 3, 5-6. Sicut qui thesaurízat, ita et qui honoríficat matrem: et in die oratiónis suæ exaudiétur. Allelúja.

    

In Missis votivis extra Tempus Paschale dicitur:

Graduale. Ps 85, 9-10. Omnes gentes quascúmque fecísti vénient, et adorábunt coram te, Dómine, et glorificábunt nomen tuum.

℣. Quóniam magnus es tu, et fáciens mirabília; tu es Deus solus.

Allelúja, allelúja. ℣. 1. Cor. 1. 23-24. Nos áutem prædicámus Christum crucifíxum: Dei virtútem, et Dei sapiéntiam. Allelúja.

   

Post Septuagesimam, omissis Allelúja et versu sequenti, dicitur:

Tractus. Ps 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicátur.

℣. Glória et divítiæ in domo ejus: et justítia ejus manet in sǽculum sǽculi.

✠ Sequéntia sancti Evangélii secúndum Joánnem

Joann. 19, 25-27.

In illo témpore: Stabant juxta Crucem Jesu Mater ejus, et soror Matris ejus, María Cléophæ, et María Magdaléne. Cum vidísset ergo Jesus Matrem, et discípulum stantem, quem diligébat, dicit Matri suæ: Múlier, ecce fílius tuus. Deinde dicit discípulo: Ecce Mater tua. Et ex illa hora accépit eam discípulus in sua.

  

Offertorium. Ps. 115, 6-7. O Dómine, quía ego servus tuus; ego servus tuus, et fílius ancíllæ tuæ. Dirupísti víncula mea: tibi sacrificábo hóstiam láudis. (T.P. Allelúja)

SECRETA

Múnera altári tuo, Dómine, superpósita, sancto Ludovíco María intercedénte, propítius réspice, ac nos quóque per beatíssimam Vírginem Maríam hóstias tibi placéntes effícere dignáre. Per Dóminum.

Communio. Eccli. 3, 5-6. Sicut qui thesaurízat, ita et qui honoríficat matrem: et in die oratiónis suæ exaudiétur. (T.P. Alleluja)

   

POSTCOMMUNIO

Grátia tua nos, Dómine, non derelínquat: quæ, sancto Ludovíco María intercedénte, et sacræ nos déditos fáciat servitúti, et tuam nobis, per Virginem Matrem, opem semper acquírat. Per Dóminum.