MISA DE SANTA FRANCISCA JAVIER CABRINI

Misa publicada con el Suplemento del Misal para los Estados Unidos de América, con imprimátur del cardenal Francis Spelmann.

  

Die 22 Decembris

S. Francíscæ Xavériæ Cabríni, Vírginis.

Duplex 2. Classis.

   

Introitus. Ps. 72, 24. Tenuísti manum déxteram meam; et in voluntáte tua deduxísti me, et cum glória suscepísti me (T.P. Allelúja, allelúja). Ps. ibid., 1. Quam bonus Ísraël Deus his, qui recto sunt corde. ℣. Gloria Patri.

ORATIO

Dómine Jesu Christe, qui sanctam Vírginem Francíscam Xavériam, Sacratissimi Cordis tui igne succénsam, per amplíssimas mundi plagas ad ánimas tibi lucrándas deduxísti, et per eam novam in Ecclésia tua Vírginum famíliam suscitásti: concéde, quǽsumus; ut ipsa intercédente, ejúsdem Cordis tui virtútibus induámur, átque ad ætérnum beatitúdinis portum perveníre mereámur: Qui vivis et regnas.

  

Et fit Commemoratio Feriæ.

   

Léctio Epístolæ beáti Pauli Apóstoli ad Corinthios

1. Cor. 1, 26-31.

    

Fratres: Vidéte vocatiónem vestram: quia non multi sapiéntes secúndum carnem, non multi poténtes, non multi nóbiles: sed quæ stulta sunt mundi elégit Deus, ut confúndat sapiéntes: et infírma mundi elégit Deus, ut confúndat fórtia: et ignobília mundi et contemptibília elégit Deus, et ea quæ non sunt, ut ea quæ sunt destrúeret: ut non gloriétur omnis caro in conspéctu ejus. Ex ipso autem vos estis in Christo Jesu, qui factus est nobis sapiéntia a Deo, et justítia, et sanctificátio, et redémptio: ut, quemádmodum scriptum est: Qui gloriátur, in Dómino gloriétur.

  

Graduale. Ps. 17, 33-34. Deus, qui præcínxit me virtúte: et pósuit immaculátam viam meam.

℣. Qui perfécit pedes meos támquam cervórum: et super excélsa státuens me.

    

Allelúja, allelúja. ℣.  1. Cor. 9, 22. Ómnibus ómnia factus sum, ut omnes fácerem salvos. Allelúja.

   

Post Septuagesimam, omissis Allelúja et versu sequenti, dicitur:

Tractus. Ps. 17, 2-3. Díligam te. Dómine, virtus mea: Dóminus firmaméntum meum et refúgium meum et liberátor meus.

℣. Deus meus adjútor meus, et sperábo in eum; Protéctor meus, et cornu salútis meæ, et suscéptor meus.

℣. Láudans invocábo Dominum: et ab inimícis meis salvus ero.

   

Tempore autem Paschali omittitur Graduale, et ejus loco dicitur:

Allelúja, allelúja. 

℣. 1. Cor. 9, 22. Ómnibus ómnia factus sum, ut omnes fácerem salvos. Allelúja.

℣.  Ps. 72, 28. Mihi áutem adhærére Deo bonum est: ponére in Dómino Deo spem meam. Allelúja.

   

✠ Sequéntia sancti Evangélii secúndum Matthǽum.

Matth. 11, 25-30.

   

In illo témpore: Respóndens Jesus, dixit: Confíteor tibi, Pater, Dómine coeli et terræ, quia abscondísti hæc a sapiéntibus ei prudéntibus, et revelásti ea párvulis. Ita, Pater: quóniam sic fuit plácitum ante te. Ómnia mihi trádita sunt a Patre meo. Et nemo novit Fílium nisi Pater: neque Patrem quis novit nisi Fílius, et cui volúerit Fílius reveláre. Veníte ad me, omnes, qui laborátis et oneráti estis, et ego refíciam vos. Tóllite jugum meum super vos, et díscite a me, quia mitis sum et húmilis corde: et inveniétis réquiem animábus vestris. Jugum enim meum suáve est et onus meum leve.

   

Offertorium. Ps. 72, 28. Mihi áutem adhærére Deo bonum est: ponére in Dómino Deo spem meam: ut annúntiem omnes prædicatiónes tuas in portis fíliæ Sion (T.P. Allelúja). 

   

SECRETA

Múnera quæ tibi, Dómine, in honórem sanctæ Francíscæ Xavériæ Vírginis offérimus, súscipe et præsta: ut sacratíssimo Fílii tui Cordi conformáti, hóstia acceptábilis et ipsi tibi efficiámur. Per eúmdem Dóminum.

  

Et fit Commemoratio Feriæ.

Communio. Matth. 11, 28. Veníte ad me omnes qui laborátis et oneráti estis, et ego refíciam vos (T.P. Allelúja).

  

POSTCOMMUNIO

Deus, qui nos de plenitúdine Cordis dilécti Fílii tui cœléstia dona hauríre concédis: præsta, quǽsumus, ut sanctæ Francíscæ Xavériæ exémpla proseqüéntes; ejúsdem Fílii tui glóriam júgiter quærámus, et ipsíus regni prǽmia consequámur: Qui tecum vivit et regnat in unitáte.

  

Et fit Commemoratio Feriæ.