MISA DEL BEATO GASPAR DE BONO

Del Misal propio de España. La Misa Os Justi es del Común de los Confesores no pontífices, pero las oraciones son propias.

Die 4. Julii

In Festo B. Gaspáris de Bono, Confessóris.

Introitus. Ps. 36, 30-31. Os justi meditábitur sapiéntiam, et lingua ejus loquétur judícium: lex Dei ejus in corde ipsíus. (T. P. Allelúja, allelúja.) Ps. ibid., 1. Noli æmulári in malignántibus: neque zeláveris faciéntes iniquitátem. ℣. Glória Patri.

   

ORATIO

Deus, qui beátum Gaspárem Confessórem tuum insígne tuæ dilectiónis, et sacerdotális ministérii exémplar esse voluísti; da nobis ejus précibus, ut per eádem vestígiae gradiéntes, prǽmia cónsequi mereámur. Per Dóminum.

Et fit Comm. Octavæ Sanctorum Apostolorum Petri et Pauli.

ORATIO

Deus, qui hodiérnam diem Apostolórum tuórum Petri et Pauli martýrio consecrásti: da Ecclésiæ tuæ, eórum in ómnibus sequi præcéptum; per quos religiónis sumpsit exórdium. Per Dóminum nostrum.

   

Léctio libri Sapiéntiæ.

Eccli. 31, 8-11.

   

Beátus vir, qui invéntus est sine mácula, et qui post aurum non ábiit, nec sperávit in pecúnia et thesáuris. Quis est hic, et laudábimus eum? fecit enim mirabília in vita sua. Qui probátus est in illo, et perféctus est, erit illi glória ætérna: qui potuit tránsgredi, et non est transgréssus: fácere mala, et non fecit: ídeo stabilíta sunt bona illíus in Dómino, et eleemósynis illíus enarrábit omnis ecclésia sanctórum.

   

Graduale. Ps. 91, 13 et 14. Justus ut palma florébit: sicut cedrus Líbani multiplicábitur in domo Dómini.

℣. Ibid., 3. Annuntiándum mane misericórdiam tuam, et veritátem tuam per noctem.

   

Allelúja, allelúja. ℣. Jac. 1, 12. Beátus vir, qui suffert tentatiónem: quóniam, cum probátus fúerit, accípiet corónam vitæ. Allelúja.

  

Post Septuagesimam, omissis Allelúja et Versu sequenti, dicitur:

Tractus. Ps. 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicétur.

℣. Glória et divitiæ in domo ejus: et justítia ejus manet in sǽculum sǽculi.

   

Tempore autem Paschali omittitur Graduale, et ejus loco dicitur:

Allelúja, allelúja.

℣. Jac. 1, 12. Beátus vir, qui suffert tentatiónem: quóniam, cum probátus fúerit, accípiet corónam vitæ. Allelúja.

℣. Eccli. 45, 9. Amávit eum Dóminus et ornávit eum: stolam glóriæ índuit eum. Allelúja.

  

✠ Sequéntia sancti Evangélii secúndum Lucam.

Luc. 12, 35-40.

   

In illo témpore: Dixit Jesus discípulis suis: Sint lumbi vestri præcíncti, et lucérnæ ardéntes in mánibus vestris, et vos símiles homínibus exspectántibus dóminum suum, quando revertátur a núptiis: ut, cum vénerit et pulsáverit, conféstim apériant ei. Beáti servi illi, quos, cum vénerit dóminus, invénerit vigilántes: amen, dico vobis, quod præcínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc autem scitóte, quóniam, si sciret paterfamílias, qua hora fur veníret, vigiláret útique, et non síneret pérfodi domum suam. Et vos estóte paráti, quia, qua hora non putátis, Fílius hóminis véniet.

  

Offertorium. Ps. 88, 25. Véritas mea et misericórdia mea cum ipso: et in nómine meo exaltábitur cornu ejus. (T. P. Allelúja.)

   

SECRETA

Beáti Gaspáris quǽsumus, Dómine, méritis et intercessióne Spíritum nobis tuæ charitátis infúnde, ut sicut te in illo mirábilem prædicámus, ita in nos misericórdem fuísse lætémur. Per Dóminum.

   

Commemoratio Octava S. Apostolorum.

SECRETA

Hóstias, Dómine, quas nómini tuo sacrándas offérimus, apostolica prosequátur orátio: per quam nos expiári tríbuas et deféndi. Per Dóminum.

  

Communio. Matth. 24, 46-47. Beátus servus, quem, cum vénerit dóminus, invénerit vigilántem: amen, dico vobis, super ómnia bona sua constítuet eum. (T. P. Allelúja.)

   

POSTCOMMUNIO

Refécti cibo, pótuque cœlésti, te súpplices exorámus, omnípotens Deus, ut qui beáto Gaspári plenam de mundi illecébris victóriam tribuísti, nos fácias ejus imitatióne sǽculi blandiménta vitáre, et ad te puris méntibus perveníre. Per Dóminum.

   

Commemoratio Octava S. Apostolorum.

POSTCOMMUNIO

Quos cœlésti, Dómine, aliménto satiásti: apostólicis intercessiónibus ab omni adversitáte custódi. Per Dóminum nostrum.