MISA DE LA ASUNCIÓN DE NUESTRA SEÑORA

Del Misal Romano de San Pío V. Esta era la Misa observada antes de 1951, cuando se hizo el formulario “Signum Magnum” para la Misa, y se ha conservado en los monasterios benedictinos.

 

Die 15 Augusti

In festo Assumptionis Beatæ Mariæ Virginis

Duplex 1. classis

 

Introitus. Gaudeámus omnes in Dómino diem festum celebrántes sub honóre beátæ Maríæ Vírginis: de cujus Assumptióne gaudent Ángeli, et colláudant Fílium Dei. Ps. 44, 2. Eructávit cor meum verbum bonum: dico ego ópera mea Regi. ℣. Glória Patri.

ORATIO

Famulórum tuórum quǽsumus Dómine, delíctis ignósce: ut, qui tibi plácere de áctibus nostris non valémus, Genitrícis Fílii tui Dómini nostri intercessióne salvémur. Qui tecum vivit et regnat in unitáte Spíritus Sancti, Deus, per ómnia sǽcula sæculórum. Amen.

  

Léctio libri Sapiéntiæ.

Eccles. 24, 11-13, 15-20.

 

In ómnibus réquiem quæsívi, et in hæreditáte Dómini morábor. Tunc præcépit, et dixit mihi Creator ómnium: et qui creávit me, requiévit in tabernáculo meo, et dixit mihi: In Jacob inhábita, et in Israël hæreditáre, et in eléctis meis mitte radíces. Et sic in Sion firmáta sum, et in civitáte sanctificáta simíliter requiévi, et in Jerúsalem potéstas mea. Et radicávi in pópulo honorificáto, et in parte Dei mei hæréditas illíus, et in plenitúdine sanctórum deténtio mea. Quasi cedrus exaltáta sum in Líbano, et quasi cypréssus in monte Sion. Quasi palma exaltáta sum in Cades, et quasi plantátio rosæ in Jericho. Quasi oliva speciósa in campis, et quasi plátanus exaltáta sum juxta áquam in pláteis. Sicut cinnamómum, et bálsamum aromatízans odórem dedi: quasi myrrha elécta dedi suavitátem odóris.

 

Graduale. Ps. 44, 5, 11 et 12. Propter veritátem, et mansuetúdinem, et justítiam, et dedúcet te mirabíliter déxtera tua.

℣. Audi fília,et vide et inclína áurea tuam: quia concúpivit Rex spécies tuam.

 

Allelúja, allelúja. ℣. Assúmpta est María in Cœlum, gaudet exércitus Angelórum. Allelúja.
  

✠ Sequéntia sancti Evangélii secúndum Lucam.

Luc. 10, 38-42.

 

In illo témpore: Intrávit Jesus in quóddam castéllum: et múlier quædam, Martha nómine, excépit illum in domum suam: et huic erat soror nómine María, quæ étiam sedens secus pedes Dómini, audíebat verbum illíus. Martha autem satagébat circa frequens ministérium quæ stetit, et ait: Dómine non est tibi curæ quod soror mea relíquit me solam ministráre? dic ergo illi ut me adjúvet. Et respóndens dixit illi Dóminus: Martha, Martha, sollícita es, et turbáris erga plúrima: porro unum est necessárium. María óptimam partem elégit, quæ non auféretur ab ea.

 

Et dicitur Credo.

 

Offertorium. Assúmpta est María in cœlum: gaudent Ángeli, collaudántes benedícunt Dóminum, allelúja.

 

SECRETA

Subvéniat, Dómine, plebi tuae Dei Genetrícis orátio: quam etsi pro conditióne carnis migrásse cognóscimus, in cœlésti glória apud te pro nobis intercedére sentiámus. Per Dóminum nostrum.

 

Præfatio de B. Mariæ Virginis: Et te in Assumptióne, quæ dicitur per totam Octavam, etiam in Festis.

Vere dignum et justum est, ǽqum et salutáre, nos tibi semper, et ubíque grátias ágere: Dómine sancte, Pater omnípotens, ætérne Deus. Et te in Assumptióne beátæ Maríæ semper Vírginis collaudáre, benedícere, et prædicáre. Quæ et Unigénitum tuum Sancti Spíritus obumbratióne concépit, et virginitátis glória permanénte, lumen ætérnum mundo effúdit, Jesum Christum Dóminum nostrum. Per quem majestátem tuam laudant Ángeli, adórant Dominatiónes, tremunt Potestátes cœli cœlorúmque Virtútes, ac beáta Séraphim, sócia exsultatióne concélebrant. Cum quibus et nostras voces ut admítti júbeas deprecámur, súpplici confessióne dicéntes:

 

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

 

Communio. Luc. 10, 42. Óptimam partem elégit sibi María: quæ non auferétur ab ea in ætérnum.

POSTCOMMUNIO

Mensæ cœlestis partícipes effécti, implorámus cleméntiam tuam, Dómine Deus noster ut, qui Assumptiónem Dei Genetrícis cólimus, a cunctis malis imminéntibus, ejus intercessióne liberémur. Per Dóminum nostrum.

Infra Octavæ Assumptionis Beatæ Mariæ, et in ejus die Octava, fit idem Officium, quod in die Festi. Et infra Octavam, dicitur secunda Oratio de Spiritu Sancto, Deus qui corda, tertia Ecclésiæ.

2. Oratio de Spiritu Sancto
ORATIO
Deus, qui corda fidélium Sancti Spíritus illustratióne docuísti: da nobis in eódem Spíritu recta sápere; et de ejus semper consolatióne gaudére.
    
SECRETA
Múnera, quǽsumus, Dómine, obláta sanctífica: et corda nostra Sancti Spíritus illustratióne emúnda.
  
POSTCOMMUNIO
Sancti Spíritus, Dómine, corda nostra mundet infúsio: et sui roris íntima aspersióne fœcúndet.
   
3. contra persecutores Ecclesiæ
ORATIO
Ecclesiæ tuæ, quǽsumus, Dómine, preces placátus admítte: ut, destrúens adversitatibus et erróribus univérsis, secúra tibi sérviat libertáte. Per Dóminum.
  
SECRETA
Protége nos, Dómine, tuis mystériis serviéntes: ut, divínis rebus inhæréntes, et córpore tibi famulémur et mente. Per Dominum.
   
POSTCOMMUNIO
Quǽsumus, Dómine, Deus noster: ut, quos divína tríbuis participatióne gaudére, humánis non sinas subjácere perículis. Per Dóminum nostrum.