MISA DE LOS SANTOS MÁRTIRES RODRIGO Y SALOMÓN

Del Misal propio de Córdoba (España).

   

Die 13 Martii

IN FESTO SANCTÓRUM RUDERÍCI ET SALOMÓNIS, MÁRTYRUM.

   

Introitus. Eccli. 44, 15 et 14. Sapiéntiam sanctórum narrent pópuli, et laudes eórum núntiet ecclésia: nómina autem eórum vivent in sǽculum sǽculi. Ps. 32, 1. Exsultáte, justi, in Dómino: rectos decet collaudátio. ℣. Glória Patri.

  

ORATIO

Deus, qui nos Beatórum Mártyrum tuórum Ruderíci, et Salomónis tríbuis solemnitáti gloriári, concéde quǽsumus, ut ad meliórem vitam eórum exémpla nos provócent, quórum venerándam passiónem ánnua devotióne recólimus. Per Dóminum.

 

Lectio libri Sapientiæ.

Sap. 5, 10-20.

 

Justi áutem in perpétuum vivent, et apud Dóminum est merces eórum, et cogitátio illórum apud Altíssimum. Ideo accípient regnum decóris, et diadéma speciéi de manu Dómini: quóniam déxtera teget eos, et bráchio sancto suo deféndet illos. Accípiet armatúram zelus illíus, et armábit creatúram ad ultiónem inimicórum. Índuet pro thoráce justítiam, et accípiet pro gálea judícium certum. Sumet scutum inexpugnábile, æquitátem. 

   

Graduale. Ps. 123, 7. Ánima nostra sicut passer erépta est de láqueo venántium:

℣. Láqueus contrítus est, et nos liberáti sumus: adjutórium nostrum in nómine Dómini, qui fecit cœlum et terram.

Allelúja, allelúja. Ps. 68, 4. Justi epuléntur, et exsúltent in conspéctu Dei, et delecténtur in lætítia. Allelúja.

Post Septuagesimam, ommiso Allelúja et versu sequenti, dicitur:

  

Tractus. Ps. 125, 5-6. Qui séminant in lácrimis, in gáudio metent.

℣. Eúntes ibant et flebant, mitténtes sémina sua.

℣. Veniéntes áutem vénient cum exsultatióne, portántes manípulos suos.

  

✠ Sequéntia Sancti Evangélii secúndum Lucam.

Luc. 21, 9-19.

  

In illo témpore: Dixit Jesus discípulis suis: Cum audiéritis prœ́lia et seditiónes, nolíte terréri: opórtet primum hæc fíeri, sed nondum statim finis. Tunc dicébat illis: Surget gens contra gentem, et regnum advérsus regnum. Et terræmótus magni erunt per loca, et pestiléntiæ, et fames, terrorésque de cœlo, et signa magna erunt. Sed ante hæc ómnia injícient vobis manus suas, et persequéntur tradéntes in synagógas et custódias, trahéntes ad reges et prǽsides propter nomen meum: contínget áutem vobis in testimónium. Pónite ergo in córdibus vestris non præmeditári, quemádmodum respondeátis. Ego enim dabo vobis os et sapiéntiam, cui non potérunt resístere et contradícere omnes adversárii vestri. Tradémini áutem a paréntibus, et frátribus, et cognátis, et amícis, et morte affícient ex vobis: et éritis ódio ómnibus propter nomen meum: et capíllus de cápite vestro non períbit. In patiéntia vestra possidébitis ánimas vestras.

   

Offertorium. Ps. 149, 5-6. Exsultábunt sancti in glória, lætabúntur in cubílibus suis: Exaltatiónes Dei in fáucibus eórum.

SECRETA

Has tibi, Dómine, láudis hóstias immolámus supplíciter exorántes, ut Beatórum Mártyrum tuórum Ruderíci, et Salomónis veneránda confessióne, ab ómnibus mentis, et córporis perículis liberémur. Per Dóminum.

Communio. Luc. 12, 4. Dico áutem vobis, amícis meis: ne terreámini ab his, qui vos persequúntur.

  

POSTCOMMUNIO

Salutáribus, Dómine, repléti mystériis te súpplices exorámus, ut Beatórum Mártyrum tuórum Ruderíci, et Salomónis intercéssio perpétua hæc tuæ circa nos pietátis dona custódiat. Per Dóminum.