MISA EN HONOR A SAN DIMAS, EL BUEN LADRÓN

Misa propia de Jerusalén.

Die 26 Martii

In festo S. Dismæ Boni Latrónis, Confessóris

Duplex.

Introitus. Gal. 6, 14. Nos áutem gloriári opórtet in Cruce Dómini nostri Jesu Christi: in quo est salus, vita et resurréctio nostra: per quem salváti et liberáti sumus. Ps, 66, 2. Deus misereátur nostri, et benedícat nobis: illúminet vultum suum super nos, et misereátur nostri. ℣. Glória Patri.

ORATIO

Omnípotens et misércors Deus, qui justíficas ímpios; te supplíciter exorámus, ut nos benígno intúitu, quo Unigénitus tuus Beátum traxit Latrónem, ad dignam pœniténtiam próvoces, et illam, quam ei promísit, tribus nobis glóriam sempitérnam. Per eúndem Dóminum.

  

Et fit commemoratione Feriæ.

  

Lectio Isaiæ Prophetæ.

Is. 59, 1-4.

Ecce non est abbreviáta manus Dómini, ut salváre néqueat, néque aggraváta est áuris ejus, ut non exáudiat. Sed iniquitátes vestræ divisérunt inter vos et Deum vestrum; et peccáta vestra abscondérunt fáciem ejus a vobis, ne exaudíret. Manus enim vestræ pollútæ sunt sánguine, et dígiti vestri iniquitáte; lábia vestra locúta sunt mendácium, et língua vestra iniquitátem fatur. Non est qui ínvocet justítiam, néque est qui júdicet vere: sed confídunt in níhilo, et loquúntur vanitátes; concéperunt labórem, et pepérerunt iniquitátem.

Graduale. Philip. 2, 8-9. Christus factus obœ́diens úsque ad mortem, mortem áutem crucis.

℣. Propter quod et Deus exaltávit illum, et donávit illi nomen, quod est super omne nomen.

Tractus. Adorámus te, Christe, et benedícimus tibi, quía per Crucem tuam redemísti mundum.

℣. Tuam Crucem adorámus, Dómine, tuam gloriósam recólimus Passiónem; miserére nostri, qui passus es pro nobis.

℣. O Crux benedícta, quæ sola fuísti digna portáre Regem cœlórum et Dóminum.

  

In tempore Paschali, Graduale ommittitur, et ejus loco dicitur:

Allelúja, allelúja.

℣. Ps. 95, 10. Dícite in géntibus, quia Dóminus regnávit a ligno. Allelúja.

℣. Dulce lignum, dulces clavos, dúlcia ferens póndera: quae sola fuísti digna sustinére Regem cœlórum et Dóminum. Allelúja.

   

In Missis votivis per annum, dicitur:

Graduale. Philip. 2, 8-9. Christus factus obœ́diens úsque ad mortem, mortem áutem crucis.

℣. Propter quod et Deus exaltávit illum, et donávit illi nomen, quod est super omne nomen.

   

Allelúja, Allelúja. ℣. Dulce lignum, dulces clavos, dúlcia ferens póndera: quae sola fuísti digna sustinére Regem cœlórum et Dóminum. Allelúja.

  

✠ Sequéntia sancti Evangélii secúndum Lucam.

Luc. 23, 39-43.

   

In illo témpore: Unus áutem de his, qui pendébant, latrónibus, blasphemébat eum, dicens: Si tu es Christus, salvum fac temetípsum et nos. Respóndens áutem alter increpábat eum, dicens: Néque tu times Deum, quod in eádem damnatióne es. Et nos quídem juste, nam digna factis recípimus: hic vero nihil mali gessit. Et dicébat ad Jesum: Dómine, meménto mei cum véneris in regnum tuum.  Et dixit illi Jesus: Amen dico tibi: hódie mecum eris in Paradíso.

Offertorium. Ps 117, 16. Déxtera Dómini fecit virtútem; déxtera Dómini exaltávit me: déxtera Dómini fecit virtútem. Non móriar, sed vivam, et narrábo ópera Dómini.

SECRETA

Hæc oblátio, nos, Domine, quǽsumus, ab ómnibus purget offénsis quæ in ara Crucis étiam tótius mundi tulit offénsam. Per Dóminum.

  

Et fit commemoratio de Feria.

   

Præfatio de Cruce.

Vere dignum et justum est, ǽquum et salutáre, nos tibi semper et ubíque grátias ágere: Dómine sancte, Pater omnípotens, ætérne Deus: Qui salútem humáni géneris in ligno Crucis constituísti: ut, unde mors oriebátur, inde vita resúrgeret: et, qui in ligno vincébat, in ligno quoque vincerétur: per Christum, Dóminum nostrum. Per quem majestátem tuam láudant Ángeli, adórant Dominatiónes, tremunt Potestátes. Cœli cœlorúmque Virtútes ac beáta Séraphim sócia exsultatióne concélebrant. Cum quíbus et nostras voces ut admítti júbeas, deprecámur, súpplici confessióne dicéntes:

   

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

    

Communio. Luc. 15, 10. Dico vobis: Gáudium est Ángelis Dei super uno peccatóre pœniténtiam agéntem.

POSTCOMMUNIO

Dómine Jesu Christe, Fili Dei vivi, qui in patíbulo Crucis pendens, Latróni confiténti paradísi gáudia promisísti; te humíliter deprecámur, ut post óbitum nostrum paradísi jánuas nos gaudénter introíre concédas. Qui vivis et regnas cum Deo Patre, in unitáte Spíritus Sancti, Deus, per ómnia sǽcula sæculórum. Amen.

  

Et fit commemoratio de Feria.