MISA DE NUESTRA SEÑORA DE LA SALETTE

Misa aprobada por la Sagrada Congregación de Ritos el 22 de Febrero de 1943 para la diócesis de Grenoble.

  

Die 19 Septembris

BEÁTÆ MARÍÆ VÍRGINIS A LA SALÉTTE, RECONCILIATRÍCIS PECCATÓRUM

Duplex I. classis.

Introitus. Hebr. 4, 16. Adeámus cum fidúcia ad thronum grátiæ, ut misericórdiam consequámur, et grátiam inveniámus in auxílio opportúno. Ps. 88, 2. Misericórdias Dómini in ætérnum cantábo: in generatiónen et generatiónem annuntiábo veritátem tuam in ori meo. ℣. Glória Patri.

  

ORATIO

Dómine Jesu Christi, qui Sánguine tuo pretióso mundum Deo Patri reconciliásti, et Matrem tuam peccatórum Reconciliatrícem constitúere dignátus es: tríbue, quǽsumus, ut ejúsdem Beatíssimæ Vírginis Maríæ, pia intercessióne nostrórum delictórum véniam consequámur. Qui vivis et regnas cum eódem Deo Patri in unitáte Spíritus Sancti, Deus, per ómnia sǽcula sæculórum. Amen.

 

Et, in Missis privatis tantum, fit Commemoratio Ss. Januarii et sociis Martirum.

ORATIO

Deus, qui nos ánnua sanctórum Mártyrum tuórum Januárii et Sociórum ejus solemnitáte lætíficas: concéde propítius; ut, quorum gaudémus méritis, accendámur exémplis. Per Dóminum.

 

Léctio libri Génesis.

Gén. 9, 8-17.

 

Hæc dixit Deus ad Noë, et ad fílios ejus cum eo: Ecce ego státuam pactum meum vobíscum, et cum sémine vestro post vos: et ad omnem ánimam vivéntem, quæ est vobíscum, tam in volúcribus quam in juméntis et pecúdibus terræ cunctis, quæ egréssa sunt de arca, et univérsis béstiis terræ. Statuam pactum meum vobíscum, et nequáquam ultra interficiétur omnis caro áquis dilúvii, néque erit deínceps dilúvium dissípans terram. Dixítque Deus: Hoc signum fœ́deris quod do inter me et vos, et ad omnem ánimam vivéntem, quæ est vobíscum in generatiónes sempitérnas: Arcum meum ponam in núbibus, et erit signum fœ́deris inter me et inter terram. Cúmque obdúxero núbibus cœlum, apparébit arcus meus in núbibus: et recordábor fœ́deris mei vobíscum, et cum omni ánima vivénte quæ carnem végetat: et non erunt ultra aquæ dilúvii ad deléndum univérsam carnem. Éritque arcus in núbibus, et vidébo illum, et recordábor fœ́deris sempitérni quod pactum est inter Deum et omnem ánimam vivéntem univérsæ carnis quæ est super terram. Dixítque Deus ad Noë: Hoc erit signum fœ́deris, quod constítui inter me et omnem carnem super terram.

 

Graduale. Ps. 35, 6 et 8. Dómine, in cœlo misericórdia tua: et véritas tua úsque ad nubes.

℣. Multiplicásti misericórdiam tuam, Deus: fílium áutem hóminum in tégmine alárum tuárum sperábunt.

 

Allelúja, allelúja. ℣. Gen. 9, 17. Dixítque Deus ad Noë: Hoc erit signum fœ́deris, quod constítui inter me et omnem carnem super terram. Allelúja.

✠ Sequéntia sancti Evangélii secúndum Joánnem.

Joann. 19, 25-27.

  

In illo témpore: Stabant juxta crucem Jesu mater ejus, et soror matris ejus María Cléophæ, et María Magdaléne. Cum vidísset ergo Jesus matrem, et discípulum stantem, quem diligébat, dicit matri suæ: Múlier, ecce fílius tuus. Deinde dicit discípulo: Ecce mater tua. Et ex illa hora accépit eam discípulus in sua.

  

Credo.

  

Offertorium. Jer. 18, 20. Recordáre, Virgo Mater, in conspéctu Dei, ut loquáre pro nobis bona, et ut avértat indignatiónem suam a nobis.

 

SECRETA

Hóstias tibi, Dómine, placatiónis et laudis offérimus: ut, intercedéntem Beatíssima Vírgine María, peccatórum Reconciliatríce, et delícta nostra miserátus absólvat et nutántia corda tu dirígas. Per Dóminum.

  

Commemoratio Ss. Januarii et sociorum Martirum.

SECRETA

Oblátis, quǽsumus, Dómine, placáre munéribus: et, intercedéntibus sanctis Martýribus tuis Januário et Sóciis ejus, a cunctis nos defénde perículis. Per Dóminum.

  

Præfatio de Beatæ Mariæ Virginem: Et te in Festivitáte (In Missis votivis: Et te in Veneratióne).

Vere dignum et justum est, ǽquum et salutáre, nos tibi semper et ubique grátias ágere: Dómine sancte, Pater omnípotens, ætérne Deus:  Et te in Festivitate beátæ Maríæ semper Vírginis collaudáre, benedícere et prædicáre. Quæ et Unigénitum tuum Sancti Spíritus obumbratióne concépit: et virginitátis glória permanénte, lumen ætérnum mundo effúdit, Jesum Christum Dóminum nostrum. Per quem Majestátem tuam láudant Ángeli, adórant Dominatiónes, tremunt Potestátes, Cœli, cœlorúmque Virtútes, ac beáta Séraphim, sócia exsultatióne concélebrant. Cum quibus et nostras voces, ut admítti júbeas deprecámur, súpplici confessióne dicéntes:
  

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

Communio. Regína mundi digníssima, María, Virgo perpétua, intercéde pro nostra pace et salúte, quæ genuísti Christum Dóminum, Salvatórem ómnium.

POSTCOMMUNIO

Subvéniat nobis, Dómine, Beatíssimæ Maríæ Vírginis Reconciliatrícis jugi intercessióne: ut, per hæc sacrosáncta commércia, et miseratiónis tuæ grátiam et redemptiónis ætérnæ prǽmium consequámur. Per Dóminum.

Commemoratio Ss. Januarii et sociorum Martirum.

POSTCOMMUNIO

Hæc nos commúnio, Dómine, purget a crímine; et, intercedéntibus sanctis Martýribus tuis Januário et Sóciis ejus, cœléstis remédii fáciat esse consórtes. Per Dóminum.

 

¶  Si hoc Festum occuret in Feriæ Quatuor Temporum, fit commemoratio illius, et legitur hujus Evangelio in fine. In die Sabbato, in locis quæ hoc festum non est Duplex 1. Classis, fit commemoratio Vigilia anticipata S. Matthæi Apostoli.