MISA DE SANTA CLARA DE MONTEFALCO

Del Misal Romano de San Pío V (La Misa Vultum tuum es del Común de las Santas Vírgenes, pero las oraciones son propias).

  

Die 17 Augusti

In festo Sanctæ Claræ de Montefalco, Vírgine.

  

Introitus. Ps. 44, 13, 15 et 16. Vultum tuum deprecabúntur omnes dívites plebis: adducéntur Regi vírgines post eam: próximæ ejus adducéntur tibi in lætítia et exsultatióne. (T. P. Allelúja, allelúja). Ps. ibid, 2. Eructávit cor meum verbum bonum: dico ego ópera mea Regi. ℣. Glória Patri.

   

ORATIO

Deus, qui Beátam Vírginem tuam Claram claríficans in ipsíus corde passiónis tuæ Trinitátis mystéria renovásti: præsta quǽsumus, ejus précibus, et imitatióne, sic tuæ passiónis amaritúdine recordári, ut Trinitátis beatitúdine pérfrui mereámur. Qui cum Patre, et Spirítui Sancto in Trinitáte vivis, et regnas ómnia sǽcula sæculórum. Amen.

  

Commemoratio Octavæ Assumptione B. Mariæ V.

ORATIO

Omnípotens sempitérne Deus, qui Immaculátam Vírginem Maríam, Fílii tui genitrícem, córpore et ánima ad cœléstem glóriam assumpsísti: concéde, quǽsumus; ut, ad superna semper inténti, ipsíus glóriæ mereámur esse consórtes. Per eúndem Dóminum.

  

Léctio Epístolæ beáti Pauli Apóstoli ad Corínthios.

1. Cor. 7, 25-34.

   

Fratres: De virgínibus præcéptum Dómini non hábeo: consílium áutem do, támquam misericórdiam consecútus a Dómino, ut sim fidélis. Exístimo ergo hoc bonum esse propter instántem necessitátem, quóniam bonum est hómini sic esse. Alligátus es uxóri? noli quǽrere solutiónem. Solútus es ab uxóre? noli quǽrere uxórem. Si áutem accéperis uxórem, non peccásti. Et si núpserit virgo, non peccávit: tribulatiónem tamen carnis habébunt hujúsmodi. Ego autem vobis parco. Hoc ítaque dico, fratres: Tempus breve est: réliquum est, ut et qui habent uxóres, támquam non habéntes sint: et qui flent, támquam non flentes: et qui gáudent, támquam non gaudéntes: et qui emunt, támquam non possidéntes, et qui utúntur hoc mundo, támquam non utántur: prǽterit enim figúra hujus mundi. Volo áutem vos sine sollicitúdine esse. Qui sine uxóre est, sollícitus est, quæ Dómini sunt, quómodo pláceat Deo. Qui áutem cum uxóre est, sollícitus est, quæ sunt mundi, quómodo pláceat uxóri, et divísus est. Et múlier innúpta, et virgo cógitat quæ Dómini sunt, ut sit sancta córpore, et spíritu: in Christo Jesu Dómino nostro.

   

Graduale. Ps. 44, 12. Concupívit Rex decórem tuum, quóniam ipse est Dóminus Deus tuus.

℣. Ibid., 11. Audi, fília, et vide, et inclína aurem tuam.

    

Allelúja, allelúja. ℣. Hæc est virgo sápiens, et una de número prudéntum. Allelúja.

   

Post Septuagesimam, omissis Allelúja et Versu sequenti, dicitur:

Tractus. Ps. 44, 12, 13 et 10. Quia concupívit Rex spéciem tuam.

℣. Vultum tuum deprecabúntur omnes dívites plebis: fíliæ regum in honóre tuo.

℣. Ibid., 15-16. Adducéntur Regi vírgines post eam: próximæ ejus afferéntur tibi.

℣. Afferéntur in lætítia, et exsultatióne: adducéntur in templum Regis.

   

Tempore autem Paschali omittitur Graduale, et ejus loco dicitur:

Allelúja, allelúja.

℣. Hæc est virgo sápiens, et una de número prudéntum. Allelúja.
℣. Sap. 4, 1. O, quam pulchra est casta generátio cum claritáte! Allelúja.

  

✠ Sequéntia sancti Evangélii secúndum Matthǽum.

Matth. 19, 3-12.

  

In illo témpore: Accessérunt ad Jesum pharisǽi tentántes eum, et dicéntes: Si licet hómini dimíttere uxórem suam quacúmque ex cáusa? Qui respóndens, ait eis: Non legístis, quia, qui fecit hóminem ab inítio, másculum et féminam fecit eos? et dixit: Propter hoc dimíttet homo patrem et matrem, et adhærébit uxóri suæ, et erunt duo in carne una. Ítaque jam non sunt duo, sed una caro. Quod ergo Deus conjúnxit, homo non séparet. Dicunt illi: Quid ergo Móyses mandávit dare libéllum repúdii, et dimíttere? Ait illis: Quóniam Móyses ad durítiam cordis vestri permísit vobis dimíttere uxóres vestras: ab inítio áutem non fuit sic. Dico autem vobis, quía quicúmque dimíserit uxórem suam, nisi ob fornicatiónem, et áliam dúxerit, mœchátur: et qui dimíssam dúxerit, mœchátur. Dicunt ei discípuli ejus: Si ita est cáusa hóminis cum uxóre, non éxpedit núbere. Qui dixit illis: Non omnes cápiunt verbum istud, sed quíbus datum est. Sunt enim eunúchi, qui de matris útero sic nati sunt: et sunt eunúchi, qui facti sunt ab homínibus: et sunt eunúchi, qui seípsos castravérunt propter regnum cœlórum. Qui potest cápere, cápiat.

 

Offertorium. Ps. 44, 15 et 16. Afferéntur Regi vírgines post eam: próximæ ejus afferéntur tibi in lætítia et exsultatióne: adducéntur in templum Regi Dómino (T. P. Allelúja).

SECRETA

Adsit nobis, quǽsumus, Dómine Jesu Christe, Beátæ Claræ, pia, húmilis, et devóta supplicátio, in cujus corde prerogatíva mirábili passiónis tuæ mystéria renovásti; præsta: et virtúte præséntis oblatiónis tuæ passiónis, circa nos benefícia júgiter sentiámus. Qui vivis et regnas cum Deo Patre in unitáte Spíritus Sancti Deus, per ómnia sǽcula sæculórum. Amen.

  

Pro octavæ Assumptione B. Mariæ V.

SECRETA

Ascéndat ad te, Dómine, nostræ devotiónis oblátio, et, beatíssima Vírgine María in cœlum assumpta intercedénte, corda nostra, caritátis igne succénsa, ad te júgiter ádspirent. Per Dóminum. 

  

Præfatio de B. Mariæ Virginis: Et te in Assumptióne, per ratione Octavam.

Vere dignum et justum est, ǽqum et salutáre, nos tibi semper, et ubíque grátias ágere: Dómine sancte, Pater omnípotens, ætérne Deus. Et te in Assumptióne beátæ Maríæ semper Vírginis collaudáre, benedícere, et prædicáre. Quæ et Unigénitum tuum Sancti Spíritus obumbratióne concépit, et virginitátis glória permanénte, lumen ætérnum mundo effúdit, Jesum Christum Dóminum nostrum. Per quem majestátem tuam laudant Ángeli, adórant Dominatiónes, tremunt Potestátes cœli cœlorúmque Virtútes, ac beáta Séraphim, sócia exsultatióne concélebrant. Cum quibus et nostras voces ut admítti júbeas deprecámur, súpplici confessióne dicéntes:

 

Sanctus, Sanctus, Sanctus Dóminus, Deus Sábaoth. Pleni sunt cœli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

      

Communio. Matth. 13, 45-46. Símile est regnum cœlórum hómini negotiatóri, quærénti bonas margarítas: invénta autem una pretiósa margaríta, dedit ómnia sua, et comparávit eam. (T. P. Allelúja).

POSTCOMMUNIO

Omnípotens sempitérne Deus, qui frigescénte mundo ad inflammándum corda nostra in corde Beátæ Claræ passiónis tuæ mystéria renovásti: concéde propítius, ut ejus précibus, et méritis dignos fructus pœniténtiæ faciámus. Qui vivis et regnas cum Deo Patre in unitáte Spíritus Sancti Deus, per ómnia sǽcula sæculórum. Amen.

 

Pro octavæ Assumptione B. Mariæ V.

POSTCOMMUNIO

Sumptis, Dómine, salutáribus sacraméntis: da, quǽsumus; ut, méritis et intercessióne beátæ Vírginis Maríæ in cœlum assúmptæ, ad resurrectiónis glóriam perducámur. Per Dóminum nostrum.