MISA DE LA AURORA DE LA NATIVIDAD DE SAN JUAN BAUTISTA

En el Sacramentario de Gelona y en las copias antiguas del Sacramentario Gregoriano había una “Misa de Aurora” a San Juan Bautista, que era de esta forma (Las lecciones fueron tomadas del Misal Parisiense).

   

Die 24 Junii (in mane)

NATIVITATE S. JOÁNNIS BAPTÍSTÆ

Introitus. Ps. 91, 13-14. Justus ut palma florébit: sicut cedrus Líbani multiplicábitur: plantátus in domo Dómini, in atriis domus Dei nostri. ℣. Ps. Ibid., 2. Bonum est confitéri Dómino: et psállere nómini tuo, Altíssime. Glória Patri.

    

ORATIO

Concéde, quǽsumus, omnípotens Deus, ut qui beati Joánnis Baptístæ solémnia cólimus, ejus apud te intercessióne muniámur. Per Dóminum.

  

Léctio Isaíæ Prophétæ.

Isa. 48, 17-19.

   

Hæc dicit Dóminus, redemptor tuus, Sanctus Ísraël: Ego Dóminus Deus tuus, docens te útilia, gubérnans te in via qua ámbulas. Útinam attendísses mandáta mea:facta fúisset sicut flumen pax tua, et justítia tua sicut gúrgites maris: et fúisset quasi aréna semen tuum,et stirps úteri tui ut lápilli ejus; non intérisset et non fúisset attrítum nomen ejus a fácie mea.

   

Graduale. Ps. 91, 13-14. Justus ut palma florébit: sicut cedrus Líbani multiplicábitur: plantátus in domo Dómini, in átriis domus Dei nostri.

℣. Ps. Ibid., 2. Ad annuntiándum mane misericórdiam tuam, et veritátem tuam per noctem.

   

Allelúja, allelúja. ℣. Matth. 11, 11. Inter natos muliérum, non surréxit major Joánne Baptísta.

   

SEQUÉNTIA

Præcursórem summi regis

Et præcónem novæ legis

Celebrat Ecclésia.

In hac luce tam festiva

Gáude mater et votíva

Depróme præcónia.

   

Hujus ortum venerémur,

Sed nec minus delectémur,

In ejus martýrio.

Totus mundus sit jocúndus,

Nulli martyr hic secúndus

Virtúte vel prǽmio.

    

Non est nostræ parvitátis

Virum tantæ sanctitátis

Laudáre per ómnia.

Summa rei recitétur,

Ut afféctus inflammétur

Ex ejus memória.

    

Non arúndo levitátis,

Sed colúmna veritátis,

Nulla palpans crímina.

Scribas tangit et doctóres,

Vocans legis transgressóres

Víperæ genímina.

Argúebat hic Heródem,

Nec terrétur ab eódem 

Ligátus in cárcere.

Fert injúste justus pœnam,

Rem detéstans tam obscoenam

Regis et adúlteræ.

Sævit in hunc vis tyránni,

Laus accréscit hinc Joánni,

Tyránno supplícium.

Stultus servit sapiénti,

Quia justus in præsénti

Purgátur per ímpium.

In natális sui cœna,

Capitáli plecti pœna

Joánnem rex ímperat.

Speculátor saltatríci,

Saltátrix dat genitríci

Caput, quod petíerat.

Crux præsígnat sublimári

Christum, sed hunc minorári

Cápitis abscísio.

Mors est justi preciósa,

Quam præcéssit gloriósa

Vitæ conversátio.

     

Nos ad láudem tui, Christe, 

Præcursóris et baptístæ 

Cólimus solénnia.

Tu nos ab hac mortis valle, 

Duc ad vitam recto calle 

Per ejus vestígia. 

Amen. Allelúja.

   

✠ Sequéntia sancti Evangélii secúndum Lucam.

Luc. 1, 18-25.

    

In illo témpore: Dixit Zacharías ad Ángelum: Unde hoc sciam? ego enim sum senex, et uxor mea procéssit in diébus suis. Et respóndens Ángelus dixit ei: Ego sum Gábriel, qui asto ante Deum: et missus sum lóqui ad te, et hæc tibi evangelizáre. Et ecce eris tacens, et non póteris lóqui úsque in diem quo hæc fiant, pro eo quod non credidísti verbis meis, quæ implebúntur in tempore suo. Et erat plebs exspéctans Zacharíam: et mirábantur quod tardáret ipse in templo. Egréssus áutem non póterat lóqui ad illos, et cognovérunt quod visiónem vídisset in templo. Et ipse erat ínnuens illis, et permánsit mutus. Et factum est, ut impléti sunt dies offícii ejus, ábiit in domum suam: post hos áutem dies concépit Elísabeth uxor ejus, et occultábat se ménsibus quínque, dicens: Quia sic fecit mihi Dóminus in diébus, quíbus respéxit áuferre oppróbrium meum inter hómines.

    

Offertorium. Ps. 20, 2-3. In virtúte tua, Dómine, lætábitur justus, et super salutáre tuum exsultábit veheménter: desidérium ánimæ ejus tribuísti ei.

    

SECRETA 

Múnera, Dómine, obláta sanctífica, et intercedénte beáto Joánne Baptísta, nos per hæc a peccatórum nostrórum máculis emúnda. Per Dóminum.

   

Vel

Deus, cujus misericórdia præcurrénte salvámur, réspice propítius ad tanti solémnia Præcursóris, ut sacrifícium quod natalítio ejus múnere gratulánter offérimus, et indulgéntiam nobis obtíneat et favórem. Per Dóminum (Era la Secreta de la vigilia en el Sacramentario Gelasiano).

 

Præfatio de S. Joanni Baptistæ.

Vere dignum et justum est, ǽquum et salutáre, nos tibi semper et ubíque gratias ágere: Dómine, sancte Pater, omnípotens ætérne Deus: Et tuam in beáto Joánne Baptísta Præcursóre magnificéntiam collaudáre, qui vocem Matris Dómini nondum éditus sensit, et adhuc clauso útero, advéntum salútis humánæ prophética exsulatióne significávit. Qui et genetricis sterilitátem concéptus ábstulit, et patris linguam natus absólvit, solúsque ómnium prophetárum Redemptórem mundi, quem prænuntiávit, osténdit. Et ut sacrae purificatiónis efféctum aquárum natúra concíperet, sanctificándis Jordánis fluéntis, ipsum baptísmo baptísmatis lavit auctórem. Et ídeo cum Ángelis et Archángelis, cum Thronis et Dominatiónibus, cumque omni milítia cœléstis exércitus hymnum glóriæ tuæ cánimus, sine fine dicéntes: Sanctus

   

Communio. Ps. 20, 4. Posuísti, Dómine, super caput ejus corónam de lápide pretióso.

  

POSTCOMMUNIO

Præsta, quǽsumus, omnípotens Deus, ut qui cœlestia aliménta percépimus, intercedénte beáto Joánne Baptísta, per hæc contra ómnia advérsa muniámur. Per Dóminum.

   

ORATIO SUPER PÓPULUM 

Præsta, quǽsumus, Dómine, ut pópulus tuus ad plenæ devotiónis efféctum beáti Joánnis Baptístæ natalítiis præparétur, quem præmisísti Fílio tuo paráre plebem perféctam, Jesu Christo Dómino nostro. Qui tecum.

  

Alia. Beáti nos, Dómine, Joánnis orátio, et intellígere Christi tui mystérium postúlet, et meréri. Per eúmdem.