MISA DEL BIENAVENTURADO PEDRO JULIÁN EYMARD

Misa aprobada por la Sagrada Congregación de Ritos el 17 de Enero de 1930.

  

Die 3 Augusti

In festo B. Petri Juliáni Eymard, Confessóris.

Duplex 2. Classis.

  

Introitus. Ps. 83, 3. Passer invénit sibi domum: et turtur nidum sibi, ubi ponat pullos suos. Altária tua, Dómine virtútum: Rex meus, et Deus meus. (T. P. Allelúja, allelúja.) Ps. ibid., 2. Quam dilécta tabernácula tua, Dómine virtútum: concupíscit, et déficit ánima mea in átria Dómini. ℣. Gloria Patri.

   

ORATIO

Deus, qui ad gloriósi Córporis tui mystérium júgiter adorándum, novam, per beátum Petrum Juliánum Confessórem, in Ecclésia tua famíliam florescére voluísti: ejus nobis précibus et méritis concéde, ut Quod velátum adorámus in via, reveláta fácie in pátria contemplári. Qui vivis.

   

Léctio libri Apocalýpsis beáti Joánnis Apóstoli.

Apoc. 5, 11-14.

   

In diébus illis: Audívi vocem Angelórum multórum in circúitu throni, et animálium, et seniórum: et erat númerus eórum mília mílium, dicéntium voce magna: Dignus est Agnus, qui occísus est, accípere virtútem, et divinitátem, et sapiéntiam, et fortitúdinem, et honórem, et glóriam, et benedictiónem. Et omnem creatúram, quæ in cœlo est, et super terram, et sub terra, et quæ sunt in mari, et quæ in eo: omnes audívi dicéntes: Sedénti in throno, et Agno: benedíctio, et honor, et glória, et potéstas in sǽcula sæculórum.

   

Graduale. Dan. 3, 53 et 52. Benedíctus in templo sancto glóriæ tuæ, et laudábilis et gloriósus in sǽcula.

℣. Et benedíctum Nomen glóriæ tuæ, quod est sanctum, et laudábilem, et gloriósum in sǽcula.

   

Allelúja, allelúja. ℣. Ibid, 54. Benedíctus super thrónum sanctum regni tui, super sceptrum Divinitatis tuæ. Allelúja.

   

Post Septuagesimam, omissis Allelúja et Versu sequenti, dicitur:

Tractus. Num. 14,. 5 et 6. Quam pulchra tabernácula tua, Jacob, et tentória tua, Ísraël!

℣. Ut valles nemorósæ, et hortis juxta flúvios írrigui.

℣. Ut tabernácula, quæ fixit Dóminus, quási cedri prope áquas.

Tempore autem Paschali omittitur Graduale, et ejus loco dicitur:

Allelúja, allelúja. 

℣. Is. 12, 5 et 6. Cantáte Dómino, quóniam magnífice fecit: annuntiáte hoc in univérsa terra. Allelúja.

℣. Exsúlta, et láuda, habitátio Sion, quía magnus in médio tui sanctus Ísraël. Allelúja.

     

✠ Sequéntia sancti Evangélii secúndum Joánnem.

Joann. 6, 56-60, 67-70.

   

In illo témpore, dixit Jesus turbis: Caro mea vere est cibus, et sanguis meus vere est potus. Qui mandúcat meam carnem, et bibit meum sánguinem, in me manet, et ego in illo. Sicut misit me vivens Pater, et ego vivo propter Patrem: et qui mandúcat me, et ipse vivet propter me. Hic est panis, qui de cœlo descéndit. Non sicut manducavérunt patres vestri manna, et mórtui sunt. Qui mandúcat hunc panem, vivet in ætérnum. Hæc dicit in synagóga docens, in Caphernaum. Ex hoc multis discipulórum ejus abíerunt retro: et jam non cum illo ambulábant. Dixit Jesus ad duódecim: Numquid et vos vultis abíre? Respóndit ergo ei Simon Petrus: Dómine, ad quem ibímus? Verba vitæ ætérnæ habes. Et nos credívimus, et cognóvimus, quía tu es Christus Fílius Dei.

   

Offertorium. Luc. 22, 28-30. Vos estis, qui permansístis mecum in tentatiónibus meis: et ego dispóno vobis sicut dispósuit mihi Pater meus regnum, ut edátis et et bibátis super mensam meam in regno meo. (T. P. Allelúja.) 

   

SECRETA

Illum tui amóris ignem, Dómine Jesu, accénde in córdibus nostris, quo beátus Petrus Juliánus, hæc sacra mysteria peragéndo, flagrábat: ut digne semper ac devóte sistámus in circúito mensæ tuæ. Qui vivis.

   

Communio. 3. Reg. 10, 8. Beate viri tui, et beati servi tui, qui stant coram te semper, et áudiunt sapiéntiam tuam. (T. P. Allelúja.) 

   

POSTCOMMUNIO

Divína dape reféctos, fac nos, Dómine Deus, beáti Petri Juliáni Confessóris exémplo, in gratiárum semper actióne manére, et sacrosánctum Córporis tui mystérium in spíritu et veritáte perénniter adoráre. Qui vivis.