MISA EN HONOR A SANTA LIBERATA, VIRGEN Y MÁRTIR.

Misa aprobada por la Sagrada Congregación de Ritos. Salvo el introito y la Oración, que son propias, toda la Misa es del formulario Loquébar, excepto el Evangelio, que proviene de Me expectavérunt (ambas del Común de las Santas Vírgenes y Mártires).

Die 20 Julii

SANCTÆ LIBERÁTÆ VÍRGINIS ET MÁRTYRIS

Duplex Majus.

   

Introitus. Gaudeámus omnes in Dómino, diem festum celebrántes sub honore Beátæ Liberátæ Vírginis et Mártyris: de cujus festivitáte gáudent Angeli, et colláudant Fílium Dei (T.P. Allelúja, allelúja). Ps. 44, 2. Eructávit cor meum verbum bonum: dico ego ópera mea Regi. ℣. Gloria Patri.

    

ORATIO

Beátæ Liberátæ Vírginis et Mártyris tuæ, quǽsumus Dómine, précibus et méritis adjuvémur: ut, quæ pro tui nóminis confessióne et pudicítiæ defensióne in cruce pepéndit, ab inimicórum insídiis sua nos protectióne deféndat. Per Dóminum.

Commemoratio S. Hieronymi Æmiliani Confessoris

ORATIO

Deus, misericordiárum pater, per mérita et intercessiónem beáti Hieronymi, quem órphanis adjutórem et patrem esse voluísti: concéde; ut spíritum adoptiónis, quo fílii tui nominámur et sumus, fidéliter custodiámus.

  

In missis privatis, fit commemoratio S. Margaritæ, Virginis et Martyris.

ORATIO

Indulgéntiam nobis, quǽsumus, Dómine, beáta Margaríta Virgo et Martyr implóret: quæ tibi grata semper éxstitit, et mérito castitátis, et tuæ professióne virtútis. Per Dóminum.

   

Léctio libri Sapiéntiæ.

Eccli. 51, 1-8 et 12.

   

Confitébor tibi, Dómine, Rex, et collaudábo te Deum, Salvatórem meum. Confitébor nómini tuo: quóniam adjútor et protéctor factus es mihi, et liberásti corpus meum a perditióne, a láqueo línguæ iníquæ et a lábiis operántium mendácium, et in conspéctu astántium factus es mihi adjutor. Et liberasti me secúndum multitúdinem misericórdiæ nóminis tui a rugiéntibus, præparátis ad escam, de mánibus quæréntium ánimam meam, et de portis tribulatiónum, quæ circumdedérunt me: a pressúra flammæ, quæ circúmdedit me, et in médio ignis non sum æstuáta: de altitúdine ventris inferi, et a lingua coinquináta, et a verbo mendácii, a rege iníquo, et a lingua injústa: laudábit usque ad mortem ánima mea Dóminum: quóniam éruis sustinéntes te, et líberas eos de mánibus géntium, Dómine, Deus noster.

  

Graduale. Ps. 44, 8. Dilexísti justítiam, et odísti iniquitátem.

℣. Proptérea unxit te Deus, Deus tuus, óleo lætítiæ.

 

Allelúja, allelúja. ℣. Ibid., 15 et 16. Adducántur Regi Vírgines post eam: próximæ ejus afferéntur tibi in lætítia. Allelúja.

  

Post Septuagesimam, omissis Allelúja et Versu sequenti, dicitur:

Tractus. Veni, sponsa Christi, áccipe corónam, quam tibi Dóminus præparávit in ætérnum: pro cujus amóre sánguinem tuum fudísti.

℣. Ps. 44, 8 et 5. Dilexísti justítiam, et odísti iniquitátem: proptérea unxit te Deus, Deus tuus, óleo lætítiæ præ consórtibus tuis.

℣. Spécie tua et pulchritúdine tua inténde, próspere procéde et regna.

   

Tempore autem Paschali omíttitur Graduale, et ejus loco dicitur:

Allelúja, allelúja.

℣. Ps. 44, 15 et 16. Adducéntur Regi Vírgines post eam: próximæ ejus afferéntur tibi in lætítia. Allelúja.

℣. Ibid., 5. Spécie tua et pulchritúdine tua inténde, próspere procéde et regna. Allelúja.

   

✠ Sequéntia sancti Evangélii secúndum Matthǽum.

Matth. 13, 44-52.

  

In illo témpore: Dixit Jesus discípulis suis parábolam hanc: Símile est regnum cœlórum thesáuro abscóndito in agro: quem qui invénit homo, abscóndit, et præ gáudio illíus vadit, et vendit univérsa, quæ habet, et emit agrum illum. Íterum símile est regnum cœlórum hómini negotiatóri, quærénti bonas margarítas. Invénta áutem una pretiósa margaríta, ábiit, et véndidit ómnia, quæ hábuit, et emit eam. Íterum símile est regnum cœlórum sagénæ, missæ in mare et ex omni génere píscium congregánti. Quam, cum impléta esset educéntes, et secus litus sedéntes, elegérunt bonos in vasa, malos áutem foras misérunt. Sic erit in consummatióne sǽculi: exíbunt Ángeli, et separábunt malos de médio justórum, et mittent eos in camínum ignis: ibi erit fletus et stridor déntium. Intellexístis hæc ómnia? Dicunt ei: Étiam. Ait illis: Ídeo omnis scriba doctus in regno cœlórum símilis est hómini patrifamílias, qui profert de thesáuro suo nova et vétera.

   

Offertorium. Ps. 44, 15 et 16. Afferéntur Regi Vírgines post eam: próximæ ejus afferéntur tibi in lætítia (T.P. Allelúja).‎

   

SECRETA

Súscipe, Dómine, múnera, quæ in beátæ Liberátæ Vírginis et Mártyris tuæ solemnitáte deférimus: cujus nos confídimus patrocínio liberári. Per Dóminum.

   

Commemoratio S. Hieronymi Æmiliani Confessoris

SECRETA

Clementíssime Deus, qui, véteri homine consúmpto, novum secúndum te in beáto Hierónymo creáre dignátus es: da, per mérita ipsíus; ut nos, páriter renováti, hanc placatiónis hóstiam in odórem tibi suavíssimum offerámus.

  

Commemoratio S. Margaritæ, Virg. et Mart.

SECRETA

Hóstias tibi, Dómine, beátæ Margarítæ Vírginis et Mártyris tuæ dicátas méritis, benígnus assúme: et ad perpétuum nobis tríbue proveníre subsídium. Per Dóminum.

    

Communio. Ps. 118, 78 et 80. Confundántur supérbi, quía injúste iniquitátem fecérunt in me: ego áutem in mandátis tuis exercébor, in tuis justificatiónibus, ut non confúndar (T.P. Allelúja). 

  

POSTCOMMUNIO

Auxiliéntur nobis, Dómine, sumpta mystéria: et, intercedénte beáta Liberáta Vírgine et Mártyre tua, sempitérna fáciant protectióne gaudére. Per Dóminum.

  

Commemoratio S. Hieronymi Æmiliani Confessoris

POSTCOMMUNIO

Angelórum pane refécti te, Dómine, supplíciter deprecámur: ut, qui ánnuam beáti Hierónymi Confessóris tui memóriam celebráre gaudémus; ejúsdem étiam et exémplum imitémur, et amplíssimum in regno tuo prǽmium obtinére valeámus.

  

Commemoratio S. Margaritæ, Virg. et Mart.

POSTCOMMUNIO

Divíni múneris largitáte satiáti, quǽsumus, Dómine, Deus noster: ut, intercedénte beáta Margaríta Vírgine et Mártyre tua, in ejus semper participatióne vivámus. Per Dóminum.