MISA DE SAN ALONSO RODRÍGUEZ

Del Misal Propio de la Compañía de Jesús. La Misa Justus ut palma es la segunda del Común de los Confesores no pontífices, pero las oraciones son propias.

  

Die 30 Octobris.

In Festo S. Alphónsi Rodríguez, Confessóris Societáte Jesu.

Semiduplex.

  

Introitus. Ps. 91, 13-14. Justus ut palma florébit: sicut cedrus Líbani multiplicábitur: plantátus in domo Dómini: in átriis domus Dei nostri. (T. P. Allelúja, allelúja). Ps. ibid, 2. Bonum est confitéri Dómino: et psállere nómini tuo, Altíssime. ℣. Glória Patri.

  

ORATIO

Deus, fortitúdo fragílium et humílium celsitúdo, qui fámulum tuum Alphónsum jugi mortificatiónis stúdio, et exímiæ humilitátis láude claréscere voluísti: da, ut ejus imitatióne carne mortificáti, et in húmili crucis Fílii tui sequéla fidéliter perseverántes, glóriam consequámur ætérnam. Qui tecum vivit.

 
Et fit Commemoratio feriæ.

  

Léctio Epístolæ beáti Pauli Apóstoli ad Corínthios.

1. Cor. 4, 9-14.

 

Fratres: Spectáculum facti sumus mundo et Ángelis et homínibus. Nos stulti propter Christum, vos áutem prudéntes in Christo: nos infírmi, vos áutem fortes: vos nóbiles, nos áutem ignóbiles. Úsque in hanc horam et esurímus, et sitímus, et nudi sumus, et cólaphis cǽdimur, et instábiles sumus, et laborámus operántes mánibus nostris: maledícimur, et benedícimus: persecutiónem pátimur, et sustinémus: blasphemámur, et obsecrámus: tamquam purgaménta hujus mundi facti sumus, ómnium peripséma usque adhuc. Non ut confúndant vos, hæc scribo, sed ut fílios meos caríssimos móneo: in Christo Jesu, Dómino nostro.

  

Graduale. Ps. 36, 30-31. Os justi meditábitur sapiéntiam, et lingua ejus loquétur judícium.

℣. Lex Dei ejus in corde ipsíus: et non supplantabúntur gressus ejus.

  

Allelúja, allelúja. Ps. 111, 1. Beátus vir, qui timet Dóminum: in mandátis ejus cupit nimis. Allelúja.

In Missis votivis post Septuagesimam, omissis Allelúja et versu sequenti, dicitur:

Tractus. Ps. 111, 1-3. Beátus vir, qui timet Dóminum: in mandátis ejus cupit nimis.

℣. Potens in terra erit semen ejus: generátio rectórum benedicétur.

℣. Glória et divítiæ in domo ejus: et justítia ejus manet in sǽculum sǽculi.

 

Tempore autem Paschali omittitur Graduale, et ejus loco dicitur:

Allelúja, allelúja.

℣. Ps. 111, 1. Beátus vir, qui timet Dóminum: in mandátis ejus cupit nimis. Allelúja.

℣. Osee 14, 6. Justus germinábit sicut lílium: et florébit in ætérnum ante Dóminum. Allelúja.

  

✠ Sequéntia sancti Evangélii secúndum Lucam.

Luc. 12, 32-34.

   

In illo témpore: Dixit Jesus discípulis suis: Nolíte timére, pusíllus grex, quía complácuit Patri vestro dare vobis regnum. Véndite quæ possidétis, et date eleemósynam. Fácite vobis sácculos, qui non veteráscunt, thesáurum non deficiéntem in cœlis: quo fur non apprópiat, néque tínea corrúmpit. Ubi enim thesáurus vester est, ibi et cor vestrum erit.

   

Offertorium. Ps. 20, 2-3. In virtúte tua, Dómine, lætábitur justus, et super salutáre tuum exsultábit veheménter: desidérium ánimæ ejus tribuísti ei (T. P. Allelúja).

  

SECRETA

Oblatiónes nostras tibi, Dómine, quǽsumus, beáti Alphónsi intercéssio sancta comméndet, quem coram tuis altáribus precántem supernórum charísmatum dulcédine recreásti. Per Dóminum.

 
Et fit Commemoratio feriæ.

  

Communio. Matth. 19, 28-29. Amen, dico vobis: quod vos, qui reliquístis ómnia et secúti estis me, céntuplum accipiétis, et vitam ætérnam possidébitis (T. P. Allelúja).

POSTCOMMUNIO

Spíritum nobis, Dómine, fortitúdinis tríbuat hæc mensa cœléstis: ut beáti Alphonsi Confessóris exémplo, salútis nostræ hóstium superátis insídiis, perpétua pace pérfrui mereámur. Per Dóminum.

 
Et fit Commemoratio feriæ.